Սևանա կապուտաչ գեղեցկուհին Հայաստանի բնական հարստությունն է, որի հիմնախնդիրներն ուսումնասիրելը և ներկայացնելը կարևոր է երիտասարդների էկոլոգիական կրթության ու դաստիարակության համար։
Գավառի պետական համալսարանի «Ֆինանսներ» և «Տնտեսագիտություն» բաժինների 2-րդ կուրսի ուսանողները՝ ամբիոնի վարիչ Սամվել Ամիրխանյանի նախաձեռնությամբ, «Բնապահպանություն և բնօգտագործման տնտեսագիտություն» առարկայի շրջանակներում կազմակերպել էին բանավեճ՝ «Ձկնարդյունաբերությունը բացասաբա՞ր է ազդում Սևանա լճի վրա» թեմայով։
Բանավեճի դատավորներն էին՝ «Սևան Ակվա» ընկերության տնօրեն Արման Մարուխյանը, ԳՊՀ պրոռեկտոր Նելլի Կուտուզյանը, բնագիտատնտեսագիտական ֆակուլտետի դեկան, գյուղատնտեսական գիտությունների դոկտոր Մարտին Ավագյանը, հումանիտար մասնագիտությունների ֆակուլտետի դեկան Թաթուլ Ասոյանը, տնտեսագիտության թեկնածու, դոցենտ Սամվել Ամիրխանյանը։
Բանավեճի ընթացքում երկու թիմերը ներկայացրին իրենց հակադիր տեսակետները: «Դեմ» թիմը պնդում էր, որ ձկնարդյունաբերությունը նպատակահարմար է, քանի որ դրա միջոցով զարգանում է տնտեսությունը և ապահովվում են սոցիալ-տնտեսական մեծ օգուտներ բնակիչների համար։ Նրանք իրենց դիրքորոշումը հիմնավորեցին վիճակագրական տվյալներով՝ ցույց տալով, թե ինչպես է ձկնաբուծությունը նպաստում տեղական զբաղվածությանը և սննդի անվտանգությանը։
«Կողմ» թիմի կարծիքով ձկնարդյունաբերությունը բացասական ազդեցություն է ունենում լճի վրա, քանի որ հանգեցնում է լճի աղտոտմանը, կրճատում ձկան պաշարները և առաջացնում մի շարք բնապահպանական խնդիրներ։ Նրանք անդրադարձան ձկնաբուծության հետևանքով առաջացող օրգանական նյութերի կուտակմանը, ինչը բացասաբար է անդրադառնում լճի էկոհամակարգի, ջրի որակի և կենսաբազմազանության վրա։ Երկու թիմերն էլ ներկայացրին հետաքրքիր և հիմնավորված փաստարկներ։ Սակայն, «Դեմ» թիմը կարողացավ ավելի համոզիչ կերպով ցույց տալ, որ ձկնարդյունաբերության տնտեսական օգուտները կարող են համատեղվել բնապահպանական պատասխանատու մոտեցումների հետ։ Նրանք առաջարկեցին նաև կայուն ձկնաբուծության մոդելներ, որոնք կնվազեցնեն բացասական ազդեցությունը Սևանա լճի վրա՝ միաժամանակ պահպանելով սոցիալ-տնտեսական օգուտները։
Արդյունքում հաղթող ճանաչվեց «Դեմ» թիմը։ Դատավորները շնորհավորեցին բոլոր մասնակիցներին՝ նշելով, որ բանավեճերին մասնակցելը նպաստում են ուսանողների մասնագիտական և հետազոտական կարողությունների զարգացմանը, խթանում վերլուծական, քննադատական մտածողությունը։
ԳՊՀ-ում քննարկվեց Եվրոպական միության «ERASMUS +T-GREEN» ծրագրի շրջանակում ներդրվող նոր՝ «Կանաչ տնտեսություն և կայուն զարգացում» մագիստրոսական կրթական ծրագիրը, որը Գավառի պետական համալսարանը մշակելու է Հայաստանի պետական տնտեսագիտական համալսարանի հետ համատեղ։ Ծրագրի կոնսորցիումի առաջարկով ՀՀ ԿԳՄՍ նախարարի հրամանով համալրվել է ՀՀ մագիստրոսական կրթական ծրագրերի ցանկը «Կանաչ տնտեսություն և կայուն զարգացում», «Շրջանաձև տնտեսություն և կառավարում», «Կայուն զարգացման տնտեսագիտություն և կառավարում», «Կանաչ տնտեսության ռազմավարական կառավարում» կրթական ծրագրերով։
ԳՊՀ աշխատանքային թիմը քննարկեց նոր կրթական ծրագրի ուսումնական պլանը, առարկաների ցանկը, կրթական ծրագրի իրականացման լիցենզիայի համար պահանջվող փաստաթղթերի փաթեթը, անհրաժեշտ ռեսուրսները, հստակեցվեցին բովանդակային և կազմակերպչական հարցեր։
