Սույն թվականի հունիսի 9-ից մինչև հունիսի 19-ը անցկացվեց Բրիտանական խորհրդի հայաստանյան մասնաճյուղի կողմից կազմակերպված «Researcher Connect» հետազոտական առցանց դասընթացը, որին մասնակցեցին հայաստանյան 25 մասնագետներ՝ Հայաստանի Հանրապետության բուհերից և գիտահետազոտական կազմակերպություններից։ Մասնակիցների ընտրությունն անցկացվել էր մրցակցային պայմաններում. շուրջ 100 հայտերից ընտրվել էին լավագույն 25-ը։ Դասընթացին մասնակցելու նպատակով ընտրվել էին նաև Գավառի պետական համալսարանի ուսումնագիտական գծով պրոռեկտոր Նելլի Կուտուզյանը և ԳՊՀ դասախոս Սաթենիկ Տիգրանյանը։ Հուլիսի 18-ին կայացավ վկայագրերի հանձնման հանդիսավոր արարողությունը, որի ընթացքում «Researcher Connect» առցանց դասընթացն հաջողությամբ ավարտած անդամներին շնորհվեց վկայագրեր: Վկայագրերը հանձնեցին Հայաստանի Հանրապետությունում Միացյալ Թագավորության դեսպան Ջոն Գալագերը, Բրիտանական խորհրդի հայաստանյան մասնաճյուղի տնօրեն Ադդեհ Հովասափյանը և ՀՀ բարձրագույն կրթության և գիտության կոմիտեի նախագահ Սարգիս Հայոցյանը։
Դասընթացի փակման հանդիսավոր արարողության ընթացքում մասնակիցները ներկայացրին իրենց տպավորությունները, նորարարական գաղափարները, համագործակցային այլ հետազոտական ծրագրեր։
Category: Без рубрики
CASEKEY ԲԻԶՆԵՍ ԽՆԴԻՐՆԵՐԻ ԼՈՒԾՄԱՆ ՄՐՑՈՒՅԹՈՒՄ ԳԱՎԱՌԻ ՊԵՏԱԿԱՆ ՀԱՄԱԼՍԱՐԱՆԻ «ԲԱՅԱԶԵՏ» ԹԻՄԸ ԶԲԱՂԵՑՐԵԼ Է 3-ՐԴ ՏԵՂԸ
CaseKey բիզնես խնդիրների լուծման մրցույթի շրջանակներում անցկացվող երկրորդ փուլի առաջին իրավիճակային խնդրի լուծման արդյունքում Գավառի պետական համալսարանի «Բայազետ» թիմը առաջադրված բիզնես խնդրին լուծում ներկայացրած 24 թիմերից զբաղեցրել է երրորդ տեղը՝ առաջին և երկրորդ տեղերը զբաղեցնող թիմերից հետ մնալով ընդամենը մեկ միավորով (առաջին և երկրորդ տեղեր զբաղեցրած թիմերը ստացել են 23 միավոր,մեր թիմը՝ 22միավոր)։
ԳՊՀ «Բայազետ» թիմում ընդգրկված են Տնտեսագիտություն բաժնի 3-րդ կուրսի ուսանողուհի Արմինե Սաֆոյանը, նույն բաժնի 1-ին կուրսի ուսանողուհի Օլյա Ավետիսյանը, Ֆինանսներ բաժնի 1-ին կուրսի ուսանողուհիներ Օֆելյա Մանուկյանը, Անահիտ Ասատրյանը, Սերվիս բանի 1-ին կուրսի ուսանողուհիներ Մելինե Քոչոյանը, Սառա Յազերյանը:
Թիմի մարզինչներն են ԳՊՀ շրջանավարտ, Գավառի ակադեմիկոս Ա․ Թամամշևի անվան պետական գյուղատնտեսական քոլեջի դասախոս Վարդան Գարեյանը և մագիստրատուրա Ֆինանսներ, դրամաշրջանառություն և վարկ 1-ին կուրսի ուսանող Սամվել Մանուկյանը։
Մրցույթը համախմբում է համալսարանական լավագույն մտքերը՝ հարթակ ստեղծելով վերլուծական մտածողության, ռազմավարական պլանավորման և նորարարական լուծումների զարգացման համար: ԳՊՀ ԲՏՖ ուսանողները հանդես են եկել ինքնուրույն մշակված ռազմավարությամբ։
