Category: Без рубрики

Գավառի պետական համալսարանի ուսանողական գիտական ընկերությունը հրավիրում է ուսանողական  գիտաժողովի, որը տեղի կունենա 2025 թվականի ապրիլի 4-ին, սկիզբը՝ ժամը 11:00-ին, հեռավար՝ առցանց ձևաչափով:        

Գիտաժողովին կարող են մասնակցել Հայաստանի Հանրապետության և ԳՊՀ գործընկեր՝ արտերկրի բարձրագույն ուսումնական (գիտահետազոտական)  հաստատությունների   ուսանողները:

Գիտաժողովն անցկացվելու է բնական և հասարակական գիտությունների մասնագիտական բաժանմունքներում։

 Գիտաժողովին մասնակցելու համար անհրաժեշտ է մինչև 2025 թվականի մարտի 25-ը լրացնել մասնակցության էլեկտրոնային հայտը՝ հետևյալ հղումով․

https://publications.gsu.am/confernece/

Հայտին կից անհրաժեշտ է ներկայացնել նաև զեկուցման ամփոփագիրը (հայերեն, ռուսերեն և անգլերեն): Զեկուցման ամբողջական տարբերակը, ինչպես նաև համապատասխան ամբիոնի երաշխավորությունը կամ գիտական ղեկավարի կարծիքն անհրաժեշտ է ուղարկել ԳՊՀ ՈՒԳԸ էլեկտրոնային փոստի հասցեով՝ sssgsuu@mail.ru, մինչև 2025թ․ մարտի  25-ը՝ ներառյալ, նշելով հեղինակ(ներ)ի անուն, ազգանունը, բարձրագույն ուսումնական (գիտահետազոտական) հաստատության ամբողջական անվանումը: Գրախոսության փուլը հաղթահարելու պարագայում զեկուցումները հրապարակվելու են ԳՊՀ ՈՒԳԸ հոդվածների ժողովածուի հերթական համարում՝ էլեկտրոնային տարբերակով:

Խնդրում ենք պահպանել զեկուցումներին ներկայացվող հետևյալ  տեխնիկական պահանջները՝    

1. Զեկուցումը պետք է լինի 5-ից 10 էջի սահմաններում հայերեն, ռուսերեն կամ անգլերեն լեզուներով, համակարգչային շարվածքով՝ B5 չափի տպագրական թղթի վրա, ‹‹GHEA Grapalat›› տառատեսակով, 1,12 միջտողային հեռավորությամբ, թղթի բոլոր կողմերից 18 մմ լուսանցքով, էջադրումը՝ էջի ներքևում (footer), կողմնորոշումը՝ կենտրոն, սահմանները՝ 1սմ:
2. Վերևում նշել վերնագիրը՝ 10,5 տառաչափով (մեծատառերով, թավ՝ Bold), կողմնորոշումը՝ կենտրոն:
3. Վերնագրից մեկ տող ներքև՝ աջ անկյունում (10,5 տառաչափով), նշել հեղինակ(ներ)ի ազգանունը, անունը (թավ), բարձրագույն ուսումնական (գիտահետազոտական) հաստատության անվանումը, ֆակուլտետը, բաժինը, կուրսը, գիտական ղեկավարի ազգանունը, անունը, գիտական աստիճանը և կոչումը:
4. Մեկ տող ներքև՝ 10,5 pt տառաչափով, տրվում է հեղինակի էլեկտրոնային փոստի հասցեն:
5. Մեկ տող բաց թողնելով՝ 10 pt տառաչափով, հոդվածի լեզվով, շեղատառ (italic) և թավ ներկայացվում է հոդվածի ամփոփագիրը (аннотация, abstract), որտեղ 120-170 բառի սահմաններում պետք է ներկայացվեն ուսումնասիրության առարկան, նպատակները, խնդիրները, մեթոդները, ինչպես նաև հեղինակ(ներ)ի հիմնական եզրահանգումներն ու առաջարկությունները:
6. Մեկ տող բաց թողնելով՝ անհրաժեշտ է գրել «Բանալի բառեր․» և նշել 5-6 բանալի բառեր:
7. Բաց թողնելով երկու տող՝ շարադրել զեկուցումը, նշելով համապատասխան հղումները։ Մեջբերումներն անհրաժեշտ է կատարել համակարգչային հղման ձևով՝ զեկուցման համար հերթական համարակալմամբ (1-ից մինչև վերջին հղումը)։

