Author: Nune Miribyan

Գավառի պետական համալսարանում անցկացվում են ‹‹Էրազմուսյան օրեր››, որի ընթացքում ս․ թ․հոկտեմբերի 18-ին ուսանողներին և դասախոսներին ներկայացվեցին Եվրոպական միության ‹‹Էրազմուս+›› միջազգային կրեդիտային շարժունության ծրագրերը (Հիմնական գործողություն՝ ՀԳ-1), ‹‹Էրազմուս+›› կարողությունների զարգացման ծրագրերը (ՀԳ-2), ակադեմիական շարժունության ծրագրերին մասնակցելու հնարավորություններն ու պայմանները, ինչպես նաև բովանդակալից և հետաքրքիր հաշվետվություններով հանդես եկան եվրոպական բուհերում վերապատրաստում անցած, դասավանդած և ուսանած համալսարանականները։

ԳՊՀ արտաքին կապերի և լրատվության բաժնի վարիչ Լիլիթ Թոռչյանը բովանդակալից շնորհանդեսի միջոցով ներկայացրեց Իսպանիայի Թագավորության Մուրսիայի Սան Անտոնիո կաթոլիկ համալսարանում կայացած միջազգային շաբաթի արդյունքները։   Տիկին Թոռչյանը Մուրսիայի Սան Անտոնիո կաթոլիկ համալսարանում ներկայացրել էր Հայաստանի Հանրապետության Գավառ քաղաքը, նկարագրել ԳՊՀ գործունեության հիմնական ուղղությունները, միջազգայնացման տեսլականը, այդ ուղղությամբ կատարվող ակտիվ աշխատանքները։

ԳՊՀ բնագիտատնտեսագիտական ֆակուլտետի դեկան Մարտին Ավագյանը ներկայացրեց Ռումինիայի Հանրապետության Տիմիշոարայի Արևմտյան համալսարանում վերապատրաստման արդյունքները։

Հաշվետվությամբ հանդես եկան նաև հումանիտար մասնագիտությունների ֆակուլտետի առկա բաժնի «Անգլերեն լեզու և գրականություն» մասնագիտության 4-րդ կուրսի ուսանողուհի Արուսյակ Սմբաթյանը, ով հաջողությամբ ուսանել է Պորտուգալիայի Հանրապետության Էվորայի համալսարանում և բնագիտատնտեսագիտական ֆակուլտետի առկա բաժնի «Տնտեսագիտություն» մասնագիտության 3-րդ կուրսի ուսանողուհի Արմինե Սաֆոյանը, ով սովորել է Իսպանիայի Թագավորության Ալմերիայի համալսարանում և ուսումնառությունն ավարտել բարձր միավորներով։

Հանդիպմանը ներկա էին ուսանողներ, ինչպես նաև Գավառի Սամվել Քոչարյանցի անվան թիվ 1 հիմնական դպրոցի 9-րդ դասարանների աշակերտները՝ աշխարհագրության ուսուցչուհի Լիլիթ Սահակյանի ղեկավարությամբ։

‹‹Էրազմուսյան օրեր››-ի նպատակն է բուհի ուսանողներին, պրոֆեսորադասախոսական և վարչական անձնակազմի անդամներին տալ սպառիչ պատասխաններ Եվրոպական միության ‹‹Էրազմուս+›› միջազգային կրեդիտային շարժունության ծրագրերին դիմելու ընթացակարգի և պայմանների վերաբերյալ։

ԳՊՀ ‹‹Էրազմուսյան օրեր››-ը շարունակվում են։

Ս․ թ․ հոկտեմբերի 12-ին տեղի ունեցավ Գավառի պետական համալսարանի ռեկտորատի հերթական նիստը, որի օրակարգի համաձայն քննարկվեցին Եվրոպական միության ‹‹ERASMUS+ KPI4HE. Հայաստանում ներառական, թվային ու կանաչ ուղղվածությամբ բարձրագույն կրթության պատշաճ կառավարման և որակի համար գործունեության առանցքային ցուցանիշների ազգային շրջանակի (ԳԱՑԱՇ) ստեղծում» ծրագրի շրջանակում ս․ թ․ սեպտեմբերի 23-ից 28-ը Գերմանիայի Դաշնային Հանրապետության Օլդենբուրգի համալսարանում տեղի ունեցած վերապատրաստման արդյունքները։ Ծրագրի աշխատանքային խմբի անդամ, ԳՊՀ ուսումնագիտական գծով պրոռեկտոր Նելլի Կուտուզյանը ներկայացրեց Օլդենբուրգի համալսարանում տեղի ունեցած վերապատրաստման ընթացքն ու արդյունքները, ծրագրի առաջնահերթությունները, աշխատանքային հանդիպումները, քննարկվեցին ծրագրի շրջանակում ԳՊՀ-ի կողմից կատարվելիք աշխատանքները։ Վերապատրաստմանը մասնակցել են  ԳՊՀ պրոռեկտոր Ն․ Կուտուզյանը, Ինֆորմատիկայի և ֆիզիկամաթեմատիկական գիտությունների ամբիոնի վարիչ Վարազդատ Ավետիսյանը, Որակի ապահովման  բաժնի վարիչ Քանաքարա Հայրապետյանը, Ակադեմիական քաղաքականության բաժնի վարիչ Օլգա Ղազարյանը, Արտաքին կապերի և լրատվության բաժնի վարիչ Լիլիթ Թոռչյանը և նույն բաժնի մասնագետ Սիրանույշ Մկրտչյանը։