Գավառի պետական համալսարանի ռեկտորատի նիստում քննարկվեցին «ERASMUS + T-GREEN» և «ERASMUS + KPI4HE» ծրագրերը։ Ռեկտոր Ռուզաննա Հակոբյանը նշեց, որ Եվրոպական միության ծրագրերը նպաստում են բուհերի կարողությունների զարգացմանը, մասնագիտությունների արդիականացմանը, ուսումնական պլանների բարելավմանը, «կանաչ» կրթության հայեցակարգի կենսագործմանը, բարձրագույն կրթության արդյունավետության ցուցիչների համակարգի ներդրմանը։
Ուսումնագիտական գծով պրոռեկտոր Նելլի Կուտուզյանը ներկայացրեց ս. թ. մարտի 25-ից 28-ը Իտալիայի Հանրապետության Ջենովայի համալսարանում կայացած աշխատաժողովի արդյունքները։
ԳՊՀ արտաքին կապերի և լրատվության բաժնի վարիչ Լիլիթ Թոռչյանը ներկայացրեց ԵՄ «ERASMUS + T-GREEN» և «ERASMUS + KPI4HE» ծրագրերի շրջանակում նախատեսված աշխատանքները, ծրագրերի գործողությունների պլանով սահմանված վերջնաժամկետները։ ԳՊՀ ռեկտորատի նիստում քննարկվեցին ծրագրերի իրականացման հետ կապված հարցեր։
ԳՊՀ-ում Եվրոպական միության ծրագրերի ընթացիկ արդյունքների քննարկումները և կատարված աշխատանքի հաշվետվությունները, անելիքների նախանշումը և գործողությունների հստակեցումը կրում են շարունակական բնույթ։
Սույն թվականի ապրիլի 19-ին Գավառի պետական համալսարանում մեկնարկեց ժամանակի ամենաարդիական թեմաներից մեկին վերաբերվող «Արհեստական բանականության գրագիտություն» վերապատրաստման դասընթացը՝ նպատակ ունենալով խթանել AI-ի (արհեստական բանականության) վերաբերյալ գիտելիքների և գործնական հմտությունների տարածումը պրոֆեսորադասախոսական կազմի և աշխատակիցների շրջանում։
Դասընթացը վարում է ԳՊՀ Ինֆորմատիկայի և ֆիզիկամաթեմատիկական գիտությունների ամբիոնի վարիչ, տեխնիկական գիտությունների թեկնածու Վարազդատ Ավետիսյանը։
Դասընթացն անցկացվում է աշխատարանների (workshop) ձևաչափով, ինչը հնարավորություն է տալիս մասնակիցներին լսարանում մասնագիտական խնդիրների լուծման համար կիրառել ԱԲ գործիքները։
Դասընթացի հիմնական թեմաներն են՝ գեներատիվ ԱԲ գործիքներով հետազոտական աշխատանքների իրականացում, փաստաթղթերի, տվյալների ինետելեկտուալ վերլուծություն, շնորհանդեսների, մեդիանյութերի մշակում, արդյունավետ հրահանգների մշակում (Prompt Engineering):
Ս․ թ․ ապրիլի 17-ին Մասնագիտական կրթության որակի ապահովման ազգային կենտրոնի /ՈԱԱԿ/ նախաձեռնությամբ կայացավ քննարկում հավատարմագրված բուհերի ներկայացուցիչների հետ՝ նվիրված մասնագիտական կրթական ծրագրերի ներքին փորձաքննությանը։ Քննարկման նպատակը կրթական ծրագրերի ներքին աուդիտի խնդիրների և դժվարությունների վերհանումն էր։
ՈԱԱԿ տնօրեն Ռուբեն Թոփչյանը ներկայացրեց մասնագիտական կրթական ծրագրերի գնահատման բաղադրիչները՝ վերջնարդյունքների ձեռքբերում, ուսանողների գնահատում, ուսանողակենտրոնություն, գործատուների մասնակցություն, հետազոտություն, ավարտական աշխատանքների գնահատման չափանիշների համապատասախանությունը ոլորտին։ Նրա կողմից կարևորվեց աուդիտի իրականացման գործընթացի մշտադիտարկումը, որը հնարավորություն կընձեռի պատկերացում կազմել, թե բուհերի կրթական ծրագրերի ո՞ր մասն է ենթարկվել աուդիտի, ինչպե՞ս է իրականացվել փորձագետների ընտրությունը, ծրագրերի ո՞ր բաղադրիչներն են գնահատման առանցքում։ Բուհերին առաջարկվեց նաև ներկայացնել ներքին փորձաքննության իրենց փորձը։
Գավառի պետական համալսարանից քննարկմանը մասնակցեց ակադեմիական քաղաքականության բաժնի վարիչ Օլգա Ղազարյանը։ ԳՊՀ-ում կրթական ծրագրերի ներքին փորձաքնննությունն՝ արտաքին փորձագետների ներգրավմամբ, ընթացքի մեջ է։
