Հայաստանի Հանրապետության Գեղարքունիքի մարզի և Ֆրանսիայի Հանրապետության Իզերի դեպարտամենտի միջև համագործակցության ծրագրի շրջանակներում կայացավ հայ-ֆրանսիական 3-րդ քայլարշավային փառատոնը, որը մեկնարկեց Գավառի Լևոն Քալանթարի անվան դրամատիկական թատրոնում։
Փառատոնին մասնակցեցին 200 երիտասարդներ՝ Գեղարքունիքի, Լոռու, Սյունիքի մարզերից, Երևան քաղաքից, ինչպես նաև ներկայացուցիչներ Գեղարքունիքի մարզպետի աշխատակազմից, մարզի համայնքների ղեկավարներ և տեղակալներ, համայնքապետարանների պատասխանատու աշխատակիցներ, զբոսաշրջության ոլորտի ներկայացուցիչներ։
«Քայլարշավը որպես տեղական զարգացման շարժիչ ուժ» թեմայով քայլարշավային փառատոնին ակտիվորեն մասնակցեցին նաև ԳՊՀ ուսանողներն ու աշխատակիցները։
Գավառի կենտրոնական հրապարակում կազմակերպված ցուցահանդեսին առանձին տաղավարով հանդես եկավ Գավառի պետական համալսարանը՝ ներկայացնելով բուհի դասախոսների և ուսանողների գիտական հոդվածների ժողովածուները, ԳՊՀ պրոֆեսորների հրատակած մենագրությունները, դասագրքերը, ձեռնարկները, ուսանողներին շնորհված գավաթները, հուշամեդալներն ու պարգևները։ Հյուրերին ներկայացվեցին նաև ԳՊՀ միջազգային համագործակցության ծրագրերը։