Գավառի պետական համալսարանի «Պատմություն» բաժնի 3-րդ կուրսի ուսանողուհի Արմինե Ասլանյանը մանկավարժական պրակտիկան հաջողությամբ անցկացրեց իր հարազատ կրթօջախում՝ Սարուխանի Մանվել Խոստեղյանի անվան թիվ 2 միջնակարգ դպրոցում: ԳՊՀ ուսանողուհին 7-րդ, 8-րդ և 9-րդ դասարանի աշակերտների հետ կազմակերպել էր «Մայիսը խոսում է նրանց քաջությամբ» խորագրով ցերեկույթ։ Միջոցառմանը ներկա էին դպրոցի տնօրենը, ուսուցչական անձնակազմը, ծնողներ և աշակերտներ: Հրավիրվել էին նաև ԳՊՀ դասախոս, պատմական գիտությունների թեկնածու Քանաքարա Հայրապետյանը և ԳՊՀ դասախոս Ջուլիետա Մարգարյանը:
Ցերեկույթը խորհրդանշական էր և նպատակ ուներ ներկաներին հաղորդակից դարձնելու մեր ժողովրդի հաղթական անցյալին և հերոսների անմահ սխրանքին՝ միաժամանակ ընդգծելով Մայիսի 9-ի պատմական նշանակությունը՝ որպես համազգային միասնության, տոկունության և հայրենասիրության վկայություն։
Աշակերտները ներկայացրեցին հայրենասիրական ոգեշունչ բանաստեղծություններ, հանդես եկան գեղեցիկ պարային և երժշտական կատարումներով:
Ցերեկույթի ավարտին իր շնորհակալական խոսքը ասաց դպրոցի տնօրեն Գոհար Բադալյանը:
Ամփոփիչ խոսքով հանդես եկավ նաև Քանաքարա Հայրապետյանը՝ ընդգծելով ԳՊՀ-դպրոց համագործակցության արդյունավետությունը:
Ս․ թ․ մայիսի 3-ին կայացավ Գավառի պետական համալսարանի 28-րդ տարեկան գիտաժողովը, որի 6-րդ բաժանմունքում ներկայացվեցին զեկուցումներ հայոց լեզվի և նրա դասավանդման մեթոդիկայի վերաբերյալ։ Զեկուցումներով հանդես եկան ՀՀ գիտությունների ազգային ակադեմիայի Հրաչյա Աճառյանի անվան լեզվի ինստիտուտի տնօրեն, բանասիրական գիտությունների դոկտոր, դոցենտ Վիկտոր Կատվալյանը, ԳՊՀ հումանիտար մասնագիտությունների ֆակուլտետի դեկան, բանասիրական գիտությունների թեկնածու, դոցենտ Թաթուլ Ասոյանը, Լեզվի ինստիտուտի ավագ գիտաշխատող, բանասիրական գիտությունների թեկնածու Ամալյա Բարսեղյանը, Երևանի պետական համալսարանի դասախոսներ՝ բանասիրական գիտությունների թեկնածուներ, դոցենտներ Սուսաննա Գրիգորյանը և Նաիրա Պարոնյանը, ԳՊՀ հումանիտար մասնագիտությունների ֆակուլտետի հայոց լեզվի և գրականության բաժնի 4-րդ կուրսի ուսանողուհիներ Մերի Պետրոսյանը և Ռիտա Ղալակչյանը, ովքեր զեկուցում էին պատրաստել ԳՊՀ դասախոս, Լեզվի ինստիտուտի ավագ գիտաշխատող, բանասիրական գիտությունների թեկնածու, դոցենտ Վարսիկ Ներսիսյանի հետ համահեղինակությամբ։
Մայիսի 4-ին զեկուցմամբ հանդես եկավ ԳՊՀ ակադեմիական քաղաքականության բաժնի վարիչ, դասախոս Օլգա Ղազարյանը։ Զեկուցում էր ներկայացրել նաև հումանիտար մասնագիտությունների ֆակուլտետի փոխդեկան Ռուզաննա Սարգսյանը։
Ուսումնասիրությունները վերաբերում էին գրաբարի բառակազմական կաղապարների, արդի հայերենի շարահյուսական կառուցվածքի, բարբառային հայերենում ընտանեկան հարաբերություններ արտահայտող բառակապակցությունների, դարձվածային միավորների, գրողի լեզվի և ոճի բառարանագրության արդիական հարցերի քննությանը։
