Author: Nune Miribyan

‹‹ -Խնդրում եմ պատմել Ձեր մասին և ներկայացնել Ձեր հաջողության պատմությունը:

-Ես Ռոզա Վեզիրի Աբրահամյանն եմ, ծնվել եմ 2002 թվականի հունվարի 28-ին, Գեղարքունիքի մարզի Գանձակ գյուղում: Հաճախել եմ Գանձակի թիվ 1 միջնակարգ դպրոց: Սովորել եմ գերազանց առաջադիմությամբ: Դպրոցական տարիներին մասնակցել եմ մի շարք օլիմպիադաների, մրցույթների, փառատոնների, ունեմ 2 տասնյակից ավելի հավաստագրեր և պատվոգրեր:

2020 թվականին ավարտելով դպրոցը՝ հաջողությամբ ընդունվել եմ Գավառի պետական համալսարանի տնտեսագիտական ֆակուլտետի ‹‹Ֆինանսներ›› բաժնի առաջին կուրս: 2021 թվականին ընտրվել եմ ֆակուլտետի ուսանողական գիտական ընկերության, իսկ 2022 թվականին՝ ուսանողական խորհրդի նախագահ: Ակտիվորեն մասնակցել եմ ԳՊՀ ուսանողական ինքնակառավարման մարմինների աշխատանքներին: Մասնակցել եմ հանրապետական և միջազգային մի շարք գիտաժողովների, ունեմ տպագրված հոդվածներ:

2023 թվականին հաղթել եմ «Հայաստանի Հանրապետության լավագույն ուսանող» մրցույթում՝ հասարակագիտության ոլորտում զբաղեցնելով 1-ին հորիզոնականը:

-Ի՞նչ տվեց համալսարանը Ձեզ:

-Իմ կյանքի ամենալուսավոր փուլը համալսարանական տարիներն են: Համալսարանում եմ ծանոթացել բուհին նվիրված ու ջանասիրաբար աշխատող դասախոսներիս, ցանկացած պահի ինձ օգնող ու աջակցող ընկերներիս:

Համալսարանն օգնեց ինձ՝ կայանալ, գիտելիքն արժևորել, նոր կարողություններ ձեռք բերել, դժվարություններից չերկնչել, դրանք արիաբար հաղթահարել, ինչի համար շնորհակալ եմ հարազատ կրթօջախիս, պրոֆեսորադասախոսական, վարչական, ուսումնաօժանդակ անձնակազմին՝ ռեկտոր Ռուզաննա Հակոբյանի գլխավորությամբ։

-Ի՞նչն է Ձեզ համար առաջնայինը կյանքում։
Ընտանիք, ընկերներ, կրթություն…

Այս շարքը կարող եմ շարունակել։ Ինչպես ցանկացած անձի համար,  ինձ համար առաջնայինն իմ հայրենիքն է ու ընտանիքը։

—Ի՞նչ երազանքներ ունեք։

-2020 թվականի պատերազմից հետո ինձ համար մեծագույն երազանք է խաղաղությունը։ Խաղաղության պայմաններում միայն կարելի է ի կատար ածել բոլոր երազանքները, պարզապես պետք է հավատալ, ձգտել, պայքարել և հասնել նվիրական իղձերի իրականացմանը։

— Ի՞նչ սկզբունքների եք դավանում։

-Ես բնույթով սկզբունքային անձնավորություն եմ, կնշեմ ինձ համար առավել գնահատելի սկզբունքները՝ ազնվություն, ուղղամտություն, պարզություն ու մաքրություն, կամք, ջանք ու ձգտում՝ երազանքներին հասնելու ճանապարհին:

-Ի՞նչ նախասիրություններ ունեք, ազատ ժամանակ ինչո՞վ եք զբաղվում:

-Նախասիրություններս շատ են, սիրում եմ կարդալ գեղարվեստական ու մասնագիտական գրականություն, երաժշտություն լսել, հետաքրքրված եմ նաև մանկավարժական գործունեությամբ, ունեմ աշակերտներ, որոնց հետ աշխատում եմ մեծ սիրով ու նվիրումով:

-Ի՞նչ խորհուրդ կտաք ԳՊՀ ուսանողներին, ինչպե՞ս Ձեր կրտսեր ընկերները հաջորդ տարի հաղթեն «Լավագույն ուսանող» մրցույթում և, ընդհանրապես, ինչպե՞ս դառնալ լավագույնը:

