Month: Նոյեմբերի 2024

ՀՀ կենտրոնական բանկի աջակցությամբ Դիլիջանի ուսումնահետազոտական կենտրոնում տեղի ունեցավ 2024թ․ «CaseKey» բիզնես խնդիրների լուծման ամենամյա մրցույթի ամփոփիչ միջոցառումը։ Մրցույթի գլխավոր հովանավորը ‹‹Բիբլոս Բանկ Արմենիան›› է։ Մեկնարկին շուրջ 600 հայտադիմումից ընտրվեցին 200-ից ավելի ուսանող ՀՀ համալսարաններից, որոնք 6 ամսվա ընթացքում աշխատեցին միջազգային մասնագետների հետ, հանդիպեցին հայաստանյան մի շարք առաջատար կազմակերպությունների ղեկավարների հետ, ինչպես նաև մասնակցեցին հանրային միջոցառումների։ Այդ ամիսների ընթացքում 2 բիզնես խնդրի վրա աշխատելուց հետո, եզրափակիչ անցած մասնակիցները լուծեցին ՀՀ բանկային ոլորտում թվային լուծումների զարգացման մասին հիմնական խնդիրը։

Գավառի պետական համալսարանից ծրագրին մասնակցեցին «Տնտեսագիտություն», «Ֆինանսներ» բաժնի 2-րդ կուրսի ուսանողներ Օլյա Աղեկյանը, Սեդա Աղեկյանը, Դիանա Սոսեյանը, Մարիետա Վարդանյանը։ Թիմի բիզնես մարզիչներն են ԳՊՀ շրջանավարտ, Գավառի պետական գյուղատնտեսական քոլեջի դասախոս Վարդան Գարեյանն ու «Ֆինանսներ» բաժնի 4-րդ կուրսի ուսանող Սամվել Մանուկյանը։ ԳՊՀ թիմին ուղեկցում էր կառավարման և ֆինանսների ամբիոնի վարիչ Սամվել Ամիրխանյանը:

Մրցույթը ուսանողներին հնարավորություն ընձեռեց համալսարանում ստացած գիտելիքները կիրառել իրական բիզնես խնդիրների լուծման մեջ։

ԳՊՀ ռեկտորատը շնորհավորում է մրցույթի բոլոր մասնակիցներին և մաղթում նորանոր հաջողություններ։

Լիտվայի Վիլնյուս քաղաքի Միկոլաս Ռոմերիսի անվան համալսարանում տեղի ունեցավ Եվրոպական միության  ‹‹ERASMUS+T-GREEN. հետբակալավրիական կրթության փոխակերպումը հանուն կանաչ և կայուն ապագայի›› ծրագրի հերթական աշխատաժողովը, որին մասնակցեցին ԳՊՀ ուսումնագիտական գծով պրոռեկտոր Նելլի Կուտուզյանը,  հաշվապահական հաշվառման ամբիոնի վարիչ Հակոբ Ղուլոյանը, նույն ամբիոնի դասախոս, ԳՊՀ գլխավոր հաշվապահ Գուրգեն Մուրադյանը, բուհի արտաքին կապերի և լրատվության բաժնի վարիչ Լիլիթ Թոռչյանը։ Ծրագիրը  համակարգում է Ճարտարապետության և շինարարության Հայաստանի ազգային համալսարանը՝ Եվրասիա միջազգային համալսարանի հետ համատեղ։ Աշխատաժողովի ընթացքում ԵՄ գործընկերները ներկայացրին Միկոլաս Ռոմերիսի անվան համալսարանի, Պորտուգալիայի կաթոլիկ համալսարանի և  Լեհաստանի Կրակովի Յագելոնյան համալսարանի «Կանաչ կրթության» քաղաքականության մշակման, համատեղ և կրկնակի որակավորումներ շնորհող կրթական ծրագրերի իրականացման գործում ունեցած փորձը։

