Category: Без рубрики

Հարգելի՛ բարեկամներ, ստեղծագործող անհատներ, ուսուցիչներ և աշակերտներ, համալսարանականներ, սիրով հրավիրում ենք ձեզ՝ ներկա գտնվելու հոգեհմա պոեզիային նվիրված «Կյանքի հոգևոր-քնարական ընկալումները» խորագրով գրական ցերեկույթին, որը կկայանա ս․ թ․ մարտի 26-ին, ժամը՝ 12:00-ին, Գավառի պետական համալսարանի կենտրոնական մասնաշենքի Հրաչյա Աճառյանի անվան լսարանում։ Դուք հնարավորություն կունենաք հանդիպելու գրողների՝ բանաստեղծների և արձակագիրների, ծանոթանալու նրանց ստեղծագործ մտքին ու կենսափիլիսոփայությանը, լսելու մտորումներ կյանքի, աշխարհի հոգևոր-քնարական ընկալումների մասին: Սիրով սպասում ենք բոլոր ցանկացողներին։

Գավառի պետական համալսարանի բակալավրիատի և մագիստրատուրայի սիրելի՛ ուսանողներ, տեղեկացնում ենք ձեզ, որ Եվրոպական միության «Էրազմուս+» ծրագրի շրջանակում Գավառի պետական համալսարանի և Իսպանիայի Թագավորության Վալլադոլիդի համալսարանի միջև կնքված պայմանագրի համաձայն՝ դուք հնարավորություն ունեք 2026-2027 ուսումնական տարվա ընթացքում 5 ամիս ժամկետով ուսանելու Վալլադոլիդի համալսարանում: Անգլերեն լեզվի B2 մակարդակի իմացությունը պարտադիր է: Ծրագիրը շահառու ուսանողներին տրամադրում է անհատական կրթաթոշակ, ինչպես նաև հոգում է ճանապարհածախսը: Եվրոպական միության «Էրազմուս+» միջազգային կրեդիտային շարժունության կրթական ծրագրերի ցանկին կարող եք ծանոթանալ՝ այցելելով հետևյալ կայքէջ․ https://uvamobplus2.uva.es/publico/courses Ծրագրի դիմումներն ընդունվում են առցանց՝ հետևյալ հղումով․ https://uvamobplus2.uva.es/publico/apply

Դիմումների ընդունման վերջնաժամկետը 2026թ. մայիսի 5-ն է։

Լրացուցիչ տեղեկությունների համար կարող եք դիմել ԳՊՀ արտաքին կապերի եւ լրատվության բաժնին կամ զանգահարել +374-60-46-12-99 հեռախոսահամարով։ Մաղթում ենք հաջողություն։

Համալսարան-դպրոց համագործակցության ծրագրի շրջանակներում Գավառի պետական համալսարանում ներկայացվեց «Թումանյանի պատգամների խորհուրդն ու լույսը Հազարան բլբուլի որոնումներում» թեմայով իրականացված ինքնատիպ նախագծային աշխատանքը, որը կատարել էին Գավառի ավագ դպրոցի 10-րդ դասարանի աշակերտները՝ հայոց լեզվի և գրականության ուսուցչուհի Լիլիկ Հակոբյանի ղեկավարությամբ:

Միջոցառմանը ներկա էին Գավառի պետական համալսարանի վարչական և պրոֆեսորադասախոսական անձնակազմի անդամներ, ուսանողներ, Գավառի ավագ դպրոցի տնօրենի տեղակալ Արմինե Ղուլոյանը, ուսուցչուհիներ Ամալյա Զոլյանը և Լարիսա Ղազանչյանը, լաբորանտ Արմինե Ավագյանը, 11-րդ և 12-րդ դասարաննների աշակերտները:

Բովանդակալից ներկայացմանը մասնակցեցին Գավառի համայնքային գրադարանի մատենագետ Նորա Մարեմկոյանը, գրադարանավար, ԳՊՀ շրջանավարտ Լիլիթ Բալագյոզյանը, ինչպես նաև Գեղարքունիքի միջնակարգ դպրոցի 11-րդ և 12-րդ դասարանների աշակերտները՝ հայոց լեզվի և գրականության ուսուցչուհի, Գավառի պետական համալսարանի շրջանավարտ Գոհար Գեղամյանի ուղեկցությամբ:

Ներկաներին խորհրդավոր ճամփորդության հրավիրած աշակերտներն անդրադարձան կրթական նախագծի նպատակին ու առաքելությանը և փորձեցին պատասխանել այն հարցին, թե ինչպես գտնել մերօրյա Հազարան բլբուլին, առանց որի չորացած ու դատարկ է աշխարհի երբեմնի ծաղկազարդ ու շքեղ այգին: Աշակերտների խելացի հարցադրումներին դասախոսները և ուսուցիչները տվեցին բովանդակալից պատասխաններ՝ կարևորելով ազնվությունը, արիությունը, արդարամտությունը, ճշմարտությունը, բարությունը, սերն ու մարդկայնությունը, աշխատասիրությունը և անկեղծ նվիրվածությունը՝ որպես նպատակի իրականացման բանալիներ: «Հազարան բլբուլի» որոնումների բարդ ճանապարհը սովորեցնում է լինել քաջ, համառ ու նպատակասլաց, հաղթահարել փորձությունները՝ հավատարիմ մնալով թումանյանական պատգամներին։ Բոլոր կապանքները կարող են բանալ ազնիվ, բարի մղումներով, հաստատակամ ու նպատակասլաց անհատները և հույսի, հավատի, սիրո կանթեղները վառ պահած՝ լուսավորել, վերակենդանացնել մարդու հոգևոր արժեքներն ու բարոյական հաղթանակը խորհրդանշող Անմահության այգին:

Ներկայացումն ամփոփեց կրթական նախագծի հեղինակ Լիլիկ Հակոբյանը՝ կարևորելով դասական բնագրի դերը սովորողների արժեհամակարգը ձևավորելու, ճանաչողության սահմանները ընդլայնելու, ստեղծագործական, հետազոտական կարողությունները զարգացնելու հարցում: Ի նշան համալսարան-դպրոց շարունակական և արդյունավետ համագործակցության՝ նա Գավառի պետական համալսարանի ռեկտոր Ռուզաննա Հակոբյանին հանձեց «Մանկավարժական արարման և արժեհամակարգի ձևավորման մասին» խորհրդանշական ուղերձը և կատարված կրթական նախագծի արդյունքները՝ հանելուկների գիրքը՝ որպես հեքիաթի խորհրդանիշները մարմնավորող ստեղծագործական աշխատանք, ուխտի բանալիները՝ որպես աշակերտների արժեհամակարգի և կյանքի ուղու խորհրդանիշներ, սերմեր պարունակող գրիչը՝ որպես գիտելիքի ու բնության կապի խորհրդանիշ, և արագ արձագանքի թվանիշները (QR կոդերը)՝ որպես դասական բնագրի թվային հասանելիության ապահովում:

Ռուզաննա Հակոբյանը շնորհակալություն հայտնեց Գավառի ավագ դպրոցի նորարար ուսուցչուհի Լիլիկ Հակոբյանին և շնորհալի աշակերտներին՝ Հովհաննես Թումանյանի ստեղծագործությունը խորությամբ ուսումնասիրելու, նրա անանց պատգամները վեր հանելու և հետաքրքիր մտահղացումներով, ավանդականն ու արդիականը մեկտեղելով ներկայացնելու, հավերժական արժեքները որպես կյանքի ուղենիշ ընդունելու և տարածելու ուխտ կնքելու համար։

Սիրելի՛ համալսարանականներ, դպրոցների ուսուցիչներ և աշակերտներ, հրավիրում ենք բացահայտելու կրթության նոր հորիզոնները «Աշխարհացույց» կրթական հարթակի միջոցով։

Բաց դասը կվարի Սարուխանի Մ․ Խոստեղյանի անվան N 2 միջնակարգ դպրոցի պատմության ուսուցչուհի, Գավառի պետական համալսարանի շրջանավարտ Բալասան Սաքեյանը։

Բաց դասը կանցկացվի ս․ թ․ մարտի 20-ին՝ ժամը 12:00-ին, Գավառի պետական համալսարանի կենտրոնական մասնաշենքի Հրաչյա Աճառյանի անվան լսարանում:

Ցանկացողներին խնդրում ենք գրանցվել հետևյալ հղումով․

https://docs.google.com/forms/d/e/1FAIpQLSewqUZFjtvw-Q_ZK7YYYJ1vMMl6aXsu8P18nguy6-_dPokzCg/viewform

Գավառի պետական համալսարանի սիրելի՛ ուսանողներ, պրոֆեսորադասախոսական և վարչական  անձնակազմի հարգելի՛ անդամներ,  տեղեկացնում ենք ձեզ, որ Եվրոպական միության «Էրազմուս+» ծրագրի շրջանակում Գավառի պետական համալսարանի և եվրոպական գործընկեր բուհերի միջև կնքված  պայմանագրերի համաձայն՝ ԳՊՀ բակալավրիատի և մագիստրատուրայի ուսանողները հնարավորություն ունեն  2026-2027 ուսումնական տարվա 2-րդ կիսամյակում՝ 5 ամիս ժամկետով ուսանելու, իսկ պրոֆեսորադասախոսական և վարչական անձնակազմի անդամները՝ 2026-2027 ուստարվա 1-ին կիսամյակում դասավանդելու կամ վերապատրաստվելու Պորտուգալիայի Մինհո, Ավեյրո և Էվորա  համալսարաններում:

Անգլերեն լեզվի B2 մակարդակի իմացությունը պարտադիր է:

Ծրագիրը շահառու ԳՊՀ ուսանողներին և դասախոսներին տրամադրում է անհատական կրթաթոշակ, ինչպես նաև հոգում է ճանապարհածախսը: ԵՄ «Էրազմուս+» միջազգային կրեդիտային շարժունության ծրագրի մասին մանրամասն տեղեկատվություն կարող եք ստանալ՝ Application Guide  հղումով։

Ծրագրի դիմումներն ընդունվում են առցանց՝ հետևյալ հղումով․

https://uminho.moveonfr.com/form/67d170d4f484e754ea054497/eng :

Դիմումների ընդունման վերջնաժամկետը  2026թ. ապրիլի 10-ն է։ 

Լրացուցիչ տեղեկությունների համար կարող եք այցելել ԳՊՀ արտաքին կապերի և լրատվության բաժին կամ զանգահարել +374-60-46-12-99 հեռախոսահամարով։

Մաղթում ենք հաջողություն։