Բաժանմունքի աշխատանքներն ընթացան ակտիվ հարցուպատասխանի և քննարկումների մթնոլորտում։ Առանձին զեկուցումների շուրջ ծավալված քննարկումների ընթացքում ձևակերպվեցին հետազոտությունների նոր թեմաներ, եղան համատեղ ուսումնասիրություններ կատարելու մասին առաջարկություններ։
Գավառի պետական համալսարանի «Պատմություն» բաժնի 3-րդ կուրսի ուսանողուհի Մելինե Ճնգռյանը իր մանկավարժական պրակտիկան անցկացրեց Գավառի ավագ դպրոցում, որտեղ էլ պրակտիկայի վերջին օրը կազմակերպել էր դաս-միջոցառում՝ «Լեռների կանչը՝ Հայդուկի սրտում» խորագրով։ Միջոցառմանը մասնակցում էին դպրոցի 10-րդ դասարանի հումանիտար հոսքի պատմաիրավագիտական և տնտեսագիտական հոսքի ֆիզիկամաթեմատիկական խմբերի աշակերտները։ Միջոցառմանը ներկա էին դպրոցի տնօրենը, ուսուցիչները և աշակերտները։ Հրավիրվել էին նաև ԳՊՀ դասախոս, պատմական գիտությունների թեկնածու Քանաքարա Հայրապետյանը և ԳՊՀ դասախոս Ջուլիետա Մարգարյանը: Միջոցառման նպատակն էր՝ ամրապնդել սովորողների հայրենասիրական ոգին, ցույց տալ հայդուկի կամքի զորությունը։ Ցերեկույթը հուզիչ էր և բովանդակալից․ աշակերտները բեմականացրին Աղբյուր Սերոբի դավադիր սպանությունը, նաև Սոսե Մայրիկի մենախոսությունը իր կյանքի մասին։ Ավարտին ելույթ ունեցան և նման միջոցառումները կարևորեցին Գավառի ավագ դպրոցի պատմության ուսուցչուհի, պրակտիկայի ղեկավար Ամալյա Զոլյանը, ԳՊՀ դասախոս Քանաքարա Հայրապետյանը։
Գավառի պետական համալսարանի բնագիտատնտեսագիտական ֆակուլտետի ուսանողները մասնակցեցին 2025 թվականի հոբելյանական՝ 5-րդ «CaseKey» բիզնես խնդիրների լուծման մրցույթի բացման պաշտոնական միջոցառմանը, որը տեղի ունեցավ Երևանի Առնո Բաբաջանյանի անվան համերգասրահում։
Մրցույթի բացման արարողությանը մասնակցեցին «Տնտեսագիտություն» բաժնի 3-րդ կուրսի ուսանողուհի Արմինե Սաֆոյանը, «Ֆինանսներ (ըստ ոլորտի)» բաժնի 1-ին կուրսի ուսանողներ Անահիտ Ասատրյանը, Օֆելյա Մանուկյանը, «Տնտեսագիտություն» բաժնի 1-ին կուրսի ուսանողներ Օլյա Ավետիսյանը և Նարեկ Վարդանյանը, «Հաշվապահական հաշվառում և հարկում» բաժնի 1-ին կուրսի ուսանող Վիկտոր Թաթարյանը, «Սերվիս» բաժնի 1-ին կուրսի ուսանողուհիներ Մելինե Քոչոյանը և Սառա Յազերյանը, «Համակարգչային ճարտարագիտություն» բաժնի 1-ին կուրսի ուսանող Ժորա Հովհաննիսյանը։ ԳՊՀ թիմի մարզիչներն են ԳՊՀ «Ֆինանսներ (ըստ ոլորտի)» բաժնի 4-րդ կուրսի ուսանող Սամվել Մանուկյանը և ԳՊՀ շրջանավարտ, Գավառի գյուղատնտեսական քոլեջի դասախոս Վարդան Գարեյանը։ Մասնակիցներին ուղեկցում էր ԳՊՀ կառավարման և ֆինանսների ամբիոնի վարիչ, տնտեսագիտության թեկնածու, դոցենտ Սամվել Ամիրխանյանը։
«CaseKey» մրցույթը կազմակերպվում է ՀՀ կենտրոնական բանկի, Բիբլոս բանկի, Ամարյան հիմնադրամի և Arca ազգային վճարային համակարգի հովանավորությամբ և միտված է խթանելու ուսանողների վերլուծական մտածողությունը, գործնական գիտելիքների կիրառումը և նորարարական մոտեցումների մշակումը իրական բիզնես խնդիրների լուծման գործընթացում։ Մրցույթը ներառում է կրթական փուլ՝ CaseKey Academy, որի ընթացքում մասնակիցները ստանում են նոր հմտություններ բիզնես վերլուծության, ռազմավարության և թիմային աշխատանքի ոլորտներում։