Ներկայացվեցին գործընկեր ՀՀ բուհերի կողմից մշակված համատեղ կամ կրկնակի աստիճանաշնորհմամբ մագիստրոսական կրթական ծրագրերը։ Գավառի պետական համալսարանի և Հայաստանի պետական տնտեսագիտական համալսարանի  համատեղ  կազմած «Կանաչ տնտեսություն» մագիստրոսական կրթական ծրագիրը ներկայացրեց ԳՊՀ պատվիրակության անդամ Լիլիթ Թոռչյանը՝ անդրադառնալով ծրագրի նախապատրաստական փուլում  իրականացված համադրական վերլուծության /բենչմարքինգ/ գործընթացին, նախատեսված կրեդիտներին, կրթական վերջնարդյունքներին և այլ հարցերի։ Մշակված ծրագրերը եվրոպացի գործընկերների կարծիքների հաշվառմամբ կլրամշակվեն, ինչպես նաև որոշ դասընթացներ կվերապրոֆիլավորվեն՝ ուղղված լինելով «կանաչ կրթությանը» և բնական ռեսուրսների խնայողաբար ու խելամիտ օգտագործմանը։

ԳՊՀ ներկայացուցիչներն ակտիվորեն մասնակցեցին քննարկումներին՝ «Կանաչ տնտեսություն» մագիստրոսական ծրագրի մասնագրի տարբեր կառուցամասերի բաղադրիչների, պարտադիր և կամընտրական դասընթացների, կրթական վերջնարդյունքների բովանդակության, ծրագրի լիցենզավորման պահանջների վերաբերյալ։ Աշխատաժողովի ընթացքում անցկացված վերապատրաստման դասընթացի նյութերը հասանելի կլինեն ծրագրի ընդհանուր հարթակում՝ դրանցից օգտվելու և առաջավոր միջազգային փորձը տեղայնացնելու նպատակով։

Գավառի պետական համալսարանում կայացավ սեմինար-քննարկում՝ նվիրված  «Զբոսաշրջության արժեշղթա»-յին, որը վարեց ոլորտի մասնագետ, ‹‹Armenian adventures›› զբոսաշրջային ընկերության փոխտնօրեն Արեգ Սինանյանը։

Բանախոսը ներկայացրեց զբոսաշրջության արժեշղթայի հիմնական բաղադրիչները, ոլորտի զարգացման արդի միտումները և նորարարական մոտեցումները, անդրադարձավ զբոսաշրջային փաթեթների մշակման, մարքեթինգային ռազմավարությունների, վաճառքի և սպասարկման գործընթացների, ֆինանսների շարժի, զբոսաշրջային բիզնեսի ռիսկերի և օգուտների մասին, ինչպես նաև կարևորեց հաճախորդների կարիքների  բացահայտման և վաճառքի հմտությունները։

Սեմինարի մասնակիցներն ակտիվորեն մասնակցեցին քննարկմանը։

Ավարտին բանախոսը ներկայացրեց «Armenian adventures»-ի հաջողության հիմնական գրավականները՝ շեշտադրելով նորարարությունը, հաճախորդի նկատմամբ հոգատարությունը և մատուցվող ծառայությունների փաթեթի շարունակական համալրումը:

Գավառի պետական համալսարանում կայացավ հումանիտար մասնագիտությունների ֆակուլտետի առաջին կուրսեցիների բեմելը՝ «Բարև, մե՛նք ենք» խորագիրը կրող միջոցառմամբ։ Ցերեկույթը վարում էին նույն ֆակուլտետի «Հայոց լեզու և գրականություն» մասնագիտության 4-րդ կուրսի ուսանողուհիներ Լաուրա Մանուկյանը և Քրիստինե Բատիկյանը, որոնք ներկայացրին  միջոցառման խորհուրդը՝ համալսարանական ընտանիք նոր ուսանողներ ընդունելու գեղեցիկ ավանդույթը: «Իրավագիտություն», «Պատմություն», «Տարրական մանկավարժություն և մեթոդիկա», «Անգլերեն լեզու և գրականություն», «Ռուսաց լեզու և գրականություն» մասնագիտությունների առաջին կուրսերի ուսանողները ներկայացրին իրենց նախասիրություններն ու ձեռքբերումները, անդրադարձան ընտրած մասնագիտության կարևորությանն ու առանձնահատկություններին՝ կիսվելով նաև բուհի մասին իրենց տպավորություններով:

Ուսանողներին ջերմորեն շնորհավորեցին և հաջողություններ մաղթեցին ԳՊՀ ռեկտոր Ռուզաննա Հակոբյանը, հումանիտար մասնագիտությունների ֆակուլտետի դեկան Թաթուլ Ասոյանը, հասարակական գիտությունների ամբիոնի վարիչ Համլետ Ղաջոյանը, կառավարման և ֆինանսների ամբիոնի վարիչ Սամվել Ամիրխանյանը:

Միջոցառումն ուղեկցվեց բովանդակալից սահիկաշարով, հետաքրքիր  բեմականացմամբ, երաժշտական և պարային գեղեցիկ կատարումներով: Համալսարանականներին ողջունեց Գավառի նորաստեղծ «Ռեստարտ Պրոջեքթ» երաժշտական համույթը, որի անդամներն են ծնունդով Արցախից, Գավառի թիվ 2 միջնակարգ դպրոցի շրջանավարտ Լիաննա Շահոյանը, Գավառի արվեստի դպրոցի դաշնամուրի բաժնի շրջանավարտ Սիրենա Շահինյանը և Նորատուսի թիվ 1 միջնակարգ դպրոցի 9-րդ դասարանի աշակերտուհի Աննա Սողոյանը:

ԳՊՀ հումանիտար մասնագիտությունների ֆակուլտետի առաջին կուրսեցիները միասնաբար ասացին․ «Բարև, մե՛նք ենք, և մենք կարևորում են կրթությունը որպես հաջողության ճանապարհ»։

Գավառի պետական համալսարանի սիրելի՛ ուսանողներ, տեղեկացնում ենք, որ ս․ թ․ նոյեմբերի 20-ին, ժամը՝ 13։00-ին, համալսարանի կենտրոնական մասնաշենքի  Հրաչյա Աճառյանի անվան լսարանում տեղի կունենա «Զբոսաշրջության արժեշղթան» խորագրով սեմինար-քննարկում, որը կվարի ոլորտի մասնագետ, ‹‹Armenian adventures›› զբոսաշրջային ընկերության փոխտնօրեն Արեգ Սինանյանը։

Միաժամանակ, հրավիրում ենք ս․ թ․ նոյեմբերի 21-ին, ժամը՝  13։00-ին, Հրաչյա Աճառյանի անվան լսարանում հանդիպելու ‹‹AMERIA›› բանկի ներկայացուցիչների հետ և ծանոթանալու բանկի կողմից ուսանողների համար հայտարարված մրցույթի պայմաններին։  Սիրով սպասում ենք ձեզ։

             ԳՊՀ արտաքին կապերի և լրատվության բաժին

Հայաստանի գեղարվեստի պետական ակադեմիայում տեղի ունեցավ «Խթանելով հավասարությունն ու ներառականությունը բարձրագույն կրթության ոլորտում» խորագրով միջազգային աշխատաժողով:

Աշխատաժողովի նպատակն էր բարձրացնել բարձրագույն կրթության մեջ հավասարության և ներառականության կարևորության մասին իրազեկվածությունը և բացահայտել Հայաստանի Հանրապետությունում և Եվրոպական բարձրագույն կրթական տարածքում /ԵԲԿՏ/ առկա մարտահրավերները, ներկայացնել արդյունավետ փորձը, ինչը կնպաստի  բարձրագույն կրթության ոլորտում հավասարության և ներառականության ապահովմանը, բռնի տեղահանված անձանց աջակցության ցուցաբերմանը:

