Author: Nune Miribyan

Այսօր կլրանար Գավառի պետական համալսարանի հիմնադիր ռեկտոր, փիլիսոփայական գիտությունների դոկտոր, պրոֆեսոր, Հայաստանի Հանրապետության վաստակավոր մանկավարժ, Գավառի պատվավոր քաղաքացի Հրանտ Խաչատուրի Հակոբյանի ծննդյան 98-ամյակը։

Հրանտ Հակոբյանը ծնվել է 1927 թվականի դեկտեմբերի 17-ին Նոր Բայազետի շրջանի Սարուխան գյուղում՝ արհեստավորի ընտանիքում։ 1944 թվականին գերազանց առաջադիմությամբ ավարտել է հայրենի գյուղի միջնակարգ դպրոցը, այնուհետև աշխատել կոլտնտեսությունում։ 1946–1948 թվականներին սովորել և ավարտել է Կամոյի մանկավարժական տեխնիկումը, ապա կրթությունը շարունակել Երևանի Խաչատուր Աբովյանի անվան պետական մանկավարժական ինստիտուտի պատմության ֆակուլտետում՝ իր բացառիկ ընդունակությունների շնորհիվ այն ավարտելով սեղմ ժամկետում` 2 տարում, գերազանց առաջադիմությամբ։

1950–1954 թվականներին աշխատել է որպես ուսուցիչ և ուսմասվար Գեղարքունիքի մի շարք դպրոցներում։ Զուգահեռաբար երկրորդ բարձրագույն կրթությունն է ստացել բանասիրության գծով, իսկ հետագայում ավարտել է Երևանի պետական համալսարանի ասպիրանտուրան՝ փիլիսոփայություն մասնագիտությամբ։

1956–1962 թվականներին ղեկավարել է Սարուխանի միջնակարգ դպրոցը՝ այն դարձնելով շրջանի առաջատար կրթօջախներից մեկը։ 1964 թվականից մինչև 1985 թվականը աշխատել է Երևանի պոլիտեխնիկական ինստիտուտում՝ զբաղեցնելով ավագ դասախոսի, դոցենտի, ապա ամբիոնի վարիչի տեղակալի պաշտոնները։ 1973 թվականին պաշտպանել է թեկնածուական, իսկ 1990 թվականին՝ դոկտորական ատենախոսություն՝ արժանանալով փիլիսոփայական գիտությունների դոկտորի գիտական աստիճանի և պրոֆեսորի կոչման։

1985 թվականից ղեկավարել է Երևանի պետական համալսարանի միջբուհական ամբիոնը, որի գործունեության շրջանակում նրա նախաձեռնությամբ աթեիզմի տեսության փոխարեն բուհերում սկսվել է «Կրոնների պատմություն և տեսություն» առարկայի դասավանդումը։ Նա կարևոր դեր է ունեցել ԵՊՀ աստվածաբանության ֆակուլտետի հիմնադրման գործում՝ շուրջ մեկ տասնամյակ ղեկավարելով Կրոնագիտության ամբիոնը։

Հրանտ Հակոբյանի կյանքի մեծագույն գործը Գավառում բարձրագույն ուսումնական հաստատության հիմնադրումն էր։ Նրա և դստեր՝ Հրանուշ Հակոբյանի ջանքերով և ՀՀ կառավարության 1993 թվականի մայիսի 5-ի որոշմամբ հիմնադրվեց Գավառի պետական համալսարանը։  Հրանտ Հակոբյանը իր գիտամանկավարժական ու կազմակերպչական ներուժը ներդրեց համալսարանի կայացման և զարգացման գործում։

Պրոֆեսոր Հակոբյանը պարգևատրվել է բազմաթիվ պետական ու միջազգային մրցանակներով և մեդալներով, արժանացել ՀՀ վաստակավոր մանկավարժի կոչման, ճանաչվել Քեմբրիջի միջազգային կենսագրությունների կենտրոնի կողմից որպես «XXI դարի նշանավոր մտավորականներից» մեկը։ Նա հեղինակ է տասնյակ մենագրությունների, ավելի քան հարյուր գիտական և հրապարակախոսական հոդվածների։

2011 թվականից Հրանտ Խաչատուրի Հակոբյանն ավարտեց իր երկրային ուղին՝ շարունակելով ապրել իր գործերով, մարդկանց հիշողության, հոգու և սրտի մեջ։