Զեկուցման վերջում ներկայացվում է օգտագործված գրականության ցանկը:

8. Լատիներեն և հայերեն տառերը, սիմվոլները, ինչպես նաև բանաձևերն անհրաժեշտ է հավաքել «Microsoft Equation Editor 3.0» ծրագրով:
9. Աղյուսակները և գծագրերը (համարակալված և վերնագրված) անհրաժեշտ է ներկայացնել նկարի տեսքով՝ 10 տառաչափով:
10. Օգտագործված գրականության ցանկից հետո զեկուցման բնագիր լեզվից տարբեր երկու լեզուներով շարադրել զեկուցման վերնագիրը (մեծատառերով, թավ, կողմնորոշումը՝ կենտրոն), մեկ տող ներքև՝ հեղինակ(ներ)ի ազգանունը, անունը (թավ), բարձրագույն ուսումնական (գիտահետազոտական) հաստատությունը, ֆակուլտետը, բաժինը, կուրսը, գիտական ղեկավարի ազգանունը, անունը, գիտական աստիճանը և կոչումը։ Մեկ տող բաց թողնելուց հետո շարադրել ամփոփագիրը, բանալի բառերը:
11. Զեկուցման հետ միասին անհրաժեշտ է ներկայացնել բարձրագույն ուսումնական (գիտահետազոտական) հաստատության համապատասխան ամբիոնի երաշխավորությունը կամ գիտական ղեկավարի կարծիքը:
12. Զեկուցումները, երաշխավորություններն ու կարծիքներն ընդունվում են ԳՊՀ ՈՒԳԸ էլեկտրոնային փոստի հետևյալ հասցեով՝sssgsu@mail.ru

Գիտաժողովին միանալու հղումն է՝

https://zoom.us/j/3897702958?pwd=WS9UblF1MjJqSSsrVFlNQjdaUG5CQT09#success

Հարցերի դեպքում խնդրում ենք դիմել ԳՊՀ ՈՒԳԸ նախագահ  Մերի Փուրթոյանին /հեռախոսահամարներ՝ 099-533-303, +374-060-46-12-99, 060-46-03-02/ կամ գրել  ԳՊՀ ուսանողական գիտական ընկերության էլեկտրոնային փոստին /հասցե՝ sssgsuu@mail.ru/։

         Շնորհակալություն համագործակցության համար։

        ԳՊՀ ուսանողական գիտական ընկերություն

‹‹- Խնդրում եմ պատմել Ձեր մասին և ներկայացնել Ձեր հաջողության պատմությունը:

-Ես Լուսինե Արտակի Պողոսյանն եմ, ծնվել եմ 2000 թվականի հունվարի 24-ին, Գավառ քաղաքում։ 2006-2018 թվականներին սովորել և ավարտել եմ Գավառի ավագ դպրոցը։ Հենց իմ հարազատ դպրոցում է ձևավորվել ապագա մասնագիտությանս նկատմամբ հետաքրքրությունը։ Ես երախտապարտ եմ դպրոցիս և ուսուցչական ողջ անձնակազմին։

2018 թվականին կատարել եմ ճիշտ ընտրություն՝ ընդունվել եմ Գավառի պետական համալսարան։ 2022 թվականին գերազանցությամբ ավարտել եմ ԳՊՀ հեռակա ուսուցման ֆակուլտետի  «Պատմություն» բաժինը։ Այնուհետև ընդունվել և շարունակում եմ սովորել ԳՊՀ մագիստրատուրայում՝ իմ սիրելի «Պատմություն» մասնագիտությամբ։ Ուսումնառության ընթացքում մասնակցել եմ մի շարք լրացուցիչ կրթական ծրագրերի, միջազգային և հանրապետական ուսանողական գիտաժողովների։ Տպագրվել են 13 գիտական հոդվածներ, որոնք իմ հարգարժան դասախոսների աջակցությամբ կատարված հետազոտական աշխատանքի արդյունք են։ Հետազոտությանս առանցքն է  կազմում իմ հայրենի քաղաքում գործող թանգարանը․ կարևորում եմ երկրագիտական թանգարանների դերը տարածաշրջանային պատմության պահպանման, հանրահռչակման, համայնքին իր իսկ պատմությանը հասու դարձնելու տեսանկյունից։