Գավառի պետական համալսարանից աշխատաժողովին մասնակցեց արտաքին կապերի և լրատվության բաժնի վարիչ Լիլիթ Թոռչյանը։

Աշխատաժողովի խոսնակներն էին՝ ԵՄ փորձագետներ «Կրթության զարգացման ինստիտուտի» (Խորվաթիա) գործադիր տնօրեն Նինոսլավ Շչուկանեց Շմիդտը և նույն ինստիտուտի բարձրագույն կրթության քաղաքականության փորձագետ Թոմաս Ֆարնելը։

Խոսնակները հանդես եկան զեկուցումներով՝ հետևյալ թեմաներով․

1․ ‹‹Հավասարություն, ներառականություն, բազմազանություն և բարձրագույն կրթության սոցիալական չափանիշ՝ հիմնական տերմինները և քաղաքականությունները ԵԲԿՏ համատեքստում››,

2․ ‹‹Հավասարության և ներառականության մարտահրավերները ԵԲԿՏ-ում և անհավասարության հանգեցնող հիմնական գործոնները››,

3․ ‹‹Ինչպե՞ս բարձրագույն կրթության ոլորտում ընդունել քաղաքական որոշումներ հավասարության և ներառականության վերաբերյալ. մեթոդաբանության ներկայացում››,

4․ ‹‹Խորվաթիայի բարձրագույն կրթության անցած ուղին դեպի հավասարություն և ներառականություն››,

5․ ‹‹Աջակցություն քաղաքականությանը. ԵԲԿՏ շրջանակների և գործիքների ներկայացում՝ բուհերում արդարությանը և ներառականությանը աջակցելու համար, և ինչպես Հայաստանը կարող է օգտագործել դրանք››,

6․ ‹‹Հավասարության և ներառականության համար ազգային գործողություններին միտված նախագիծ. ծրագրի մշակում Խորվաթիայի օրինակով››,

7․ ‹‹Եվրոպական միտումներ, քաղաքականություններ և պրակտիկաներ՝ ԵՄ փորձագետներ տեղահանված անձանց աջակցության համար››,

8․ ‹‹Եվրոպական միտումներ, քաղաքականություններ և պրակտիկաներ՝ բարձրագույն կրթության մեջ արդյունավետություն ապահովելու համար››,

9․ ‹‹Համայնքի ներգրավվածությունը՝ հանուն հավասարության և ներառականության››։

Զեկուցումներին հաջորդում էին խմբային քննարկումները։

Աշխատաժողովի ընթացքում տեղի ունեցան նաև պանելային քննարկումներ,  ներկայացվեց ՀՀ բուհերի փորձը, քննարկվեցին  համագործակցությանն ուղված մի շարք առաջարկներ։