Հրանտ Խաչատուրի Հակոբյանը հավերժի ճամփորդ է։

2025 թվականին լրացավ Հրանտ Մաթևոսյանի ծննդյան 90-րդ տարեդարձը։ Հրանտ Մաթևոսյանը հայ գրականության այն նշանավոր դեմքերից է, որի գործերը ճշմարիտ ու արդիական են այսօր, վաղը և միշտ։ Նրա արձակը ոչ միայն պատմություն է գյուղի, բնության, մարդու և նրա պայքարի մասին, այլև հայի ազգային նկարագիր։ Մաթևոսյանը խոսում է այնպես, ինչպես մտածում է ժողովուրդը։ Նա կարողացել է ազնիվ ու տպավորիչ խոսքով, խորը ցավով, զգացական պատկերներով ներկայացնել հայ մարդու ներաշխարհը և այն դարձնել համամարդկային արժեք, իսկ պարզ մարդկանց խոհերը՝ կենսափիլիսոփայական եզրակացություն։

Ս․ թ․ դեկտեմբերի 10-ին Գավառի համայնքային գրադարանում կայացավ գրական ցերեկույթ` նվիրված Հրանտ Մաթևոսյանի ծննդյան 90-րդ ամյակին։ Գրադարանի հյուրեր էին Գավառի պետական համալսարանի ռեկտոր Ռուզաննա Հակոբյանը, բանասիրական գիտությունների դոկտոր, պրոֆեսոր, ԳՊՀ հումանիտար մասնագիտությունների ֆակուլտետի հայոց լեզվի և գրականության ամբիոնի վարիչ Վաչագան Գրիգորյանը, բանասիրական գիտությունների թեկնածու, դոցենտ, ԳՊՀ հումանիտար մասնագիտությունների ֆակուլտետի դեկան Թաթուլ Ասոյանը, փիլիսոփայական գիտությունների թեկնածու, ԳՊՀ հումանիտար մասնագիտությունների ֆակուլտետի հասարակական գիտությունների ամբիոնի վարիչ Համլետ Ղաջոյանը։

Գրական ցերեկույթին մասնակցում էին Գավառի կրթամշակութային հաստատությունների աշխատակիցներ, գրադարանավարներ, ուսուցիչներ և աշակերտներ Գավառի ավագ դպրոցից, Գանձակի թիվ 1 դպրոցից, Գեղարքունիքի միջնակարգ դպրոցից։ Ցերեկույթի առաջին մասում գրադարանավարները ներկայացրին Հրանտ Մաթևոսյանի կյանքն ու գրական գործունեությունը։ Երկրորդ մասում գրադարանի մատենագետ Նորա Մարեմկոյանը բանասիրական գիտությունների դոկտոր, պրոֆեսոր, 2013 թվականին «Հրանտ Մաթևոսյան» մրցանակին արժանացած, ութ տասնյակ

մենագրությունների և գիտական աշխատությունների հեղինակ Վաչագան Գրիգորյանին հրավիրեց զրույցի՝ Մաթևոսյանի կյանքի ու գրական գործունեության շուրջ։ Մաթևոսյանագետ պրոֆեսորը անդրադարձավ Հրանտ Մաթևոսյանի գրական մուտքին և գործունեությանը, պատասխանեց նաև աշակերտների և ուսանողների հարցերին։ Գավառի պետական համալսարանի ռեկտոր Ռուզաննա Հակոբյանը կարևորեց Հրանտ Մաթևոսյանի գրական, հրապարակախոսական, հասարակական-քաղաքական գործունեությունը, ինչպես նաև անդրադարձավ Վաչագան Գրիգորյան մարդուն, գրականագետին և դասախոսին. «Հաջողում են այն գրողները, որոնք իսկապես ազնիվ են, ազնիվ են իրենք իրենց հետ, իրենց ընթերցողի հետ, աշխարհի ու մարդու հետ։ Ազնիվ է Հրանտ Մաթևոսյանը, ազնիվ է նաև Մաթևոսյանի գրական ժառանգությունը շերտ առ շերտ պեղող և խորքերը բացահայտող Վաչագան Գրիգորյանը։