Մասնակցելով ծրագրի մեկնարկային միջոցառմանը՝ ԳՊՀ ուսանողները հնարավորություն ունեցան անմիջականորեն ծանոթանալու մրցույթի ձևաչափին, ծրագրային բաղադրիչներին և առաջիկա ամիսների ընթացքում իրենց սպասող փուլերին։
ԳՊՀ-ն արդեն մի քանի տարի շարունակ ակտիվ մասնակցություն է ունենում այս նախաձեռնությանը, և մենք լիահույս ենք, որ այս տարի ևս մեր ուսանողները իրենց ներուժով և նախաձեռնողականությամբ լավագույնս կներկայացնեն համալսարանը։
Սպասում ենք մրցույթի անցկացմանը և մաղթում հաջողություն բոլոր թիմերին։
Գավառի պետական համալսարանում ընթացքի մեջ են ուսանողների պրակտիկաները։ ԳՊՀ «Սերվիս» բաժնի ուսանողները պրակտիկայի ընթացքում այցելեցին ՀՀ Արագածոտնի մարզ։ Վիկտոր Համբարձումյանի տուն-թանգարանում հնարավորություն ունեցան ծանոթանալու աշխարհահռչակ աստղաֆիզիկոսի կյանքին և գիտական գործունեությանը: Թանգարանային ցուցադրությունը բացահայտեց մեծ բնագետի բացառիկ ժառանգությունը և նրա անգնահատելի վաստակը համաշխարհային աստղաֆիզիկայի զարգացման գործում: Ուսանողները հիացմունքով ծանոթացան այն գիտական բացահայտումներին, որոնք Համբարձումյանի անունը հավերժացրին աստղագիտության պատմության մեջ: Բյուրականի աստղադիտարան այցելության ընթացքում ուսանողները ծանոթացան ժամանակակից աստղագիտական սարքավորումներին և աստղազարդ երկնակամարի դիտարկման գործընթացներին: Գիտական հաստատության մասնագետները մանրամասն ներկայացրին տիեզերքի ուսումնասիրության ժամանակակից ուղղությունները, հետազոտական մեթոդները և այն հետաքրքիր բացահայտումները, որոնք ժամանակակից աստղագիտությունը նվիրել է մարդկությանը: Ամբերդ ամրոցի պատմական կարևորությունն ու ճարտարապետական գեղեցկությունը յուրաքանչյուր մասնակցի համար արժեքավոր ուսումնական փորձ դարձավ: Միջնադարյան Հայաստանի ռազմական ճարտարապետության այս հրաշալի օրինակը հայ ժողովրդի տաղանդի ու ռազմավարական մտածողության ապացույցն է։ Օշականի Սուրբ Մեսրոպ Մաշտոց եկեղեցու այցելությամբ ավարտվեց անմոռանալի տպավորություններով հագեցած օրը։ Ուսանողները ակնածանքով և երախտագիտությամբ գլուխ խոնարհեցին Ուսուցչապետի հիշատակի առջև՝ խորապես գիտակցելով լեզվի և գրի անփոխարինելի դերը մեր ազգային ինքնության պահպանման գործում:
Պրակտիկայի ընթացքում սովորողների ձեռք բերած գիտելիքներն ու կարողությունները նպաստում են նրանց մասնագիտական կայացմանը։
Գավառի պետական համալսարանի ամենամյա՝ 28-րդ գիտաժողովի 5-րդ բաժանմունքում քննարկվեցին մանկավարժահոգեբանական տարբեր հիմնահարցեր։
ԳՊՀ դասախոս Արմինե Դավթյանը ներկայացրեց աուտիզմի տեսակները և դրանց շտկման նեյրոհոգեբանական մոտեցումները՝ կարևորելով ինտեգրատիվ միջամտությունները։