«- Խնդրում եմ պատմել Ձեր մասին և ներկայացնել Ձեր հաջողության պատմությունը:

— Անուշ Հակոբի Բաղդասարյանն եմ, ծնվել եմ 1999 թվականի դեկտեմբերի 18 –ին, ՀՀ Գեղարքունիքի մարզի Կարմիրգյուղ համայնքում։ 2006-2018թթ․ սովորել և գերազանցությամբ ավարտել եմ Կարմիրգյուղի N1 միջնակարգ դպրոցը։  2018-2022 թթ  սովորել և գերազանցությամբ ավարտել եմ ԳՊՀ բնագիտական ֆակուլտետի համակարգչային ճարտարագիտության բաժինը: 2022-2024թթ․ անվճար հիմունքներով ընդուվել և գերազանցությամբ ավարտել եմ նույն բաժնի մագիստրատուրան։ Ինչպես դպրոցական, այնպես էլ համալսարանական տարիներին մասնակցել  եմ բազմաթիվ ծրագրերի և դասընթացների։ 2023 թվականին «ՀՀ լավագույն ուսանող» մրցույթում բնագիտական ոլորտում զբաղեցրել եմ 2-րդ հորիզոնականը։

 — Ի՞նչ տվեց համալսարանը Ձեզ։

— Համալսարանը իմ հաջողության պատմության կարևոր  մասն է։ ԳՊՀ-ն լավագույն կրթօջախն է, որը բազմակողմանի հնարավորություններ  է տալիս յուրաքանչյուր ուսանողի։

— Ի՞նչն է Ձեզ համամար առաջնայինը կյանքում։

— Ինձ համար կյանքում առաջնայինը ընտանիքն է։ Ընտանիքում են ձևավորվում մարդու որակները, որոնք հետագայում զարգանում են ուսումնական հաստատություններում։

Ընտանիքը հայրենիքի հենասյունն է։ Ամուր հայրենիք ունենալու համար պետք է ունենալ կայացած և երջանիկ ընտանիքներ։

 -Ի՞նչ երազանք ունեք։

— Երազում եմ ամբողջ աշխարհում խաղաղության հաստատման մասին։ Երազում եմ, որ բոլորի հոգիներում թևածեն սերն ու ջերմությունը,  որ չարն ու թշնամանքը լքեն մարդկանց սրտերը։

 — Ինչ սկզբունքների եք դավանում։

— Ազնվություն, արդարություն, ճշտապահություն, բարություն, կամեցողություն, իհարկե՝ Աստվածաշնչյան պատգամներին հավատարիմ ապրելու ձգտում։

-Ի՞նչ նախասիրություններ ունեք, ազատ ժամանակ ինչո՞վ եք զբաղվում։

— Ազատ ժամանակ սիրում եմ կարդալ, զբաղվել ինքնակրթությամբ և ինքնազարգացմամբ, մասնակցում եմ տարբեր դասընթացների (մասնագիտական և ոչ մասնագիտական)։

-Ի՞նչ խորհուրդ կտաք ԳՊՀ ուսանողներին, ինչպե՞ս Ձեր կրտսեր ընկերները հաջորդ տարի հաղթեն «Լավագույն ուսանող» մրցույթում և, ընդհանրապես, ինչպե՞ս դառնալ լավագույնը:

— ԳՊՀ ուսանողներին խորհուրդ կտամ լավ սովորել, միշտ ձգտել ավելիին, լինել բազմակողմանի զարգացած ու միշտ փորձեն համապատասխանել ժամանակի պահանջներին, որպեսզի դառնան որակյալ և  պահանջված մասնագետ: Անհրաժեշտ է լինել աշխատասեր ու նպատակասլաց»։

Հարցազրույցը վարեց ԳՊՀ արտաքին կապերի և լրատվության բաժնի մասնագետ

Նունե Միրիբյանը

Գավառի պետական համալսարանի ուսանողները մասնակցեցին Երևանի պետական համալսարանի ուսանողական գիտական ընկերության կողմից կազմակերպված միջազգային երիտասարդական 10-րդ գիտաժողովին՝ նվիրված ԵՊՀ հիմնադրման 105-ամյակին։

Հոբելյանական գիտաժողովին ԳՊՀ ուսանողները հանդես եկան զեկուցումներով՝ հետևյալ թեմաներով․

