Գավառի պետական համալսարանը հյուրընկալեց Լեհաստանի Վարմիա-Մազուրի և Պոզնանի համալսարանների դասախոս, պրոֆեսոր Մարեկ Սոկոլովսկուն, ով հանդես եկավ բաց դասախոսությամբ՝ նվիրված երիտասարդական մշակույթին և ենթամշակութային շերտերին, սոցիալական ցանցերում ձևավորված հաղորդակցության նորմերին, դեռահասների սոցիալականացման արդի խնդիրներին։
Բանախոսն անդրադարձավ արհեստական բանականության գործիքներին, մշակութային իրողությունների վրա դրանց դրական և բացասական ազդեցությանը, ընձեռած հնարավորություններին ու վտանգներին։
Մարեկ Սոկոլովսկին ԳՊՀ գրադարանին նվիրեց ‹‹Հարգանքի տուրք Սերգեյ Փարաջանովին. ծննդյան հարյուրամյակի առթիվ›› հոդվածների ժողովածուն, որը բովանդակում է հայ և լեհ հեղինակների ուսումնասիրությունները ականավոր կինոռեժիսորի մասին։
Համալսարանի ռեկտոր Ռուզաննա Հակոբյանը շնորհակալություն հայտնեց և շնորհավորեց պրոֆեսոր Սոկոլովսկուն՝ նրա նախաձեռնությամբ և խմբագրությամբ ժողովածուի լույսընծայման առթիվ, նշելով, որ ժողովածուի շնորհանդեսը կայացել է ս․ թ․ սեպտեմբերի 12-ին, ՀՀ գիտությունների ազգային ակադեմիայում կազմակերպված «Սերգեյ Փարաջանով-100» խորագրով եռօրյա միջազգային գիտաժողովի ընթացքում և գնահատվել որպես ներդրում փարաջանովագիտության մեջ։