… Եկեք մի լավաշի չափ օգուտ տանք այս աշխարհին»,-իր ելույթը մաթևոսյանական պատգամով ամփոփեց տիկին Հակոբյանը։

Պրոֆեսոր Գրիգորյանին շնորհակալության և գնահատանքի խոսքեր ասացին Գավառի պետական համալսարանի շրջանավարտներ՝ Գավառի մանկապատանեկան ստեղծագործական կենտրոնի փոխտնօրեն Ռուզաննա Վարդանյանը, Գանձակի թիվ 1 միջնակարգ դպրոցի ուսուցչուհի Մանուշակ Կուտուզյանը, գրադարանի տնօրենի ժամանակավոր պաշտոնակատար Լուսինե Շահինյանը՝ զուգահեռաբար անդրադառնալով Հրանտ Մաթևոսյան համաշխարհային մեծության գրողին։ Ցերեկույթին առանձնակի հմայք հաղորդեցին Գեղարքունիքի միջնակարգ դպրոցի աշակերտները` «Աշնան արև» բեմականացման մի դրվագով (ուսուցչուհի՝ Խանում Խաչատրյան), Գավառի արվեստի դպրոցի դասատու Գրիգոր Բալագոզյանը, Գավառի երաժշտական դպրոցի սան Հայրապետ Հայրապետյանը,երիտասարդ դերասանուհի Անուշ Զանգեզորյանը։ Միջոցառման ավարտին գրադարանի տնօրենի ժամանակավոր պաշտոնակատար Լուսինե Շահինյանը, շնորհակալություն հայտնելով մասնակցության ու համագործակցության համար Գավառի պետական համալսարանին` ի դեմս ռեկտոր տիկին Հակոբյանի, դպրոցների տնօրեններին, ասաց. «Թող Հրանտ Մաթևոսյանի 90-

ամյակը դառնա առիթ՝ կրկին բացելու նրա գրքերը ու նորովի զգալու այն Հայաստանը, որ նա կարողացավ ամրագրել իր անհատույց սիրով ու անզիջում խոսքով։ Հրանտ Մաթևոսյանը շարունակում է ապրել ու ապրեցնել մեզ»։

 

Տեղեկատվության աղբյուրը՝ Գավառի քաղաքային գրադարան․ https://www.facebook.com/gavarigradaran

Գավառի պետական համալսարանի ուսանողական գիտական ընկերության նախաձեռնությամբ հումանիտար մասնագիտությունների ֆակուլտետում տեղի ունեցավ ուսանողական գիտաժողով՝ նվիրված հայ մեծանուն գրող-արձակագիր Հրանտ Մաթևոսյանի ծննդյան 90-ամյակին։

Գիտաժողովին բացման խոսքով հանդես եկավ ԳՊՀ հումանիտար մասնագիտությունների ֆակուլտետի ուսանողական գիտական ընկերության նախագահ Քրիստինե Բատիկյանը։ Ողջունելով ներկաներին՝ բանասիրական գիտությունների դոկտոր, պրոֆեսոր, ԳՊՀ հայոց լեզվի և գրականության ամբիոնի վարիչ, մաթևոսյանագետ Վաչագան Գրիգորյանը շնորհակալություն հայտնեց գիտաժողովի մասնակից ուսանողներին՝ Հրանտ Մաթևոսյանի ստեղծագործական ժառանգությունը բազմակողմանիորեն ուսումնասիրելու համար։

Գիտաժողովին մասնակցեցին և Հրանտ Մաթևոսյանի խորն ու բազմաշերտ ասելիքի, ստեղծած գեղարվեստական աշխարհի առանձնահատկությունների և կերտած կերպարների մասին խոսեցին ԳՊՀ ռեկտոր Ռուզաննա Հակոբյանը, Հումանիտար մասնագիտությունների ֆակուլտետի դեկան Թաթուլ Ասոյանը, Հասարակական գիտությունների ամբիոնի վարիչ Համլետ Ղաջոյանը, Օտար լեզվի և գրականության ամբիոնի վարիչ Գայանե Միրիբյանը, Հայոց լեզվի և գրականության ամբիոնի դասախոս Սիրանուշ Խանդանյանը։