1. Արմինե Ասլանյան՝ Հումանիտար մասնագիտությունների ֆակուլտետի առկա ուսուցման «Պատմություն» մասնագիտության 3-րդ կուրսի ուսանողուհի, թեմա՝«Գավառ քաղաքի անվան շուրջ», գիտական ղեկավար՝ պատմական գիտությունների թեկնածու Քանաքարա Հայրապետյան,
2. Ռեգինա Բաղդասարյան՝ Հումանիտար մասնագիտությունների ֆակուլտետի «Պատմություն» մասնագիտության մագիստրատուրայի 1-ին կուրսի ուսանողուհի, թեմա՝«Լճափցիների մասնակցությունը Հայրենական մեծ պատերազմին», գիտական ղեկավար՝ պատմական գիտությունների թեկնածու Աշխունջ Պողոսյան,
3. Լաուրա Մանուկյան՝ Հումանիտար մասնագիտությունների ֆակուլտետի առկա ուսուցման «Հայոց լեզու և գրականության» մասնագիտության 4-րդ կուրսի ուսանողուհի, թեմա՝«Քեյս մեթոդը որպես հանրակրթական դպրոցներում բայական անդամի խնդիր լրացումների ուսումնասիրման արդյունավետ միջոց», գիտական ղեկավար՝ ԳՊՀ դասախոս Ռուզաննա Սարգսյան,
4. Քրիստինե Բատիկյան՝ Հումանիտար մասնագիտությունների ֆակուլտետի «Հայոց լեզու և գրականություն» մասնագիտության 4-րդ կուրսի ուսանողուհի, թեմա՝«Մեդիատեխնոլոգինաերի կիրառումը ՆՈՒՀ-ում և տարրական դպրոցում», գիտական ղեկավար՝ ԳՊՀ դասախոս Սիրանուշ Խանդանյան։

Գիտաժողովի ավարտին մասնակիցներին հանձնվեցին հավաստագրեր։

Գավառի պետական համալսարանի սիրելի՛ ուսանողներ, հարգելի՛ դասախոսներ,  հրավիրում ենք ձեզ ներկա գտնվելու «Տնտեսագետների ակումբ»-ի կողմից կազմակերպված ինտելեկտուալ խաղ-մրցույթին, որը կկայանա ս․ թ․ հոկտեմբերի   17-ին, ժամը՝ 13։10-ին, Հրաչյա Աճառյանի անվան լսարանում (ԳՊՀ կենտրոնական մասնաշենքի 3-րդ հարկ)։

Սիրով սպասում ենք ձեզ։

Գավառի պետական համալսարանի ուսանողներին տարիներ շարունակ նյութական և բարոյական աջակցություն է ցուցաբերել բուհի պատվավոր բարերար, երջանկահիշատակ Ժիրայր Նիշանյանը, ում մարդասիրական առաքելությունը այժմ շարունակում են նրա տիկինն ու որդին՝ Անահիտ և Թագվոր Նիշանյանները։

Ս. թ. հոկտեմբերի 9-ին Գավառի պետական համալսարան այցելեցին Հայ օգնության ֆոնդի Հայաստանի մասնաճյուղի փոխտնօրեն, գիտական և կրթական ծրագրերի ղեկավար Էդուարդ Կարապետյանը, գիտական և կրթական ծրագրերի ղեկավարի օգնական Աննա Չիֆլիկյանը՝ Ժիրայր Նիշանյանի անվան կրթաշնորհառուների հետ հանդիպելու նպատակով։

Հանդիպմանը ներկա էր ԳՊՀ ռեկտոր Ռուզաննա Հակոբյանը, ով խորին երախտագիտություն հայտնեց Նիշանյան ընտանիքին՝ ուսանողներին մշտապես աջակցելու համար։

Պարոն Կարապետյանը ամփոփեց ուսանողների նախորդ ուսումնական տարվա արդյունքները, «Ժիրայր Նիշանյան հիմնադրամի կրթավճար» ծրագրում ընդգրկված առաջին կուրսի ուսանողներին ներկայացրեց բարերար Ժիրայր Նիշանյանի կենսագրությունը, կարևորեց ուսանողների բարձր առաջադիմությունը և կամավորական տարբեր ծրագրերին նրանց մասնակցությունը։

Գավառի պետական համալսարանի սիրելի՛ ուսանողներ, հարգելի՛ դասախոսներ, ՀՀ Գեղարքունիքի մարզի դպրոցների բարձր դասարանների աշակերտներ և ուսուցիչներ, սիրով հրավիրում ենք ձեզ ծանոթանալու ԳՊՀ միջազգային ծրագրերին, եվրոպական բուհերում ուսումնառած և դասավանդած ԳՊՀ ուսանողների և դասախոսների հաշվետվությունների ներկայացմանը և փորձի փոխանակմանը` ս․ թ․ հոկտեմբերի 18-ին և 19-ին-ին, ժամը՝ 13։00-ին:

Անցկացման վայրը՝ Գավառի պետական համալսարանի կենտրոնական մասնաշենքի 3-րդ հարկ, Հրաչյա Աճառյանի անվան լսարան։

Սիրով սպասում ենք ձեզ։

ԳՊՀ արտաքին կապերի և լրատվության բաժին