-Ի՞նչ տվեց համալսարանը Ձեզ:

Անգնահատելի է համալսարանի ներդրումը իմ անձնական աճի, մասնագիտական կարողությունների ձեռքբերման ճանապարհին։ Շնորհիվ Գավառի պետական համալսարանի՝ ինձ համար բացվեց դեպի գիտություն տանող ճանապարհը, մայր բուհում գիտահետազոտական աշխատանքը դարձավ կարևոր և սիրելի։

Հարազատ բուհում իմ հաջողության պատմությունը կերտելիս՝ ճանաչվել եմ նախ Գավառի պետական համալսարանի, ապա Հայաստանի Հանրապետության լավագույն ուսանող։  «ՀՀ լավագույն ուսանող» տիտղոսին արժանանալը և՛ մեծագույն պատիվ է, և՛ պարտավորություն՝ մասնագիտական գիտելիքների և կարողությունների ողջ ներուժը ծառայեցնելու ի բարօրություն  հայրենիքի։

-Ի՞նչն է Ձեզ համար առաջնայինը կյանքում։

-Առաջնային են ընտանիքս ու հայրենիքս, մասնագիտական պատասխանատվությունը և սիրելի ոլորտում կայացումը։

— Ի՞նչ երազանքներ ունեք։

-Հավատացած եմ, որ մեր փոքր ու մեծ երազանքներից են ծնունդ առնում հստակ նպատակները, որոնք դառնում են կարևոր  գործեր։ Ուստի, երազանքներս դարձնում եմ նպատակ և քայլում դեպի նպատակ տանող ճանապարհով։ Այս պահին ամենամեծ երազանքս հայոց երկրի բարօրությունն ու խաղաղությունն է։

-Ի՞նչ սկզբունքների եք դավանում։

-Դավանում եմ աստվածաշնչյան պատգամներին։

-Ի՞նչ նախասիրություններ ունեք, ազատ ժամերին ինչո՞վ եք զբաղվում։

-Գնահատելով ժամանակի արժեքը՝ աշխատում եմ ազատ ժամանակ չունենալ։ Սիրում եմ ընթերցել, զբաղվել հետազոտական աշխատանքով, զարգացնել մասնագիտական կարողություններս։

— Դուք նաև մանկահասակ երեխայի մայր եք։ Ինչպե՞ս եք համատեղում ուսանողուհու և երիտասարդ մայրիկի կարգավիճակները։

-Հնարավոր է համատեղել, երբ կա կամք, սովորելու մեծ ցանկություն և վճռականություն, իսկ թիկունքումդ ունես կողակցիդ և ընտանիքիդ անվերապահ աջակցությունը։ Հենց այդ աջակցության շնորհիվ` առանց վարանելու շարունակել եմ ուսումս ԳՊՀ մագիստրատուրայում, իսկ տղաս ինձ ավելի է ոգեշնչում, դառնում իմ հաջողությունների աղբյուրը։

-Ի՞նչ խորհուրդ կտաք ԳՊՀ ուսանողներին, ինչպե՞ս Ձեր կրտսեր ընկերները հաջորդ տարի հաղթեն «Լավագույն ուսանող» մրցույթում և, ընդհանրապես, ինչպե՞ս դառնալ լավագույնը։

-Հաջողելու և լավագույնը լինելու գրավականն են անձանձիր աշխատանքը և նպատակասլացությունը։