Գիտաժողովին ուսանողները հանդես եկան զեկուցումներով՝ հետևյալ թեմաներով․

1. Սոֆի Մինասյան՝ «Անգլերեն լեզու և գրականություն» բաժնի բակալավրիատի 2-րդ կուրսի ուսանողուհի, թեմա՝ «Հայը Հրանտ Մաթևոսյանի «Մեծամոր» էսսեում», գիտական ղեկավար՝ բանասիրական գիտությունների դոկտոր, պրոֆեսոր Վաչագան Գրիգորյան,

2. Սոնա Հովեյան՝ «Անգլերեն լեզու և գրականություն» բաժնի բակալավրիատի 2-րդ կուրսի ուսանողուհի, թեմա՝ «Դեռահասի հոգեբանությունը Հրանտ Մաթևոսյանի «Վազքը» պատմվածքում», գիտական ղեկավար՝ բանասիրական գիտությունների դոկտոր, պրոֆեսոր Վաչագան Գրիգորյան,

3. Նարինե Ժամհարյան՝ «Պատմություն» բաժնի մագիստրատուրայի 2-րդ կուրսի ուսանողուհի, թեմա՝ «Քրիստոնեական արժեհամակարգը որպես հայրենասիրության և բարոյականության դաստիարակման միջոց», գիտական ղեկավար՝ պատմական գիտությունների թեկնածու Քանաքարա Հայրապետյան,

4. Աիդա Կարապետյան՝ «Անգլերեն լեզու և գրականություն» բաժնի մագիստրատուրայի 1-ին կուրսի ուսանողուհի, թեմա՝ «Content and language integrated learning in teaching EFL in Armenian universities», գիտական ղեկավար՝ ԳՊՀ դասախոս Ռուզաննա Սարգսյան,

5. Քրիստինե Բատիկյան՝ «Հայոց լեզու և գրականություն» բաժնի մագիստրատուրայի 1-ին կուրսի ուսանողուհի, թեմա՝ «Ուսուցման ժամանակակից մեթոդների համեմատական բնութագիրը», գիտական ղեկավար՝ ԳՊՀ դասախոս Ռուզաննա Սարգսյան,

6. Աննա Լազարյան՝ «Հայոց լեզու և գրականություն» մասնագիտության 4-րդ կուրսի ուսանողուհի, թեմա՝ «Արցախյան ավանդազրույցների հիմնական առանձնահատկությունները», գիտական ղեկավար՝ բանասիրական գիտությունների թեկնածու Լուսինե Ղռեջյան։

Զեկուցումներն ուղեկցվեցին հետաքրքիր և ուսուցողական քննարկումներով։

Գիտաժողովի ավարտին մասնակիցները ստացան հավաստագրեր:

Գավառի պետական համալսարանի որակի ապահովման բաժնի վարիչ, պատմական գիտությունների թեկնածու, հասարակական գիտությունների ամբիոնի դասախոս Քանաքարա Հայրապետյանը մասնակցեց Երևանի պետական համալսարանի պատմության ֆակուլտետի նախաձեռնությամբ կազմակերպված «Պատմության դասավանդման տեսական և մեթոդաբանական հարցեր» խորագրով միջազգային գիտաժողովին: Գիտաժողովի նպատակն էր քննարկել բարձրագույն կրթության համակարգում պատմության և հարակից հումանիտար գիտակարգերի դասավանդման արդի տեսական և մեթոդաբանական հիմնախնդիրները:

Գիտաժողովին մասնակցում էին ՀՀ ակադեմիական, հանրակրթական, ԿԳՄՍ նախարարության ենթակա կառույցների ներկայացուցիչներ, ինչպես նաև արտերկրից ժամանած պրոֆեսորներ ու փորձագետներ, ինչն ընդգծում էր միջոցառման միջազգային և միջգիտակարգային բնույթը։ Քանաքարա Հայրապետյանը մասնակցեց «Համաշխարհային պատմություն» խորագրով 4-րդ նիստին՝ հանդես գալով որպես զեկուցող և նիստավար՝ պատմական գիտությունների թեկնածու, «Այբ» դպրոցի ուսուցչուհի Լիլիթ Մինասյանի հետ համատեղ։ Ք․ Հայրապետյանը հանդես եկավ «Ստեղծարար մտածողությունը՝ պատմական մտածողության նախապայման» թեմայով զեկուցմամբ, որում կարևորեց պատմական մտածողության ձևավորման գործընթացում ստեղծարար և քննադատական մտածողության՝ որպես պատմության արդյունավետ դասավանդման հիմնարար գործոնի դերը: Տիկին Հայրապետյանը նշեց, որ պատմության ուսուցումը պետք է դիտարկել ոչ միայն փաստական գիտելիքների փոխանցման, այլև սովորողի վերլուծական, համադրական և ստեղծարար կարողությունների զարգացման համատեքստում: Գիտաժողովը՝ որպես լավագույն փորձի փոխանակման և պատմագիտական արդի մոտեցումների ներկայացման հարթակ, հնարավորություն տվեց կառուցողական քննարկումների միջոցով բազմակողմանիորեն դիտարկել պատմության դասավանդման բովանդակային և մեթոդաբանական խնդիրները, վերանայել ուսուցման մեթոդներն ու մոտեցումները։