ԳՊՀ ուսանողները ոչ միայն ցուցաբերեցին մասնագիտական գիտելիքներ և վերլուծական կարողություններ, այլև փայլեցին թիմային աշխատանքի, հաղորդակցման և ստեղծարար մտածողության մեջ:
ԳՊՀ ռեկտորատը ջերմորեն շնորհավորում է սիրելի ուսանողներին և մաղթում նորանոր հաջողություններ:
ՄԻՋՈՑԱՌՈՒՄ՝ ՆՎԻՐՎԱԾ ԳԵՂԱՄԱ ԵՐԿՐԻ ԳՐՉՈՒԹՅԱՆ ԿԵՆՏՐՈՆՆԵՐԻՆ ԵՎ ՁԵՌԱԳԻՐ ՄԱՏՅԱՆՆԵՐԻՆ
Մեսրոպ Մաշտոցի անվան Մատենադարանի նախաձեռնությամբ ՀՀ Գեղարքունիքի մարզի Լևոն Քալանթարի անվան դրամատիկական թատրոնում տեղի ունեցավ Մատենադարանի ավագ գիտաշխատող, պատմական գիտությունների թեկնածու Արփենիկ Ղազարոսյանի «Գեղամա երկրի գրչության կենտրոնները և ձեռագրական ժառանգությունը» մենագրության շնորհանդեսը, ցուցադրվեց բացառիկ ձեռագիր Ավետարան, որն ստեղծվել է Մաքենացոց վանքում 1496 թվականին։
Գրքում ներկայացված են Սևանի ավազանի գրչության կենտրոնների պատմությունը և մեզ հասած ձեռագրական հարուստ ժառանգությունը։ Հատուկ ընդգծվել է Սևանավանքի՝ որպես ուսումնական և գրավոր մշակույթի կենտրոնի նշանակությունը։
Մենագրությունը նախատեսված է հայ մշակույթի պատմությամբ զբաղվող մասնագետների, ուսանողների և հայոց պատմությամբ հետաքրքրվողների համար։
Միջոցառմանը մասնակցում էին նաև Գավառի պետական համալսարանի աշխատակիցներ, ուսանողներ և շրջանավարտներ։
Գրքի մեկ օրինակ նվիրվեց Գավառի պետական համալսարանի գրադարանին։
Շնորհակալություն ենք հայտնում Մատենադարանին այս կարևոր նախաձեռնության, ինչպես նաև համալսարանին տրված արժեքավոր նվերի համար։
ԲԱՐԻՆ ԸՆԴ ՁԵԶ, ԳԱՎԱՌԻ ՊԵՏԱԿԱՆ ՀԱՄԱԼՍԱՐԱՆԻ ՍԻՐԵԼԻ՛ ՇՐՋԱՆԱՎԱՐՏՆԵՐ
Հուլիսի 5-ին՝ ՀՀ Սահմանադրության օրը, Գավառի պետական համալսարանում կայացավ 2024-2025 ուսումնական տարվա շրջանավարտների դիպլոմների շնորհման հանդիսավոր արարողությունը։ Համալսարանը, իր առաքելությանը հավատարիմ, ճանապարհեց շրջանավարտների 28-րդ սերնդին։
ԳՊՀ ռեկտոր Ռուզաննա Հակոբյանը ողջունեց և ջերմորեն շնորհավորեց բակալավրիատի և մագիստրատուրայի շրջանավարտներին, շնորհակալություն հայտնեց նրանց ծնողներին, ընտանիքների անդամներին, երախտագիտություն հայտնեց ԳՊՀ բոլոր բարերարներին, համալսարանի ողջ աշխատակազին և նշեց, որ ևս 188 երիտասարդ մասնագետ համալրեց համալսարանի ութ հազարից ավելի շրջանավարտների բանակը, ովքեր իրենց ներդրումն են ունենում հասարակության և պետության զարգացման գործում։
Հնչեց ԳՊՀ մագիստրոսի երդումը, և շրջանավարտներն ասացին իրենց երախտիքի խոսքը՝ ընդգծելով այն փաստը, որ համալսարանը պատրաստում է ոչ միայն որակյալ մասնագետներ, այլև առաքինի անհատներ և բարեխիղճ քաղաքացիներ։ Նրանք խորին երախտագիտություն հայտնեցին բուհի հիմնադիր ռեկտոր Հրանտ Հակոբյանին, համահիմնադիր Հրանուշ Հակոբյանին և համալսարանի նվիրյալ պրոֆեսորադասախոսական կազմին։
