ԵՐԻՏԱՍԱՐԴ ԱՌԱՋՆՈՐԴՆԵՐԸ՝  ԳԱՎԱՌԻ ՊԵՏԱԿԱՆ ՀԱՄԱԼՍԱՐԱՆՈՒՄ

Այսօր Գավառի պետական համալսարանը հյուրընկալեց «Ջինիշյան» հիշատակի հիմնադրամի «Ակտիվ երիտասարդները հանուն փոփոխության. 2016-2018 թթ.» ծրագրի շրջանակում իրականացվող  «Երիտասարդ առաջնորդների ճամբար» նախաձեռնության մասնակիցներին։

Ճամբարը կյանքի կոչվեց ԳՊՀ տնտեսագիտական ֆակուլտետի շրջանավարտ`  «Երիտասարդ առաջնորդների ճամբար» ծրագրի ղեկավար Գառնիկ Գափոյանի, հումանիտար մասնագիտությունների ֆակուլտետի ուսանողուհիներ Սիրուշ Գյարգրցյանի, Անգելինա Պետրոսյանի, բանասիրական ֆակուլտետի ուսանողուհի Էլեն Պետրոսյանի, տնտեսագիտական ֆակուլտետի ուսանող Գարիկ Հովեյանի, հեռակա ուսուցման ֆակուլտետի ուսանող Ժորա  Խզմալյանի նախաձեռնությամբ և համատեղ ջանքերով։

Ճամբարականների համար պառլամենտի և պառլամենտարիզմի մասին բովանդակալից դասախոսություն կարդաց իրավաբանական գիտությունների դոկտոր, պրոֆեսոր Հրանուշ Հակոբյանը, ով անդրադարձավ Հայաստանի Հանրապետության պառլամենտական կառավարման ձևին և դրա առանձնահատկություններին, պառլամենտական ժողովրդավարությանը, ՀՀ Ազգային ժողովի կողմից իրականացվող վերահսկողության սահմանադրական հիմքերին և կառուցակարգերին, ինչպես նաև սոցիալական և իրավական պետության առաքելությանը։ Տիկին Հակոբյանը պատասխանեց երիտասարդներին հետաքրքրող  հարցերին:

ՀՀ կրթության և գիտության նախարար Արայիկ Հարությունյանը վարեց դաս՝ «Կրթությունը որպես քաղաքացիական հասարակության առաջմղիչ ուժ» թեմայով, պատասխանեց ուսանողներին ու շրջանավարտներին հուզող բազմաթիվ հարցերի։

ԳՊՀ ռեկտոր Ռուզաննա Հակոբյանը փոխներգործուն մեթոդների կիրառմամբ վարեց դաս՝ նվիրված մարդու իրավունքների հասկացությանն ու էությանը,  իրավունքների դասակարգմանը, մարդու իրավունքների պաշտպանության ազգային (ներպետական) և միջազգային-իրավական երաշխիքներին և կառուցակարգերին։

«Երիտասարդ առաջնորդների ճամբար» ծրագրի մասնակիցները  հնարավորություն ստացան տարբեր ոլոտներ ներկայացնող, փորձառու հյուր-խոսնակների  միջոցով հարստացնել իրենց գիտելիքներն ու կարողությունները։