ՀՀ կրթության, գիտության, մշակույթի և սպորտի նախարարի 2025թ. դեկտեմբերի 11-ի հրամանի համաձայն՝ Գավառի պետական համալսարանի 5 լավագույն ուսանողներից 3-ը ճանաչվել են «Հայաստանի Հանրապետության լավագույն ուսանող-2025» մրցույթի հաղթող։ Ջերմորեն շնորհավորում ենք «ՀՀ լավագույն ուսանող» տիտղոսին արժանացած ԳՊՀ ուսանողներին՝
Բնագիտատնտեսագիտական ֆակուլտետի «Համակարգչային ճարտարագիտություն» բաժնի մագիստրատուրայի 2-րդ կուրսի ուսանողուհի Լիաննա Արմենի Հայրապետյանին, ով բնագիտական ոլորտում մագիստրոսի կրթական ծրագրով զբաղեցրել է 2-րդ տեղը,
Հումանիտար մասնագիտությունների ֆակուլտետի «Պատմություն» բաժնի բակալավրիատի 4-րդ կուրսի ուսանողուհի Արմինե Արմենի Ասլանյանին, ով հումանիտար գիտությունների ոլորտում բակալավրի կրթական ծրագրով զբաղեցրել է 2-րդ տեղը և
Հումանիտար մասնագիտությունների ֆակուլտետի «Պատմություն» բաժնի մագիստրատուրայի 2-րդ կուրսի ուսանողուհի Ռեգինա Խաչիկի Բաղդասարյանին, ով հումանիտար գիտությունների ոլորտում մագիստրոսի կրթական ծրագրով արժանացել է 2-րդ տեղին։
ԳՊՀ ռեկտորատը շնորհակալություն է հայտնում մրցույթի 1-ին և 2-րդ փուլերում հաղթող ճանաչված բոլոր ուսանողներին՝ բարձր առաջադիմության, գիտահետազոտական գործունեության նկատմամբ ընդգծված հետաքրքրության և հասարակական ակտիվության համար՝ մաղթելով հետագա հաջողություններ։
Միաժամանակ, շնորհակալություն ենք հայտնում Գավառի պետական համալսարանի բոլոր դասախոսներին և աշխատակիցներին, որոնք նպաստել են ԳՊՀ ուսանողների հաղթանակին։

ԳՊՀ ռեկտորատ

Գավառի պետական համալսարանի սիրելի՛ ուսանողներ, վարչական և ակադեմիական անձնակազմի հարգելի՛ անդամներ, արդի գիտական եւ կիրառական հիմնահարցերով հետաքրքրված մասնագետներ, տեղեկացնում ենք, որ Գավառի պետական համալսարանի հումանիտար մասնագիտությունների ֆակուլտետի «Հայոց լեզու և գրականություն», «Անգլերեն լեզու և գրականություն», «Պատմություն», «Տարրական մանկավարժություն և մեթոդիկա», «Իրավագիտություն» մասնագիտություններիմագիստրատուրայի 2-րդ կուրսերի ուսանողների կողմից իրականացված գիտահետազոտական աշխատանքների արդյունքները կներկայացվեն ուսանողական գիտաժողովների շրջանակում՝ հետևյալ ժամանակացույցով․