Նոյեմբերի 6-ին ՈԱԱԿ նախաձեռնությամբ տեղի ունեցավ ՄԿԾ բարելավման հաջողված փորձի ներկայացման հերթական աշխատաժողովը, որին  մասնակցեցին ավելի քան 70  մասնագետներ Հայաստանի տարբեր բուհերից։   
Կարևորելով ՄԿԾ-ների բարելավման գործընթացը և հաջողված փորձի վերհանումն ու տարածումը՝ ՈԱԱԿ տնօրեն Ռուբեն Թոփչյանը նշեց․ «Այսօր ուսանողն այլևս չի ուզում միայն փաստեր սովորել։ Նա ուզում է միանգամից և սովորել, և վերլուծել, և տեսնել իր առաջընթացը»։  Պարոն Թոփչյանը շեշտեց, որ ուսանողը սովորում է հանձնարարությունների միջոցով, և վերջնարդյունահենք մոտեցումը ենթադրում է խնդիրներ լուծելու կարողության ձևավորում։ «Այսօրվա դասախոսը պետք է լինի խնդիր լուծող և ուսանողներին  սովորեցնի խնդիր լուծել»,- ասաց նա։
Աշխատաժողովի ընթացքում ներկայացվեց ՄԿԾ-ի բարելավման երկու փորձ։
Գավառի պետական համալսարանի որակի ապահովման բաժնի վարիչ Քանաքարա Հայրապետյանը և Ինֆորմատիկայի և ֆիզիկամաթեմատիկական գիտությունների ամբիոնի վարիչ Վարազդատ Ավետիսյանը ներկայացրին բակալավրի մասնագիտական կրթական ծրագրերի բարելավման և արդիականացման կառուցակարգերը՝ «Համակարգչային ճարտարագիտություն» մասնագիտության օրինակով։
Նշվեց, որ ՏՏ ոլորտն արագընթաց է զարգանում, բուհի համար մարտահրավեր է աշխատաշուկայի արագ փոփոխվող կարիքներին արձագանքելը։ Ուստի հենց այս ՄԿԾ-ի օրինակով է բուհը փորձարկել ՄԿԾ-ների բարելավման և արդիականացման  իր մշակած կառուցակարգերը։
Հաջորդիվ ներկայացվեցին ՄԿԾ բովանդակության արդիականացման գործոնները և բարելավման ուղղությունները, որոնք կիրառել են բարելավման գործընթացում․ 

•  դասախոսական կազմի համալրում,  
• դասավանդման և ուսումնառության նոր մեթոդների կիրառում, 
•  ուսանողների գնահատման նոր չափանիշների ներդրում, 
• բենչմարքինգ, որի շրջանակներում ուսումնասիրել են միջազգային փորձը,  
• հետազոտական աշխատանքներ, գիտական նորարարություններ, 
• շահառուների կարծիքների ուսումնասիրություն և դրա հիման վրա նոր առարկաների ներդրում կամ եղածների բարելավում, 
• նախագծահենք և աշխատանքի վրա հենված ուսուցում, այդ թվում գործատուի մոտ փորձնակության ծրագրի իրականացում,
• համակարգչային լաբորատորիաների արդիականացում, 
• նոր կրթական և տեղեկատվական տեխնոլոգիաների ինտեգրում ուսուցման գործընթացում։ 

Երևանի պետական համալսարանի Իջևանի մասնաճյուղի «Պատմություն» կրթական ծրագրի ղեկավար Նաթելլա Գրիգորյանը ներկայացրեց մոդուլային կառուցվածքով «Պատմություն» կրթական ծրագրի ներդրման փորձը։
Նշվեց, որ հայաստանյան բոլոր բուհերի պատմության ՄԿԾ-ներն ուսումնասիրել են, ապա նորովի մոտեցմամբ իրենց ծրագիրն են մշակել, որի արդյունքում   որոշ դասընթացներ, որոնք ընդհանուր վերջնարդյունքներ են ունեցել,  միավորվել են։ Բացի այդ, ապահովվում է դասավանդման ժամանակագրական մոտեցում, ինչը հնարավորություն է տալիս ուսանողին միևնույն ժամանակ ուսումնասիրել Հայաստանում և աշխարհում տեղի ունեցած պատմական զարգացումները, համեմատական վերլուծություն և համադրություններ անել։ Շեշտվեց, որ իրենց ուսումնասիրությունները վկայում են՝ համաժամանակյա ուսուցումն ուսանողին հնարավորություն է տալիս ավելի լավ պատկերացնել աշխարհը և պատմական զարգացումները։
Յուրաքանչյուր ներկայացումից հետո մասնակիցները հնարավորություն ունեցան ուղղել իրենց հարցերը և քննարկել ներկայացված փորձերը։   
Նշենք՝ ՄԿԾ բարելավման հաջողված փորձի ներկայացմանը նվիրված աշխատաժողովները պարբերական են։ Բոլոր այն մասնագետները կամ ուսումնական հաստատություները, որոնք  ունեն բարելավված կրթական ծրագրերի փորձառություն, կարող են դիմել ՈԱԱԿ-ին (նամակ գրելով info@anqa.am էլ․ փոստին)՝ հաջորդ միջոցառումների ընթացքում իրենց փորձը ներկայացնելու համար։