-Ուսանողներին խորհուրդ կտամ առաջին հերթին լավ սովորել, զբաղվել հետազոտական և հասարակական գործունեությամբ, ակտիվորեն ներգրավվել բուհի ինքնակառավարման մարմիններում:

Այս ամենից զատ, միշտ պետք է հիշել, որ «Լավագույն»-ի կոչմանն արժանանալու համար պետք է լինել նախ և առաջ պայքարող և երազանքների ճանապարհին չընկրկող:

Հարցազրույցը վարեց ԳՊՀ արտաքին կապերի և

լրատվության բաժնի մասնագետ Նունե Միրիբյանը

Այսօր Գավառի պետական համալսարանում նշվեց գիտելիքի և դպրության օրը։

ԳՊՀ ռեկտոր Ռուզաննա Հակոբյանը ջերմորեն շնորհավորեց բուհի ուսանողներին և դասախոսներին սեպտեմբերմեկյան տոնի՝ Գիտելիքի, գրի և դպրության  օրվա առթիվ, շնորհավորեց առաջին կուրսեցիների համալսարանամուտը՝ մաղթելով արդյունավետ ուսումնառություն:

Բարձր միավորներ վաստակած և անվճար հիմունքներով ԳՊՀ ընդունված առաջին կուրսեցիները ստացան խորհրդանշական նվեր՝ «Էջեր Գավառի պետական համալսարանի հիմնադրման պատմությունից» գիրքը, որի հեղինակը բուհի հիմնադիր-ռեկտոր, փիլիսոփայական գիտությունների դոկտոր, պրոֆեսոր, Հայաստանի Հանրապետության վաստակավոր մանկավարժ, Գավառի պատվավոր քաղաքացի Հրանտ Հակոբյանն է։ Համալսարանում ներդաշնակորեն միահյուսվում են ավանդականն ու արդիականը,  գեղեցիկն ու օգտակարը, անհրաժեշտն ու հաճելին։ Եվ ինչպես նախորդ տարիներին, 2024 թվականի սեպտեմբերի 1-ին նույնպես գիտելիքի աշխարհ տանող խորհրդանշական բանալին առաջին կուրսեցիներին փոխանցեցին մագիստրատուրայի բարձր առաջադիմությամբ ուսանողները՝ իրենց կրտսեր ընկերներին խորհուրդ տալով ջանասիրաբար սովորել և կերտել հուսալի ապագա։

ԳՊՀ առաջին կուրսի ուսանողները, ոտք դնելով բուհի կամարներից ներս, դաշինք կնքեցին հարազատ բուհի  հետ, որը հաստատեցին երդմամբ։

Առաջին զանգի ղողանջների ներքո մեկնարկեց նոր ուսումնական տարեշրջանը։

Բարի՜ գալուստ և բարի՜ երթ, 2024-2025 ուսումնական տարի։

Սեպտեմբերմեկյան տոնին՝ Գիտելիքի և դպրության խորհրդանշական օրը Գավառի պետական համալսարանի ռեկտոր Ռուզաննա Հակոբյանը հավաստագրեր հանձնեց 2023 թվականին «Հայաստանի Հանրապետության լավագույն ուսանող» մրցույթում հաղթող ճանաչված ԳՊՀ ուսանողներին։

Հավաստագրեր ստացան՝

• ԳՊՀ բնագիտատնտեսագիտական ֆակուլտետի «ֆինանսներ, դրամաշրջանառություն և վարկ» բաժնի մագիստրատուրայի առաջին կուրսի ուսանողուհի, 2023 թվականին «Հայաստանի Հանրապետության լավագույն ուսանող» մրցույթում՝ բակալավրի կրթական ծրագրով հասարակագիտության ոլորտում 1-ին հորիզոնականը զբաղեցրած Ռոզա Վեզիրի Աբրահամյանը,
• ԳՊՀ հումանիտար մասնագիտությունների ֆակուլտետի «Հայոց լեզու և գրականություն» բաժնի մագիստրատուրայի շրջանավարտ, 2023 թվականին «Հայաստանի Հանրապետության լավագույն ուսանող» մրցույթում մագիստրոսի կրթական ծրագրով «Հայագիտության» ոլորտում 1-ին հորիզոնականը զբաղեցրած Թեհմինե Կարենի Բատիկյանը,
• ԳՊՀ հումանիտար մասնագիտությունների ֆակուլտետի «Հայոց լեզու և գրականություն» բաժնի բակալավրիատի 4-րդ կուրսի ուսանողուհի, 2023 թվականին «ՀՀ լավագույն ուսանող» հանրապետական մրցույթում բակալավրի կրթական ծրագրով «Հայագիտության» ոլորտում 1-ին հորիզոնականը զբաղեցրած Քրիստինե Հրայրի Բատիկյանը և
• ԳՊՀ բնագիտատնտեսագիտական ֆակուլտետի «Համակարգչային ճարտարագիտություն» բաժնի մագիստրատուրայի շրջանավարտ, 2023 թվականին «ՀՀ լավագույն ուսանող» հանրապետական մրցույթում մագիստրոսի կրթական ծրագրով «Բնագիտության» ոլորտում 2-րդ հորիզոնականը զբաղեցրած Անուշ Հակոբի Բաղդասարյանը:

«Լավագույն ուսանող»-ի տիտղոսակիրներն իրենց երախտիքի խոսքը հղեցին հարազատ կրթօջախին և սիրելի դասախոսներին՝ մշտապես իրենց աջակցելու և խրախուսելու համար, միաժամանակ կոչ արեցին առաջին կուրսի ուսանողներին անդադրում սովորել և  ձգտել գերազանցության ու նորանոր հաջողությունների։

Նոր ուսումնական տարվան ընդառաջ` ս․ թ․ օգոստոսի 31–ին Գավառի պետական համալսարանում տեղի ունեցավ հանդիպում առաջին կուրսի ուսանողների և նրանց ծնողների հետ:

ԳՊՀ ռեկտոր Ռուզաննա Հակոբյանը ջերմորեն ողջունեց և շնորհավորեց առաջին կուրսեցիներին ու նրանց ծնողներին, ուսանողներին մաղթեց արդյունավետ ուսումնառություն և բարձր առաջադիմություն։

ԳՊՀ ռեկտորատի անդամները ներկայացրին բուհում ուսումնական գործընթացի կազմակերպման սկզբունքները, առկա կրթական հնարավորությունները, միջազգային համագործակցության և սոցիալական աջակցության ծրագրերը, ԳՊՀ էլեկտրոնային ուսուցման «Learn․gsu.am» համակարգից և էլեկտրոնային գրադարանից օգտվելու կանոնները, անդրադարձան սովորողներին առաջադրվող պահանջներին՝ նրանց  կոչ անելով լինել աշխատասեր և նպատակասլաց։

Առաջին կուրսի ուսանողները ստացան տեղեկատվական թերթիկներ։

Գավառի պետական համալսարանի սիրելի՛ ուսանողներ և պրոֆեսորադասախոսական անձնակազմի հարգելի՛ անդամներ,

տեղեկացնում ենք, որ Եվրոպական Միության «Էրազմուս+» ծրագրի շրջանակում Գավառի պետական համալսարանի և  Հռոմի Սապիենզայի համալսարանի միջև կնքված պայմանագրի համաձայն՝ ԳՊՀ բակալավրիատի և մագիստրատուրայի ուսանողները հնարավորություն ունեն  2024-2025 ուսումնական տարվա 2-րդ կիսամյակում 5 ամիս ժամկետով ուսանելու, իսկ ակադեմիական անձնակազմի անդամները՝ 2 շաբաթ դասավանդելու Սապիենզայի համալսարանում:

Անգլերեն լեզվի B2 մակարդակի իմացությունը պարտադիր է:
Ծրագիրը շահառու ուսանողներին տրամադրում է անհատական կրթաթոշակ, ինչպես նաև հոգում է ճանապարհածախսը:

Մրցույթին կարող են դիմել ԳՊՀ բանասիրական, տնտեսագիտական ֆակուլտետների, ինչպես նաև հումանիտար մասնագիտությունների ֆակուլտետի Իրավագիտություն բաժնի ուսանողները։

Մրցույթին մասնակցության հայտերի ներկայացման վերջնաժամկետը ս․ թ․ հոկտեմբերի 9-ն է։

Ծրագրի մրցույթին դիմելու մանրամասների համար խնդրում ենք դիմել ԳՊՀ արտաքին կապերի և լրատվության բաժին կամ զանգահարել 094 867716, 098 625326, 060 461299 հեռախոսահամարներով։

Մաղթում ենք հաջողություն։

ԳՊՀ  արտաքին կապերի և լրատվության բաժին

Հուլիսի 5-ը՝ Սահմանադրության և պետական խորհրդանիշների օրը Գավառի պետական համալսարանի համար նշանավորվում է յուրովի, քանզի յուրաքանչյուր տարի այս օրը ջերմ ու հաճելի մթնոլորտում դիպլոմներ են շնորհվում առկա և հեռակա բաժինների բակալավրիատի և մագիստրատուրայի շրջանավարտներին:

Այսօր բարձրագույն մասնագիտական կրթության վավերագիր՝ դիպլոմ ստացավ ԳՊՀ  շրջանավարտների 27-րդ սերունդը, ով կմիանա ութ հազարից ավելի համալսարանականների բանակին, պատվով կծառայի մայր հայրենիքին ու ժողովրդին, քանզի Գավառի պետական համալսարանը ոչ միայն տալիս է մասնագիտական խորը գիտելիքներ ու կարողություններ, այլև նպաստում է ուսանողների լայն աշխարհայացքի, արժեքային ճիշտ կողմնորոշումների ու սկզբունքների  ձևավորմանը։

ԳՊՀ ռեկտոր Ռուզաննա Հակոբյանը ջերմորեն ողջունեց և շնորհավորեց բակալավրիատի և մագիստրատուրայի շրջանավարտներին, նրանց ծնողներին, դասախոսներին, բոլոր համալսարանականներին ու հյուրերին՝ նշելով, որ բուհում կրթության ու դաստիարակության ուղենիշը եղել և մնում է ազնիվ ու առաքինի, ազգային ու համամարդկային բարձր արժեքներով օժտված մասնագետներ պատրաստելու կարևոր առաքելությունը: Ռեկտորատի անդամները շնորհավորեցին շրջանավարտներին՝ մաղթելով մասնագիտական կայացում և առաջընթաց, անձնական ու աշխատանքային հաջողություններ:

Ավանդույթի համաձայն տեղի ունեցավ մագիստրոսների երդման հանդիսավոր արարողություն։

ԳՊՀ շրջանավարտներին իր գեղեցիկ կատարմամբ ողջունեց Գավառ քաղաքի Հայրապետ Խաչատրյանի անվան արվեստի դպրոցի ուսուցիչ, Երևանի Կոմիտասի անվան կոնսերվատորիայի շրջանավարտ Գրիգոր Բալագոզյանը։

Հայաստանի ազգային ագրարային համալսարանում կայացավ «Համալսարանների կառավարումն ու կազմակերպչական ենթակառուցվածքները որպես որակյալ կրթության հիմք» խորագրով աշխատաժողովը, որին մասնակցեցին ՀՀ բուհերի վարչական անձնակազմի ներկայացուցիչներ:

Աշխատաժողովը մեկնարկեց Հայաստանում ‹‹Էրազմուս›› ազգային գրասենյակի համակարգող Լանա Կառլովայի, Հայաստանի ազգային ագրարային համալսարանի միջազգային կապերի և կրթական բարեփոխումների գծով պրոռեկտոր Մարիամ Մովսիսյանի, Հայաստանում Եվրոպական միության պատվիրակության նախագծերի ղեկավար Դավիթ Ավագյանի և «Մասնագիտական կրթության որակի ապահովման ազգային կենտրոն» հիմնադրամի տնօրեն Ռուբեն Թոփչյանի ողջույնի խոսքերով։

Աշխատաժողովի հիմնական խոսնակը Եվրոպական համալսարանների ասոցիացիայի (ԵՀԱ) Կառավարման, դրամաշնորհային և հասարակական քաղաքականության զարգացման տնօրեն, դոկտոր Թոմաս Էստերմանն էր։ Նա մասնակիցներին ներկայացրեց եվրոպական բարձրագույն կրթության համակարգում կիրառվող կառավարման մոդելները։ ՀՀ բուհերի ներկայացուցիչները խմբային աշխատանքի միջոցով քննարկեցին իրենց բուհերի կառավարման համակարգերը, դրանց ուժեղ և թույլ կողմերը, փորձեցին վեր հանել իրենց բուհի համար ցանկալի կառավարման մոդելը։ Այնուհետև Թոմաս Էստերմանը մասնակիցներին ներկայացրեց համագործակցային առաջնորդության և ղեկավարման առանձնահատկությունները, անդրադարձավ եվրոպական բուհերի ինքնավերլուծության լավագույն փորձին, բուհերի փոխարկերպման հաջողված ռազմավարություններին։

Գավառի պետական համալսարանից աշխատաժողովին մասնակցեցին արտաքին կապերի և լրատվության բաժնի վարիչ Լիլիթ Թոռչյանը և որակի ապահովման բաժնի վարիչ Քանաքարա Հայրապետյանը։

Նյութի աղբյուրը՝

Հայաստանում Էրազմուս+ ազգային գրասենյակ