Հ/հ	Մասնագիտություն	Անցկացման օրը, ժամը	Անցկացման վայրը
1․	«Հայոց լեզու և գրականություն»,«Անգլերեն լեզու և գրականություն»	17․12․2025թ․, ժամը՝ 12։00	ԳՊՀ հումանիտար մասնագիտությունների ֆակուլտետ, 3-րդ հարկ, 301 լսարան
2․	«Պատմություն», «Տարրական մանկավարժություն և մեթոդիկա»	19․12․2025թ․, ժամը՝ 12։00	ԳՊՀ հումանիտար մասնագիտությունների ֆակուլտետ, 3-րդ հարկ, 301 լսարան
3․	«Իրավագիտություն»	20․12․2025թ․, 21․12․2025թ․, ժամը՝ 12։00	ԳՊՀ գլխավոր մասնաշենք, ակադեմիական խորհրդի նիստերի դահլիճ

Սիրով հրավիրում ենք ձեզ՝ մասնակցելու ուսանողական գիտաժողովներին։

Գավառի պետական համալսարանի դասախոսներն ակտիվորեն մասնակցում են  տարբեր միջազգային ծրագրերի՝ լավագույնս ներկայացնելով համալսարանը և ձեռք բերած առաջավոր փորձը ծառայեցնելով  կրթական, գիտահետազոտական նպատակների։ Ս․ թ․ դեկտեմբեր ամսվա ընթացքում ԳՊՀ կենսաբանության, էկոլոգիայի և առողջ ապրելակերպի ամբիոնի դասախոս Լալա Մկրտչյանը Լեհաստանի Վարշավա քաղաքում մասնակցեց «Interlab+ Toolbox for Intercultural Cooperation» ծրագրին, իսկ Գերմանիայի  Բոնն քաղաքում՝ «YOCOMO Lab» ծրագրին։ Նշված միջազգային ծրագրերի հիմնական նպատակը վերապատրաստման դասընթացների միջոցով միջմշակութային իրազեկվածության բարձրացումն է և միջազգային աշխատանքային խմբերում արդյունավետ համագործակցության համար անհրաժեշտ հմտությունների զարգացումը։

Վերապատրաստման ընթացքում մասնակիցները ներկայացրին իրենց փորձը, բացահայտեցին արդյունավետ հաղորդակցության տարբեր մեթոդներ, ընդլայնեցին գիտելիքները և ձեռք բերեցին նոր գործընկերներ։

Դասընթացի ավարտին Լալա Մկրտչյանը ստացավ մասնակցության վկայական և «YOUTHPASS» հավաստագիր։

 

Գավառի պետական համալսարանի ուսանողները մասնակցեցին Վ. Բրյուսովի անվան պետական համալսարանի ուսանողական գիտական ընկերության կողմից համալսարանի 90-ամյակին նվիրված միջոցառումների շրջանակում կազմակերպված «Կրթությունը և հետազոտությունը. նոր հորիզոններ» խորագրով ուսանողական միջազգային գիտաժողովին և հանդես եկան զեկուցումներով՝ հետևյալ թեմաներով․

1. Արմինե Ասլանյան՝ ԳՊՀ «Պատմություն» բաժնի 4-րդ կուրսի ուսանողուհի, թեմա՝ «Ամենայն Հայոց Կաթողիկոսի տեղեկալ Տ. Գևորգ արքեպիսկոպոս Չորեքչյանի՝ Իոսիֆ Ստալինի հետ հանդիպման շուրջ», գիտական ղեկավար՝ պատմական գիտությունների թեկնածու Քանաքարա Հայրապետյան,

2. Լենա Խաչատրյան՝ ԳՊՀ «Պատմություն» բաժնի 4-րդ կուրսի ուսանողուհի, թեմա՝ «Շահ Աբասի քաղաքականությունը Կովկասում», գիտական ղեկավար՝ Քանաքարա Հայրապետյան,

3. Աննա Ասլանյան՝ ԳՊՀ «Հայոց լեզու և գրականություն» բաժնի մագիստրատուրայի 1-ին կուրսի ուսանողուհի, թեմա՝ ««Հեթանոսական շարժումը» հայ գրականության մեջ», գիտական ղեկավար՝ բանասիրական գիտությունների դոկտոր, պրոֆեսոր, ԳՊՀ հայոց լեզվի և գրականության ամբիոնի վարիչ Վաչագան Գրիգորյան,