Շրջանավարտներին դիպլոմներ շնորհեցին և բարեմաղթանքներ հղեցին ԳՊՀ պրոռեկտոր Նելլի Կուտուզյանը, ֆակուլտետների դեկաններ Թաթուլ Ասոյանը, Մարտին Ավագյանը, ամբիոնների վարիչներ Համլետ Ղաջոյանը, Սամվել Ամիրխանյանը, Հակոբ Ղուլոյանը, Գայանե Միրիբյանը, Վարազդատ Ավետիսյանը, «Համակարգչային ճարտարագիտություն» մասնագիտության ամփոփիչ ատեստավորման հանձնաժողովի նախագահ Գեղամ Կարոյանը։ Շրջանավարտներին իրենց գեղեցիկ կատարումներով շնորհավորեցին Գավառի Հայրապետ Խաչատրյանի անվան արվեստի դպրոցի երգի ուսուցիչ, Երևանի Կոմիտասի անվան պետական կոնսերվատորիայի շրջանավարտ Գրիգոր Բալագոզյանը, նույն դպրոցի դաշնամուրային բաժնի շրջանավարտ Սամվել Գասպարյանը, Գավառի Հենրիկ Թալալյանի անվան երաժշտական դպրոցի սան Սամվել Խաչատրյանը, ինչպես նաև Մարտունու Ներքին Գետաշեն համայնքի «Անի» պարային համույթի շնորհալի սաները, որոնց գեղարվեստական ղեկավարն է ԳՊՀ հեռակա բաժնի 2025 թվականի շրջանավարտ Անի Իսոյանը։
Դիպլոմների շնորհումն ուղեկցվեց ոգեշնչող ուղերձներով և շրջանավարտների հաջողության հուզիչ պատմություններով։ Միջոցառումը վարեցին Ռոզա Աբրահամյանը և Նարե Բաբայանը՝ մաղթելով, որ շրջանավարտների կյանքի անփոփոխ ուղենիշները լինեն բարին ու գեղեցիկը, մարդկայինն ու լուսավորը։
Բարի՛ն ընդ ձեզ, Գավառի պետական համալսարանի սիրելի՛ շրջանավարտներ։
ՀՐԱՎԻՐՈՒՄ ԵՆՔ ԳՊՀ 2025Թ․ ՇՐՋԱՆԱՎԱՐՏՆԵՐԻ ԴԻՊԼՈՄՆԵՐԻ ՇՆՈՐՀՄԱՆ ԱՐԱՐՈՂՈՒԹՅԱՆԸ
2025թ. հուլիսի 5-ին, ժամը՝ 12:00-ին կկայանա Գավառի պետական համալսարանի 2025 թվականի շրջանավարտների դիպլոմների շնորհման հանդիսավոր արարողությունը։
Հրավիրում ենք ԳՊՀ բակալավրիատի առկա և հեռակա բաժինների, ինչպես նաև մագիստրատուրայի շրջանավարտներին՝ ստանալու դիպլոմները։
Շրջանավարտներին խնդրում ենք ներկայանալ ժամը 11:30-ին՝ համապատասխան ֆակուլտետների դեկանատներ, ապա մասնակցել միջոցառմանը, որը տեղի կունենա ԳՊՀ հումանիտար մասնագիտությունների ֆակուլտետի մեծ դահլիճում։
ԳՊՀ արտաքին կապերի և լրատվության բաժին
ԳՊՀ ՈՒՍԱՆՈՂԸ ՄԱՍՆԱԿՑԵՑ ՇՊՀ-Ի ՀԱՆՐԱՊԵՏԱԿԱՆ ՈՒՍԱՆՈՂԱԿԱՆ ԳԻՏԱԺՈՂՈՎԻՆ
