Գավառի պետական համալսարանի բնագիտատնտեսագիտական ֆակուլտետի «Սերվիս» բաժնի ուսանողներն իրենց դասախոսի՝ աշխարհագրական գիտությունների դոկտոր, պրոֆեսոր Արամայիս Ավագյանի նախաձեռնությամբ կազմակերպեցին ցերեկույթ՝ «Սեր առ հայրենիք և սերվիս» խորագրով։
Միջոցառման ընթացքում ուսանողները հանդես եկան գեղեցիկ երաժշտական և պարային կատարումներով, բովանդակալից շնորհանդեսի միջոցով ներկայացրին սերվիսի նշանակությունը, զբոսաշրջության տեսակները, դրանց զարգացման հեռանկարները Հայաստանի Հանրապետությունում, ինչպես նաև ներկայացրին առաջարկություններ՝ տուրիզմի ոլորտը Գեղարքունիքի մարզում զարգացնելու և առկա ռեսուրսներն արդյունավետ օգտագործելու վերաբերյալ։
ԳՊՀ ռեկտոր Ռուզաննա Հակոբյանը և պրոֆեսորադասախոսական անձնակազմի անդամները շնորհակալություն հայտնեցին պարոն Ավագյանին և ուսանողներին՝ կարևորելով մասնագիտական ոլորտում նվիրյալ աշխատանքով հայրենիքը շենացնելու հրամայականը։