4. Լաուրա Մանուկյան՝ ԳՊՀ «Հայոց լեզու և գրականություն» բաժնի մագիստրատուրայի 1-ին կուրսի ուսանողուհի, թեմա՝ «Նորարական մեթոդները որպես սովորողների մոտիվացիայի բարձրացման արդյունավետ միջոց», գիտական ղեկավար՝ ԳՊՀ դասախոս Ռուզաննա Սարգսյան,

5. Քրիստինե Բատիկյան՝ ԳՊՀ «Հայոց լեզու և գրականություն» բաժնի մագիստրատուրայի 1-ին կուրսի ուսանողուհի, թեմա՝ «Հավատալիքային և պաշտամունքային տարրերը հանելուկներում», գիտական ղեկավար՝ բանասիրական գիտությունների թեկնածու Լուսինե Ղռեջյան,

6. Մանվել Գևորգյան՝ «Ֆինանսներ» բաժնի 3-րդ կուրսի ուսանող, թեմա՝ «Զբոսաշրջության զարգացման հիմնախնդիրները ՀՀ Գեղարքունիքի մարզում», գիտական ղեկավար՝ աշխարհագրական գիտությունների դոկտոր, պրոֆեսոր Արամայիս Ավագյան,

7. Նելլի Գրիգորյան՝ «Սերվիս» բաժնի 4-րդ կուրսի ուսանողուհի, թեմա՝ «Միջմշակութային հաղորդակցության դերը տուրիզմի զարգացման գործում», գիտական ղեկավար՝ աշխարհագրական գիտությունների դոկտոր, պրոֆեսոր Արամայիս Ավագյան:

Գիտաժողովի ավարտին մասնակիցները ստացան հավաստագրեր:

Գավառի պետական համալսարանի ուսումնագիտական գծով պրոռեկտոր Նելլի Կուտուզյանը, հաշվապահական հաշվառման ամբիոնի վարիչ Հակոբ Ղուլոյանը, նույն ամբիոնի դասախոս, ԳՊՀ գլխավոր հաշվապահ Գուրգեն Մուրադյանը, ԳՊՀ արտաքին կապերի և լրատվության բաժնի վարիչ Լիլիթ Թոռչյանը Պորտուգալիայի Պորտո քաղաքի Կաթոլիկ համալսարանում մասնակցեցին Եվրոպական միության ‹‹Erasmus+T-Green․ Հետբակալավրի կրթության փոխակերպումը հանուն կանաչ և կայուն ապագայի» ծրագրի աշխատաժողովին՝ նվիրված մագիստրոսական ծրագրերի իրականացման արդյունքների քննարկմանը։
Ծրագրի գործընկեր եվրոպական համալսարանների՝ Պորտուգալիայի, Լեհաստանի, Հունաստանի, Լիտվայի բուհերի պատվիրակները ներկայացրին իրենց երկրներում իրականացվող համատեղ, կրկնակի և բազմակի մագիստրոսական ծրագրերի իրավական կարգավորումները։
Հայաստանյան բուհերի աշխատակիցները ներկայացրին ԵՄ ծրագրի շրջանակում մշակված և փորձնական իրականացվող մագիստրոսական ծրագրերը, ինչպես նաև այն վերամասնագիտացված դասընթացները, որոնք ընդգրկված են հարակից մագիստրոսական կրթական ծրագրերում և ներառում են «կանաչ կրթությանը» վերաբերող թեմաներ:
Գավառի պետական համալսարանի ‹‹Կանաչ տնտեսություն և կայուն զարգացում›› մագիստրոսական կրթական ծրագիրը, ինպես նաև ‹‹Erasmus+T-Green›› ծրագրի շրջանակում վերամշակված «Նախագծի կառավարում», «Տնտեսագիտության փիլիսոփայություն», «Արտադրական բիզնեսի զարգացման միտումները», «Լոգիստիկա», «Կորպորատիվ ֆինանսական կառավարում», «Ֆինանսական մենեջմենթ», «Ֆինանսական վերլուծություն», «Ներդրումային նախագծերի գնահատում» դասընթացների հիմնական նպատակները, ծրագրում ունեցած այլ ձեռքբերումները ներկայացրեց ԳՊՀ արտաքին կապերի և լրատվության բաժնի վարիչ Լիլիթ Թոռչյանը։
Աշխատաժողովի ընթացքում ՀՀ բուհերի ներկայացուցիչները քննարկեցին համատեղ մագիստրոսական ծրագրերի հետագա իրականացմանը վերաբերող հարցեր։ ԳՊՀ ներկայացուցիչներն ակտիվորեն մասնակցեցին քննարկումներին, հանդես եկան կարևոր դիտարկումներով ու առաջարկություններով։

