Գավառի պետական համալսարանի բնագիտության լաբորատորիան հյուրընկալեց ՀՀ Գեղարքունիքի մարզի Լճափ գյուղի միջնակարգ դպրոցի 7-րդ դասարանի աշակերտներին՝ մաթեմատիկայի ուսուցչուհի, ԳՊՀ շրջանավարտ Լիանա Պետրոսյանի, կենսաբանության լաբորանտ, ԳՊՀ շրջանավարտ Սուզաննա Մհերյանի ուղեկցությամբ:
Աշակերտներին ողջունեց ԳՊՀ բնագիտական ֆակուլտետի դեկան Մարտին Ավագյանը, ով ներկայացրեց համալսարանում առկա մասնագիտությունները, կարևորեց ուսումնառության ընթացքում տեսական և գործնական գիտելիքների ձեռքբերումը՝ որպես աշխատաշուկայում մրցունակության գրավական։
ԳՊՀ բնագիտության լաբորատորիայի վարիչ Թերմինե Խաչիկյանը ներկայացրեց լաբորատոր փորձերի դերը՝ բնագիտական առարկաների ուսումնասիրության գործում, աշակերտների համար կազմակերպեց լաբորատոր փորձեր և գործնական աշխատանք՝ ֆիզիկա և քիմիա առարկաներից։
Լաբորատորիայում աշակերտները դիտեցին «Քիմիական հրաբուխ», «Ծուխ առանց կրակի» փորձերը, ուսումնասիրեցին Մաքսվելի թափանիվի աշխատանքը, դիտարկեցին սահքի, դադարի և գլորման շփման ուժերի փոփոխությունները՝ ուժաչափի և համապատասխան սարքի օգնությամբ։
Աշակերտները առանձնակի հետաքրքրությամբ ուսումնասիրեցին հրաբխային քարերի հավաքածուն։
Աշակերտները ծանոթացան ԳՊՀ լաբորատորիայում առկա փորձարարական ռեսուրսների հետ։