Մասնագիտական կրթության որակի ապահովման ազգային կենտրոնի (ՈԱԱԿ) նախաձեռնությամբ ս․ թ․ նոյեմբերի 6-ին տեղի ունեցավ մասնագիտական կրթական ծրագրերի (ՄԿԾ) բարելավման լավագույն փորձի ներկայացմանը նվիրված հերթական առցանց աշխատաժողովը։

Աշխատաժողովի 70-ից ավելի մասնակիցներին ներկայացվեցին Գավառի պետական համալսարանի  բակալավրի ՄԿԾ-ների բարելավման և արդիականացման կառուցակարգերը՝ «Համակարգչային ճարտարագիտություն» մասնագիտության օրինակով։ ԳՊՀ հաջողված փորձը ներկայացրին բուհի որակի ապահովման բաժնի վարիչ, պատմական գիտությունների թեկնածու Քանաքարա Հայրապետյանը, ինֆորմատիկայի և ֆիզիկամաթեմատիկական գիտությունների ամբիոնի վարիչ, տեխնիկական գիտությունների թեկնածու Վարազդատ Ավետիսյանը։

ԳՊՀ մասնագիտական կրթական ծրագրերի մշտադիտարկման  և բարելավման ընդհանուր սկզբունքները ներկայացրեց ուսումնագիտական գծով պրոռեկտոր Նելլի Կուտուզյանը՝ անդրադառնալով նաև համալսարանի ուսանողակենտրոն ուսուցման և արդյունավետ ուսումնառության գործընթացներին, որակի ապահովման ներբուհական համակարգին։

Քանաքարա Հայրապետյանը կրթական ծրագրի շարունակական բարելավման  գործընթացներում կարևորեց բոլոր շահառուների ներգրավվածությունը, նրանց կարծիքների և առաջարկությունների հավաքագրման ընթացակարգերը, որակի ապահովման ներքին շրջափուլը։

Վարազդատ Ավետիսյանը «Համակարգչային ճարտարագիտություն» կրթական ծրագրի օրինակով ներկայացրեց բուհում վերջնարդյունքահեն և աշխատանքահեն կրթության կազմակերպման փորձը, նախագծահեն ուսուցման և գնահատման մեթոդները, դասախոսների կողմից կիրառվող արդի տեխնոլոգիաները, արհեստական բանականությանը,  նորարարական զարգացումներին վերաբերող և ԳՊՀ-ում ներդրված  առարկաները, կատարված բովանդակային և կառուցվածքային փոփոխությունները՝ պայմանավորված գիտության և պրակտիկայի նվաճումներով, աշխատաշուկայի պահանջներով, բազմագրագետ մասնագետի պատրաստման հրամայականով։

«Պատմություն» մասնագիտության բակալավրի ՄԿԾ-ի բարելավման փորձը ներկայացրեց ԵՊՀ-ի Իջևանի մասնաճյուղի «Պատմություն» կրթական ծրագրի ղեկավար Նաթելլա Գրիգորյանը։

Աշխատաժողովի արդյունքներն ամփոփեց ՈԱԱԿ-ի տնօրեն Ռուբեն Թոփչյանը՝ կարևորելով կրթության որակի բարձր մշակույթի արմատավորմանը միտված  հանդիպումների և քննարկումների կազմակերպումը, բուհերի դրական փորձի ուսումնասիրումն ու տարածումը, խրախուսելով նոր նախաձեռնությունները։