ԳՊՀ և ՀՀ ԳԱԱ գիտակրթական միջազգային կենտրոնի դասախոս, մանկավարժական գիտությունների թեկնածու, դոցենտ Կարինե Պապիկյանը վերլուծեց վիտագեն տեխնոլոգիաների կիրառման նպատակահարմարությունը հանրակրթական դպրոցում՝ ներկայացնելով գործնական մոդելներ։
ԳՊՀ դասախոս, պատմական գիտությունների թեկնածու Քանաքարա Հայրապետյանը և ԳՊՀ պատմության բաժնի ուսանող Լուսինե Կյուրեղյանը համահեղինակությամբ ներկայացրին զեկուցում՝ պատմության դասավանդման գործընթացում հայրենասիրական դաստիարակության մասին։ Իսկ Արմինե Ասլանյանը տիկին Հայրապետյանի հետ միասին անդրադարձավ պատմական նկարների դերի մեկնաբանությանը՝ պատմության դասավանդման ժամանակ։
ԵՊՀ և ԳՊՀ դասախոս Մերի Ազիզյանը ներկայացրեց հետաքրքիր զեկուցում՝ գունային ընկալման մշակութային առանձնահատկությունների հոգեբանական նշանակության մասին։
Իսկ Գավառի ակադեմիկոս Թամամշևի անվան գյուղատնտեսական քոլեջի դասախոս Վարդան Գարեյանը ներկայացրեց արդի կրթական համակարգի հիմնախնդիրները և զարգացման հեռանկարները։
Երևանի թիվ 181 հիմնական դպրոցի ուսուցիչ Մարիետա Ադամյանն անդրադարձավ հայ ազգային երգի նշանակությանը անձի հոգևոր-մշակութային կրթության մեջ։
Զեկուցումներն ուղեկցվեցին բովանդակալից քննարկումներով։
Շնորհավորում ենք Գավառի պետական համալսարանի օտար լեզվի և գրականության ամբիոնի վարիչ, բանասիրական գիտությունների թեկնածու, դոցենտ Գայանե Միրիբյանին և ԳՊՀ ռուսաց լեզվի և գրականության բաժնի շրջանավարտ, ռուսաց լեզվի ուսուցչուհի Սիրանուշ Ղանդիլյանին, ում համահեղինակությամբ լույս են տեսել ռուսերենի նոր՝ «БУКВАРЬ»-ը և մեթոդական ուղեցույցը, որը ՀՀ ԿԳՄՍ նախարարության կողմից 2025 թվականին երաշխավորվել է որպես 2-րդ դասարանի դասագիրք։
Դասագիրքը կազմվել է պետական կրթական չափորոշիչների պահանջներին համապատասխան՝ հաշվի առնելով Հայաստանի Հանրապետության արդի լեզվական իրողությունները։ Ռուսերենի՝ որպես օտար լեզվի դասագրքի յուրաքանչյուր թեմայի շրջանակներում առկա են հնչյունական և բառային վարժություններ, բառապաշարի հարստացման, խոսքի, տրամաբանական և ստեղծագործական մտածողության զարգացմանն ուղղված առաջադրանքներ։ Դասագիրքը նախատեսված է խոսքի բոլոր մասերի զարգացման համար՝ ներառելով բազմաթիվ առաջադրանքներ և վարժություններ։ Ապահովվել են միջառարկայական կապերը մայրենի լեզվի, նկարչության, երգեցողության, մաթեմատիկայի, «Շրջակա աշխարհ»-ի հետ։ Դասագրքում առկա են բազմաթիվ նյութեր, որոնք ուղղված են բարոյական արժեքների արմատավորմանը, ընտանեկան հարաբերությունների, փոխօգնության կարևորության գիտակցմանը, մարդկանց հանդեպ հարգանքի, բնության և շրջակա աշխարհի նկատմամբ հոգատար վերաբերմունքի ձևավորմանը, ուսումնասիրվող լեզվի եւ մշակույթի հանդեպ հետաքրքրության աճին։
Ուսուցչին օգնելու համար կազմվել է նաև մեթոդական ձեռնարկ, որում ներկայացված են ուսումնական գործընթացի կազմակերպման ընդհանուր և առանձին բաժինների ու թեմաների ուսումնասիրման վերաբերյալ առաջարկություններ, ներառված է թեմատիկ պլան՝ ուսուցման նպատակների և վերջնարդյունքների նշումով։ Դասերի պլանավորման մեջ առկա են քննադատական, տրամաբանական, ստեղծագործական մտածողության, ոչ ստանդարտ լուծումներ փնտրելու և գտնելու կարողությունների զարգացմանն ուղղված առաջադրանքների և վարժությունների օրինակներ։