Խորհուրդս իմ կրտսեր ընկերներին՝ պատասխանատվությամբ և ամենայն հարգանքով վերաբերվել սեփական մասնագիտությանը, զբաղվել գիտահետազոտական աշխատանքով, օգտվել ԳՊՀ ընձեռած բացառիկ հնարավորությունից՝ զարգացնելու հետազոտական կարողությունները և դառնալու ժամանակի պահանջված մասնագետը։

-Սիրելի՛ Լուսինե, մեր հարցազրույցը կայացավ Ձեր ծննդյան օրը, ուստի ջերմորեն շնորհավորում ենք ծննդյան տարեդարձի առթիվ և մաղթում հաջողություններ ու նորանոր ձեռքբերումներ։ Միշտ արժանի լինեք ‹‹Լավագույնի›› կոչմանը››։

Հարցազրույցը վարեց ԳՊՀ արտաքին կապերի և լրատվության

 բաժնի մասնագետ  Նունե Միրիբյանը

Գավառի պետական համալսարանի հեռակա բաժինների սիրելի՛ ուսանողներ, տեղեկացնում ենք ձեզ, որ 2025 թ. առաջին կիսամյակի դասերը բոլոր կուրսերում կմեկնարկեն 2025թ. հունվարի 8-ին և կավարտվեն 2025 թ. հունվարի 26-ին:

Ուսման վարձը վճարելը և դասերին մասնակցելը պարտադիր է։

Ուսման վարձավճարի մասնակի փոխհատուցում, բուհի կողմից զեղչ ստանալու համար դիմումները և անհրաժեշտ փաստաթղթերն ընդունվում են 2025 թվականի հունվարի 15-ը ներառյալ։

Այն ուսանողները, ովքեր զինվորական ծառայության զորակոչվելու վերաբերյալ ծանուցագիր են ստացել՝ խնդրում ենք ծանուցագրի պատճեն դիմումին կից ներկայացնել ռեկտորատ, տարկետում ձևակերպելու նպատակով։

Մաղթում ենք արդյունավետ ուսումնառություն։

Ջերմորեն շնորհավորում ենք Գավառի պետական համալսարանի ուսանողների, դասախոսների, աշխատակիցների, շրջանավարտների, բարերարների, բարեկամների և գործընկերների, մեր բոլոր հայրենակիցների Ամանորն ու Սուրբ Ծնունդը։

Մաղթում ենք, որ 2025 թվականը լինի խաղաղ, ստեղծագործ աշխատանքի, արդյունավետ ուսումնառության, գիտահետազոտական և նորարարական ոլորտներում ձեռքբերումների, բոլոր բնագավառներում հաջողությունների, զարգացման ու առաջընթացի տարի։

Նոր տարի, գալուստդ բա՛րի։

ԳՊՀ ռեկտորատ

Գավառի պետական համալսարանի հետ համագործակցությամբ` Մարզային նախաձեռնությունների և զարգացման ծրագրերի կենտրոնի կողմից իրականացվեց «Կանաչ տեխնոլոգիաների շրջիկ էքսպո» իրազեկման միջոցառում։

Նախաձեռնության նպատակն էր բարձրացնել ուսանողների իրազեկվածությունը էներգաարդյունավետության և վերականգնվող էներգիայի մասին, ինչպես նաև խթանել կանաչ տեխնոլոգիաների կիրառումը տեղական համայնքներում։

Նախապես պատրաստվել էին պաստառներ և տեղեկատվական թերթիկներ, որոնք ներառում էին արևային ֆոտովոլտային համակարգերի և ջրատաքացուցիչների տեղադրման աշխատանքներ իրականացնող կազմակերպությունների, ինչպես նաև ջերմամեկուսիչ նյութերի մատակարարների մասին տեղեկատվություն։

«Կանաչ տեխնոլոգիաների շրջիկ էքսպո»-ն միտված է նպաստելու Գեղարքունիքի մարզում էներգաարդյունավետ տեխնոլոգիաների կիրառմանը։ Ծրագիրն իրականացվում է Եվրոպական Միության և Գերմանիայի Դաշնային Հանրապետության տնտեսական համագործակցության և զարգացման նախարարության ֆինանսական աջակցությամբ։