ԳՊՀ-ում տեղի ունեցավ ‹‹Բաց դռների›› օր՝ «Ճանաչի՛ր Գավառի պետական համալսարանը» խորագրով, նվիրված բարձր դասարանների աշակերտների մասնագիտական կողմնորոշմանը։ Համալսարան այցելեցին աշակերտներ և ուսուցիչներ՝ Գավառի ակադեմիկոս Ա. Թամամշևի անվան պետական գյուղատնտեսական քոլեջից, Գավառի Պ. Ղանդիլյանի անվան թիվ 2 միջնակարգ դպրոցից, Կարմիրգյուղի թիվ 1 միջնակարգ դպրոցից, Սարուխանի Մ․ Խոստեղյանի անվան թիվ 2 միջնակարգ դպրոցից, Գանձակի թիվ 2 միջնակարգ դպրոցից, Նորատուսի Ա. Սողոմոնյանի անվան թիվ 2 միջնակարգ դպրոցից։ ԳՊՀ մասնագիտությունները ներկայացրին «Տնտեսագիտություն» բաժնի ուսանողուհիներ Սոնա Հարությունյանն ու Արմինե Սաֆոյանը, «Ֆինանսներ» բաժնի ուսանող Մանվել Գևորգյանը, «Անգլերեն լեզու և գրականություն» բաժնի ուսանողուհի Արուսյակ Սմբաթյանը։ Նրանք անդրադարձան իրենց ընտրած մասնագիտությունների կարևորությանն ու առանձնահատկություններին, խոսեցին ուսանողական հետաքրքիր և հագեցած առօրյայի մասին։ ԳՊՀ ուսանողական խորհրդի նախագահ Լաուրա Մանուկյանը և ուսանողական գիտական ընկերության նախագահ Մերի Փուրթոյանը ներկայացրին բուհի ուսանողական ինքնակառավարման մարմինների ակտիվ գործունեությունը, սովորողների և դասախոսների մասնակցությունը ԳՊՀ իրականացրած միջազգային ակադեմիական շարժունության ծրագրերին։
Միջազգային շարժունության ծրագրի մասնակից Արմինե Սաֆոյանն ու Արուսյակ Սմբաթյանը ներկայացրին եվրոպական բուհերում ուսումնառության իրենց փորձը, կիսվեցին տարբեր երկրներ շրջագայություններից ստացած իրենց տպավորություններով, աշակերտներին հորդորելով տիրապետել օտար լեզուների և հետագայում մասնակցել միջազգային ծրագրերին։
Իրենց գեղեցիկ կատարումներով ներկաներին ողջունեցին ԳՊՀ ուսանողուհիներ Գոհար Ավետիսյանը, Սառա Յազերյանը, Մելինե Քոչարյանը։
ԳՊՀ պրոռեկտոր Նելլի Կուտուզյանը ներկայացրեց բուհում ուսումնական գործընթացի կազմակերպման սկզբունքները, կրթական հնարավորությունները, միջազգային համագործակցության և սոցիալական աջակցության ծրագրերը, ինչպես նաև անդրադարձավ 2025-2026 ուսումնական տարվա ընդունելության քննություններին։
Միջոցառումն ամփոփեցին ԳՊՀ դեկաններ Մարտին Ավագյանը և Թաթուլ Ասոյանը, ամբիոնների վարիչներ Համլետ Ղաջոյանը, Սամվել Ամիրխանյանը և Վարազդատ Ավետիսյանը՝ աշակերտներին կոչ անելով լավ սովորել, կատարել ճիշտ մասնագիտական ընտրություն և դառնալ որակյալ մասնագետ։