Շնորհավորում ենք Գավառի պետական համալսարանի տնտեսագիտական ֆակուլտետի հաշվապահական հաշվառման ամբիոնի դասախոս, տնտեսական գիտությունների դոկտոր, պրոֆեսոր Արմեն Հակոբյանին՝ «Տրանսֆերային գնագոյացում» մենագրության լույսընծայման առթիվ։
Արդի աշխարհում տրանսֆերային գնագոյացումը չափազանց կարևոր է շահառուների համար և հետաքրքրություն է ներկայացնում թե՛ գիտական, թե՛ կիրառական տեսանկյուններից։
Մենագրությունում ներկայացված են տրանսֆերային գնագոյացման բովանդակային, կառուցակարգային, մեթոդական, վերահսկողության, որոշումների կայացման, զարգացման և հաշվետվողականության արդի հիմնախնդիրները։
Մենագրությունում ներկայացվել են տրանսֆերային գնագոյացման էությունը, առանձնահատկությունները, տնտեսական հարաբերությունների շրջանակը, բացահայտվել են ֆինանսական վերահսկողության հիմնախնդիրները և արդյունավետության բարձրացման ուղիները։
Անդրադառնալով կազմակերպությունների կառավարման բնագավառում տրանսֆերային գնագոյացման կառավարչական հաշվառման գործառույթներին և ներտնտեսային հաշվառման կազմակերպմանը՝ հեղինակը ներկայացրել է կազմակերպությունների ներխմբային հաշվառման համակարգի տեսամեթոդական և կիրառական հիմքերը։
Մենագրությունում ուսումնասիրության առարկա են դարձել նաև բանկային համակարգում տրանսֆերային գների կիրառման, ՀՀ-ում տրանսֆերային գնագոյացման վերահսկողության հիմնախնդիրները։ Իսկ ներկայացված մեթոդները և մոտեցումները գործնականում կնպաստեն կազմակերպությունների ներտնտեսական հարաբերությունների բարելավմանը։
Աշխատությունը լուրջ ներդրում է տնտեսագիտության բնագավառում, քանի որ համակողմանիորեն ներկայացված են տրանսֆերային գնագոյացման հիմնախնդիրները։
Հեղինակին մաղթում ենք հետագա ձեռքբերումներ ու հաջողություններ՝ ներկայացնելով պրոֆեսոր Հակոբյանի կենսագրությունը։
Արմեն Աշմատի Հակոբյանը ծնվել է 1976 թվականի մարտի 18-ին, Երևան քաղաքում: 1998 թվականին գերազանցությամբ ավարտել է Երևանի պետական ժողովրդական տնտեսության ինստիտուտը՝ «Հաշվապահական հաշվառում և աուդիտ» մասնագիտությամբ: Այնուհետ կրթությունը շարունակել է նույն բուհի ասպիրանտուրայում և 2001 թվականին, պաշտպանելով թեկնածուական ատենախոսությունը, ստացել է տնտեսագիտության թեկնածուի գիտական աստիճան՝ լինելով ՀՀ-ում առաջինը, ով այդ մասնագիտությամբ ստացել է գիտական աստիճան /Ը-0005 հաշվապահական հաշվառում և վիճակագրություն/, իսկ 2004 թ․-ին ստացել է դոցենտի գիտական կոչում։
2012 թվականի հուլիսին Ա․ Հակոբյանը պաշտպանել է դոկտորական ատենախոսություն՝ «Վարձակալության հաշվառման և ֆինանսական կառավարման հիմնախնդիրները ՀՀ-ում» թեմայով, և նրան շնորհվել է տնտեսագիտության դոկտորի գիտական աստիճան, իսկ 2019 թվականի դեկտեմբերին ստացել է պրոֆեսորի գիտական կոչում:
1998 թվականից նա դասավանդում է Հայաստանի պետական տնտեսագիտական համալսարանում, միաժամանակ Արմեն Հակոբյանը հանդիսանում է ՀՊՏՀ «014» մասնագիտական խորհրդի անդամ։ Հաշվառման և ֆինանսների վերաբերյալ 70-ից ավելի գիտական հոդվածների և ձեռնարկների հեղինակ է, ունի 2 մենագրություն: 2016-2022 թթ ընթացքում Հակոբյանի ղեկավարությամբ 8 ասպիրանտ պաշտպանել են տնտեսագիտության թեկնածուի գիտական աստիճանի հայցման ատենախոսություն։
Համաձայն ՀՀ կենտրոնական բանկի կողմից տրված վկայականների՝ նա ունի բանկի և օտարերկրյա բանկի մասնաճյուղի գլխավոր հաշվապահի պաշտոններում աշխատելու իրավունք:
Մասնակցել է որակավորման բարձրացման տարբեր դասընթացների ՀՀ-ում, ՌԴ–ում, Լիբանանում, Նիդերլանդներում, Չեխիայում, Ֆրանսիայում, Մեծ Բրիտանիայում, Ավստրիայում:
Ա․ Հակոբյանը 2020 թվականից ՀՊՏՀ Հաշվապահական հաշվառուման ֆակուլտետի «ֆինանսական հաշվառման» ամբիոնի պրոֆեսոր է, ՀՀ փորձագիտական հաշվառման և աուդիտորների պալատի որակավորման հանձնաժողովի անդամ ՝ փորձագետ-հաշվապահ։
2015 թվականի հուլիսից Արմեն Հակոբյանը աշխատում է «ԱԿԲԱ ԲԱՆԿ» ՓԲԸ-ի գլխավոր հաշվապահ:
Ամուսնացած է:
Պարոն Հակոբյանը աշխատում է Գավառի պետական համալսարանում, նրա ղեկավարությամբ ԳՊՀ տնտեսագիտական ֆակուլտետի հաշվապահական հաշվառման ամբիոնի ասպիրանտը հաջղությամբ պաշտպանեց թեկնածուական ատենախոսությունը։
Նա արժանացել է բազմաթիվ շնորակալագրերի և պատվոգրերի, այդ թվում՝ ԳՊՀ գիտական շնորհակալագրի։
Սիրով սպասում ենք պրոֆեսոր Արմեն Աշմատի Հակոբյանի նոր գիտական աշխատություններին։