2025թ. հունիսի 27-ին Շիրակի պետական համալսարանում կայացավ հանրապետական ուսանողական գիտաժողով, որին մասնակցեց Գավառի պետական համալսարանի «Ֆինանսներ, դրամաշրջանառություն և վարկ» բաժնի մագիստրատուրայի 1-ին կուրսի ուսանողուհի Ռոզա Աբրահամյանը` ներկայացնելով զեկուցում «Արհեստական բանականության և մեքենայական ուսուցման ազդեցությունը ֆինանսական որոշումների կայացման գործընթացում» թեմայով։ Ուսանողի գիտական ղեկավարն է ԳՊՀ կառավարման և ֆինանսների ամբիոնի վարիչ, տնտեսական գիտությունների թեկնածու, դոցենտ Սամվել Ամիրխանյանը։ Գիտաժողովին մասնակցության հայտ էին ներկայացրել շուրջ 100 ուսանողներ և երիտասարդ հետազոտողներ` Շիրակի, Գավառի, Երևանի, Վանաձորի պետական համալսարաններից, Հայաստանի պետական մանկավարժական, տնտեսագիտական համալսարաններից և Հայ-ռուսական համալսարանից։ Լիագումար նիստից հետո գիտաժողովի աշխատանքները շարունակվեցին մասնագիտական բաժանմունքներում, այնուհետև կազմակերպվեց էքսկուրսիա, և ներկայացվեցին Գյումրու պատմամշակութային վայրերը:
ԳՊՀ-ՈՒՄ ՔՆՆԱՐԿՎԵՑ ԵՎՐՈՊԱԿԱՆ ՄԻՈՒԹՅԱՆ «ԷՐԱԶՄՈՒՍ+ VIRTUAL VOYAGES» ԾՐԱԳԻՐԸ
Գավառի պետական համալսարանում քննարկվեց Եվրոպական միության «Էրազմուս+Վիրտուալ ճանապարհորդությունների միջոցով համապիտանի կարողությունների ձեռքբերում» ծրագիրը, որն իրականացվում է «Էրազմուս+ Վիրտուալ փոխանակումներ» գործողությունների ծրագրի շրջանակում և որին ՀՀ-ից մասնակցում է Գավառի պետական համալսարանը։ Բուհի արտաքին կապերի և լրատվության բաժնի վարիչ Լիլիթ Թոռչյանը ներկայացրեց ծրագրի աշխատանքային փաթեթները, նպատակները, սահմանված վերջնարդյունքները։ ԳՊՀ ռեկտոր Ռուզաննա Հակոբյանը հստակեցրեց առաջադրված խնդիրները, դրանց լուծման հետ կապված բովանդակային ու կազմակերպական հարցեր։ Նշվեց, որ ծրագիրը վիրտուալ հարթակի միջոցով վերապատրաստելու է շուրջ 2100 ուսանողի, ովքեր կունենան առցանց համագործակցելու, առաջադեմ գաղափարներ փոխանակելու և օգտակար փորձառություն ձեռք բերելու հնարավորություն՝ բարելավելով իրենց մասնագիտական և սոցիալական՝ ճկուն հմտությունները։ Միաժամանակ, «Virtual Voyages» ծրագրին կմասնակցի շուրջ 200 աշխատակից, ովքեր կզարգացնեն թվային միջավայրում աշխատելու կարողությունները։ Դասընթացի ավարտին մասնակիցները կստանան «Youthpass» միջազգային ընկերության կողմից վավերացված հավաստագրեր։
ԳՊՀ 28-ՐԴ ԳԻՏԱԺՈՂՈՎԻ 9-ՐԴ ԲԱԺԱՆՄՈՒՆՔԻ ԱՇԽԱՏԱՆՔՆԵՐԻ ՄԱՍԻՆ
2025 թվականի մայիսի 3-ին և 4-ին տեղի ունեցավ Գավառի պետական համալսարանի ամենամյա՝ 28-րդ գիտաժողովը։ Բնական գիտություններին նվիրված 9-րդ բաժանմունքում զեկուցումներով հանդես եկան Գավառի պետական համալսարանի ինֆորմատիկայի և ֆիզիկամաթեմատիկական գիտությունների ամբիոնի, Գորիսի պետական համալսարանի, Հայաստանի ազգային ագրարային համալսարանի /ՀԱԱՀ/ տվյալագիտության ամբիոնի, Հայ-Ռուսական համալսարանի էկոնոմիկայի և ֆինանսների ամբիոնի, ՀԱԱՀ ագրարային քաղաքականության և տնտեսագիտության հետազոտական կենտրոնի, ՀԱԱՀ ագրոբիզնեսի կառավարման և քաղաքականության ամբիոնի, Շիրակի պետական համալսարանի մաթեմատիկայի, ֆիզիկայի և տեղեկատվական տեխնոլոգիաների ամբիոնի դասախոսներ, ինչպես նաև Իջևան քաղաքի Սպարտակ Սարգսյանի անվան թիվ 1 հիմնական դպրոցի ուցուցիչ։