Հարգելի՛ դիմորդներ, տեղեկացնում ենք, որ ս․ թ․ դեկտեմբերի 15-ից մինչև դեկտեմբերի 25-ը՝ ժամը 18:00-ն, կիրականացվի դպրոցների 2025-2026 ուստարվա շրջանավարտների պետական ավարտական և 2026 թվականի բուհերի ընդունելության համար սահմանված միասնական քննությունների հայտագրման գործընթացը: Քննությունների I փուլը կկայանա 2026թ․ հունվար, փետրվար ամիսներին։ Պետական ավարտական քննություններին մասնակցելու համար շրջանավարտը մինչև ս․ թ․ դեկտեմբերի 10-ը գրավոր դիմում է իր ուսումնական հաստատության տնօրենին։ Ուսումնական հաստատության տնօրենը պետական ավարտական քննություններ հանձնողների ցուցակ-հայտերը մուտքագրում է Գնահատման և թեստավորման կենտրոնի app.dimord.am էլեկտրոնային կայքում 2025թ․ դեկտեմբերի 15-ից 30-ը։
Միասնական քննությանը մասնակցելու համար շրջանավարտը (դիմորդը) առցանց եղանակով Գնահատման և թեստավորման կենտրոնի dimord.am կայքէջում պետք է լրացնի ընդունելության դիմում-հայտ:
Շրջանավարտը (դիմորդը) առարկայական դիմում-հայտում լրացնում է առավելագույնը երկու միասնական քննություն։ Դիմում-հայտը լրացնելու համար շրջանավարտը դիմում է իր ուսումնական հաստատության տնօրենին, իսկ նախորդ տարիների և 2025-2026 ուստարվա նախնական և միջին մասնագիտական ուսումնական հաստատությունների շրջանավարտները, օտարերկրացիները, օտարերկրյա ուսումնական հաստատությունների՝ տվյալ ուսումնական տարվա շրջանավարտ Հայաստանի Հանրապետության քաղաքացիները դիմում են իրենց բնակության վայրի՝ այդ նպատակով առանձնացված ուսումնական հաստատության տնօրենին: Առանձնացված ուսումնական հաստատությունների ցանկը ներկայացված է այստեղ:
Ընդունելության դիմում-հայտը լրացնելու համար անհրաժեշտ է նաև՝
• 3×4 չափի լուսանկարի էլեկտրոնային տարբերակը,
• անձնագրի կամ ծննդյան վկայականի տվյալները,
• ՀՀ ֆինանսների նախարարությունում Գնահատման և թեստավորման կենտրոնի 900018003401 հաշվեհամարին յուրաքանչյուր քննության համար փոխանցված 4500 (չորս հազար հինգ հարյուր) դրամ վճարի անդորրագիրը։
Միասնական քննությունների վճարից ազատվում են`
• պարտադիր ժամկետային ծառայությունից զորացրված անձինք,
• 1-ին և 2-րդ խմբերի և մինչև 18 տարեկան մանկուց հաշմանդամները,
• ՀՀ պաշտպանության ժամանակ զոհված զինծառայողների երեխաները,
• առանց ծնողական խնամքի մնացած մինչև 23 տարեկան անձինք:
Վերոնշյալ խմբերին պատկանող անձինք դիմում-հայտին համապատասխանաբար կցում են զինվորական գրքույկի պատճենը, հաշմանդամության տեղեկանքի պատճենը, ՀՀ պաշտպանության նախարարության, ՀՀ ՆԳՆ ոստիկանության և ՀՀ ազգային անվտանգության ծառայության կողմից տրված տեղեկանքների պատճենները, ինչպես նաև առանց ծնողական խնամքի մնացած լինելու վերաբերյալ համապատասխան փաստաթղթերի պատճենները:
Բուհերի ընդունելության առաջին փուլի քննությունների դիմում-հայտերն ընդունվում են 2025թ․ դեկտեմբերի 15-ից մինչև դեկտեմբերի 25-ը՝ ժամը 18:00-ն:

Աղբյուր՝ dimord.am