Ուսումնամեթոդական այս համալիրը ռուսաց լեզվի ուսուցումը դարձնելու է հաճելի, ստեղծագործական և հետաքրքիր գործընթաց։
Գավառի պետական համալսարանի ուսանողները մասնակցեցին «Ձեռնարկությունների ինկուբատոր» հիմնադրամի (EIF) «AI4ALL» նախաձեռնության «Project Management & AI» 3 մոդուլից բաղկացած առցանց դասընթացին։ Նրանք ծանոթացան արհեստական բանականության համակարգերի կիրառման շնորհիվ թիմային աշխատանքի արդյունավետ կառավարման, ճիշտ պլանավորման, ժամկետների հստակ սահմանման, վտանգների վերլուծության, կրկնվող առաջադրանքների ինքնաշխատ կատարման, դրանց բարելավման, տվյալների վերլուծություն կատարելու և լավագույն լուծումներ գտնելու կառուցակարգերին։ Հավաստագրեր շնորհվեցին դասընթացը հաջողությամբ ավարտած և թեստավորումը հաղթահարած ԳՊՀ «Ֆինանսներ, դրամաշրջանառություն և վարկ» բաժնի մագիստրատուրայի 1-ին կուրսի ուսանողուհի Ռոզա Աբրահամյանին, «Անգլերեն լեզու և գրականություն» բաժնի մագիստրատուրայի 2-րդ կուրսի ուսանողուհի Նատաշա Բաղդասարյանին, «Հայոց լեզու և գրականություն» բաժնի մագիտրատուրայի 2-րդ կուրսի ուսանողուհի Անահիտ Ներսիսյանին և «ֆինանսներ» բաժնի բակալավրիատի 2-րդ կուրսի ուսանողուհի Սիլվինե Մոմչյանին։ Շնորհավորում ենք ԳՊՀ ուսանողներին և ցանկանում նոր ձեռքբերումներ։
2025 թվականին ՀՀ ԿԳՄՍ նախարարության կողմից երաշխավորվել են գերմաներենի 4-րդ և 9-րդ դասարանների նոր դասագրքերը, որոնք շարունակությունն են 2024 թվականին հաստատված 7-րդ դասարանի դասագրքի։
Դասագրքերի հեղինակներն են Մարգարիտ Մաթևոսյանը և Սաթենիկ Հայթյանը։ Բոլոր դասագրքերին կից մշակվել են նաև մեթոդական ուղեցույցներ։
Հաշվի առնելով սովորողների տարիքային առանձնահատկություններն ու հետաքրքրությունները՝ դասագրքերում ընդգրկված թեմաները ներկայացված են այնպես, որ ուսումնառությունը լինի հաճելի և դյուրին, նպաստի սովորողների լեզվական, հաղորդակցական և մշակութային գիտելիքների հարստացմանը։ Դասագրքերը միտված են ոչ միայն սովորողների տեսական իմացության և գործնական կարողությունների ձեռքբերմանը, այլև արժեքային ճիշտ կողմնորոշումների և վերաբերմունքի ձևավորմանը։
Առանձնահատուկ ուշադրություն է դարձվել դասագրքերի համապատասխանությանը օտար լեզուների առարկայական չափորոշչի պահանջներին։ Դրանք ամբողջությամբ արտահայտվել են ծրագրային բոլոր թեմաներում ու ենթաթեմաներում։
Դասագրքերը ոչ միայն ունեն հարուստ բովանդակություն, այլև միտված են սովորողների ինքնուրույն վերլուծական, ստեղծագործական մտածողության զարգացմանը, գործնական իրավիճակներում լեզվական հմտությունների կիրառմանը։ Յուրաքանչյուր դաս հետաքրքիր ճանապարհորդություն է դեպի գերմանական մշակույթի և լեզվի աշխարհ՝ ապահովելով կայուն գիտելիքներ և դառնալով հաջողության հուսալի հիմք։