Գիտաժողովն ապահովեց արժեքավոր հարթակ գիտնականների, երիտասարդ հետազոտողների և ոլորտի մասնագետների համար՝ փոխանակելու գաղափարներ, հնարավորություն տալով համախմբել տարբեր հաստատությունների մասնագետներին՝ ստեղծելով միջգիտակարգային քննարկումների արդյունավետ միջավայր, նպաստելով նոր մոտեցումների բացահայտմանը՝ լուսաբանելով բնագիտության ոլորտում առկա մարտահրավերները և դրանց հնարավոր լուծումները, անդրադարձ կատարելով նաև հանրակրթության ոլորտում բնագիտության դասավանդման որոշ հարցերի: Գիտաժողովին ներկայացված զեկուցումները կհրապարակվեն և հասանելի կդառնան մասնագիտական հանրությանը։
ԳՊՀ ՈՒՍԱՆՈՂՆԵՐԸ՝ “CASE KEY ACADEMY” ԿՐԹԱԿԱՆ ԾՐԱԳՐԻ ՄԱՍՆԱԿԻՑՆԵՐ
Գավառի պետական համալսարանի «Տնտեսագիտություն» բաժնի ուսանողներ Արմինե Սաֆոյանը և Օլյա Ավետիսյանը, «Ֆինանսներ /ըստ ոլորտի/» բաժնի ուսանող Օֆելյա Մանուկյանը մասնակցեցին Հայաստանի պետական տնտեսագիտական համալսարանում կայացած “Case Key Academy” կրթական ծրագրի առաջին փուլին։
“Case Key Academy” ծրագիրը բիզնես խնդիրների լուծման “Case Key” մրցույթի բաղկացուցիչ մասն է, որը նպատակ ունի զարգացնել ուսանողների վերլուծական հմտությունները, ռազմավարական մտածողությունը, թիմային աշխատանքի և արդյունավետ որոշումներ կայացնելու կարողությունները:
ԳՊՀ ուսանողուհիները մասնակցեցին բիզնես խնդիրների լուծմանը նվիրված սեմինարների՝ խորացնելով իրենց գիտելիքները գործարարության ոլորտի խնդիրների վերլուծության և լուծման ուղիների մասին:
ԳՊՀ 28-ՐԴ ԳԻՏԱԺՈՂՈՎԻ 8-ՐԴ ԲԱԺԱՆՄՈՒՆՔԻ ԱՇԽԱՏԱՆՔՆԵՐԻ ՄԱՍԻՆ
Գավառի պետական համալսարանի ամենամյա՝ 28-րդ գիտաժողովի 8-րդ բաժանմունքում ներկայացվեցին զեկուցումներ օտար լեզվի և գրականության, ինչպես նաև դասավանդման մեթոդիկայի վերաբերյալ։
Զեկուցումներով հանդես եկան մանկավարժական գիտությունների թեկնածու, դոցենտ, Գավառի պետական համալսարանի և Հայաստանի պետական տնտեսագիտական համալսարանի դասախոս Ռուզաննա Սարգսյանը, ԳՊՀ հումանիտար մասնագիտությունների ֆակուլտետի օտար լեզվի և գրականության ամբիոնի դասախոս Սաթենիկ Հայթյանը, նույն ամբիոնի դասախոս Lիլիթ Թոռչյանը, ԳՊՀ մագիստրատուրայի անգլերեն լեզվի և գրականության բաժնի 2-րդ կուրսի ուսանողուհի Նատաշա Բաղդասարյանը, Իջևան քաղաքի Սպարտակ Սարգսյանի անվան թիվ 1 հիմնական դպրոցի ուսուցիչ Սոնա Հովհաննիսյանը։
Բաժանմունքի աշխատանքներն ընթացան ակտիվ հարցուպատասխանի և քննարկումների մթնոլորտում։