ՇՆՈՐՀԱՎՈՐՈՒՄ ԵՆՔ ‹‹ԳԵՂԱՄԱ ԼԵՌՆԵՐԻ ԶԱՎԱԿՆԵՐԸ›› ԳՐՔԻ ԼՈՒՅՍԸՆԾԱՅՈՒՄԸ

Սիրով շնորհավորում ենք ‹‹Գեղամա լեռների զավակները›› բանաստեղծությունների ժողովածուի լույսընծայումը։
Ժողովածուն ընթերցողին է ներկայացնում Գեղարքունյաց աշխարհի բազմաշնորհ զավակների ստեղծագործությունները։
Գրքում տեղ են գտել տասնհինգ հեղինակների՝ Գավառի պետական համալսարանի շրջանավարտներ՝ Մեծ Մասրիկի միջնակարգ դպրոցի տնօրեն Ատոմ Հակոբյանի և բանաստեղծուհի Շուշան Հայրապետյանի, բանաստեղծ և թարգմանիչ Լևոն Բլբուլյանի, ‹‹Գեղամա աշխարհ›› թերթի    նվիրյալ   գլխավոր խմբագիր Խոսրով Խլղաթյանի,  իրենց ուրույն ասելիքը, ձեռագիրն ու ոճն ունեցող ժամանակակից պոետներ Դավիթ Մշեցու, Անահիտ Մխիթարյանի, Նաիրա Աբրահամյանի, Աննե Մարիի, Գայանե Եդոյանի, Գոհար Եղիազարյանի, Գառնիկ Մանուկյանի, Ամալյա Մհերյանի, Սոս Մնացականյանի, Հրանտ Վաղարշյանի և Տաթև Ոսկանյանի ստեղծագործություններից։
Գեղեցիկ և հուզիչ բանաստեղծությունների ժողովածուն կազմել են Երևանի թիվ 16 գրադարանի տնօրեն Լուսինե Մարգարյանը և Շուշան Հայրապետյանը՝ որպես ծննդավայրի հանդեպ սիրո և երախտագիտության արտահայտություն։ Իսկ տպագրությանը սիրահոժար աջակցել է Գրիշա Հակոբյանը։
Գրքի առաջաբանում, դիմելով ընթերցողներին, Անդրանիկ Հակոբյանը գրում է․‹‹Ձեր ձեռքին այս գիրքը, որ կոչվում է ‹‹Գեղամա լեռների զավակները››, ձյունափառ լեռների մաքուր, ճշմարիտ ձնհալոցքից առաջ եկած գրականություն է, մաքուր, նախնական, անկեղծության ու պարզության մեջ զուլալ գրականություն։ Այստեղ բուրում է տոհմիկ հայի հոգևոր ու բարոյական միջավայրը, մեր մամիկների գոգնոց-նշխարքի՝ հոգի ջերմացնող տաքությունը, մեր ապուպապերի խոհուն ու տարողունակ լռությունը․․․››։
Գրքի շնորհանդեսը կայացավ Երևանի թիվ 16 գրադարանում։ Ներկա էին հեղինակները, ժամանակակից գրողներ, ընթերցասերներ։ Շնորհանդեսին մասնակցեց Գավառի պետական համալսարանի ռեկտոր Ռուզաննա Հակոբյանը, ով շնորհավորեց և շնորհակալություն հայտնեց Գեղարքունյաց չքնաղ աշխարհը բանաստեղծորեն ներկայացնող՝ Գեղամա լեռների հավատավոր զավակներին։
Տիկին Հակոբյանը նշեց, որ ժողովածուն ներառում է հայրենի եզերքի, մայր ժողովրդի, բնության, աշխարհի և կյանքի նկատմամբ մեծ սիրով տոգորված հեղինակների խորաթափանց մտքի և փոթորկուն հույզերի բյուրեղացումները։ Նա կարևորեց հայ գրականության՝ պոեզիայի ու արձակի միջոցով ազգային արժեքների պահպանումը և փոխանցումը աճող սերնդին։
Շնորհանդեսի ընթացքում   մեր օժտված հայրենակիցների ստեղծագործություններն ընթերցեցին Աննա Պողոսյանը և Անդրանիկ Աբրահամյանը։