Գավառի պետական համալսարանում կայացավ ցերեկույթ՝ ‹‹Պատմության խաչուղիներով›› խորագրով, նվիրված Հայոց ցեղասպանության 109-րդ տարելիցին։
Մասնակիցները Գավառի պետական համալսարանի հումանիտար մասնագիտությունների ֆակուլտետի ուսանողներն էին։
Միջոցառմանը ներկա էին ԳՊՀ պրոֆեսորադասախոսական և վարչական անձնակազմի անդամներ, Սարուխանի Հայկազ Խաչատրյանի անվան թիվ 3 միջնակարգ դպրոցի աշակերտները՝ պատմության ուսուցչուհի Աննա Տեր-Ղազարյանի ուղեկցությամբ։
Ուսանողները շնորհանդեսի միջոցով ներկայացրին Եղեռնի ահասարսուռ տեսարանները, որոնք թուրքական պետության՝ հայերի դեմ իրականացրած ցեղասպան քաղաքականության բացառիկ ապացույցներ են: Դրանք նաև անհերքելի ու եղկելի փաստեր են իրագործված ծանրագույն ոճրագործությունը դատապարտելու և դրա հետևանքների շուրջ խորհելու, ճանաչելու ու գործելու՝ հետայսու մարդկության և մարդկայնության դեմ ուղղված հանցագործությունները կանխելու նպատակով:
Հուզիչ կատարումներով հանդես եկան Գավառի Հայրապետ Խաչատրյանի անվան արվեստի դպրոցի վոկալ բաժնի ուսուցիչ, Երևանի Կոմիտասի անվան պետական կոնսերվատորիայի ուսանող Գրիգոր Բալագոզյանը, արվեստի դպրոցի սան Հասմիկ Գափոյանը, Գավառի պետական երաժշտական քոլեջի դուդուկահարներ Վահե Ստեփանյանը և Գուրգեն Արզունյանը։
Ցերեկույթն ամփոփվեց այն մեծ հավատով, որ պատմական ճշմարտությունն ու արդարությունը հիվանդանում են, սակայն չեն մահանում, ուստի գողգոթայով անցած և պատմության խաչուղիներով երրորդ հազարամյակ հասած հայ ժողովուրդն արդարության հաստատման իր ազնիվ մղումով հասնելու է հաղթանակի, քանզի դեպ արդարություն տանող ճանապարհը որքան էլ բարդ է ու խոչընդոտներով լեցուն, միևնույն է՝ աննահանջ է, օրհնյալ ու լուսավոր: Եղիցի լույս։
Գավառ համայնքի բնակիչ Ռազմիկ Մելոյանի հեղինակությամբ լույս է տեսել Նոր Բայազետ-Գավառ քաղաքին նվիրված գիրքը, որը վերաբերում է Հայրենական Մեծ պատերազմի ավարտից մինչև մեր օրերն ընկած ժամանակահատվածին։ Գիրքը բովանդակում է փաստագրական տեղեկություններ Գավառի անցյալի ու ներկայի, եկեղեցիների, դպրոցների, Գավառի պետական համալսարանի, Գեղարքունիքի երկրագիտական թանգարանի, գրադարանների, թատրոնի, այլ մշակութային կառույցների, հիմնարկ-ձեռնարկությունների մասին։ Ներկայացվում են նշանավոր նորբայազետցիները, որոնք մեծ ներդրում են ունեցել Հայաստանի Հանրապետության կրթության, գիտության, առողջապահության, մշակույթի, սպորտի, տնտեսության և այլ ոլորտներում։ Հեղինակը սիրով անդրադառնում է իր հայրենակիցներին՝ ճանաչված մտավորականներին, քաղաքական ու ռազմական գործիչներին, Գավառի պատվավոր քաղաքացիներին և նրանց ազգանվեր գործունեությանը։
Գրքի խմբագիրը Հայաստանի գրողների միության անդամ, հրապարակախոս, արձակագիր, Հայաստանի վաստակավոր լրագրող Տիգրան Նիկողոսյանն է, առաջաբանի հեղինակը՝ Գավառի պետական համալսարանի հումանիտար մասնագիտությունների ֆակուլտետի դեկան, փիլիսոփայական գիտությունների թեկնածու Համլետ Ղաջոյանը։ Գիրքը հրատարակվել է Հացառատի զարգացման հիմնադրամի հովանավորությամբ։
Շնորհավորում ենք հեղինակին, ով հայրենանվեր գործ է կատարել՝ ընթերցողներին ներկայացնելով և հանրահռչակելով հայրենի եզերքի պատմությունը, սերունդներին փոխանցելով հուշագրություններ Գավառի հիշարժան դեպքերի վերաբերյալ։
Սիրելի՛ դասախոսներ, ուսուցիչներ, ուսանողներ, ս․ թ․ ապրիլի 27-ին, ժամը 14։30-ին հրավիրում ենք ձեզ Գավառի պետական համալսարան՝ մասնակցելու «Փոխներգործուն (ինտերակտիվ) կրթության մեթոդներ և գործիքներ» թեմայով վերապատրաստման դասընթացին։
Դասընթացը կվարի կրթության փորձագետ, մեթոդաբան Արեգ Թադևոսյանը։ Վերապատրաստումը կանցկացվի համալսարանի կենտրոնական մասնաշենքում՝ ԳՊՀ գիտական խորհրդի նիստերի դահլիճում։
Ցանկացողները կարող են մասնակցել նաև առցանց ձևաչափով՝ հետևյալ հղմամբ.
https://zoom.us/j/3897702958?pwd=WS9UblF1MjJqSSsrVFlNQjdaUG5CQT09
Ս. թ. մարտի 29-ին կայացավ Հայաստանի գործատուների հանրապետական միության 16 ամյակի շնորհանդեսը և Հերթական 6-րդ համագումարը, որի ընթացքում ՀԳՀՄ նախագահ Գագիկ Մակարյանը ամփոփեց ՀԳՀՄ 16 տարիների գործունեությունը և հիմնական նվաճումները, ներկայացրեց վերջին 3 տարիների հաշվետվությունը 2021-2024թթ․ համար ըստ գործունեության 41 ուղղությունների, ներկա մարտահրավերները և ապագա զարգացման հնարավորությունները։
Միջոցառմանը մասնակցում էին մոտ 140 պատվիրակներ ՀԳՀՄ ճյուղային և տարածքային միություններից և ՀԳՀՄ ուղիղ անդամներից, ինչպես նաև պետական մարմինների, միջազգային կազմակերպությունների, ՀԿ-ների և այլ ՀԳՀՄ գործընկերների ներկայացուցիչներ։
Միջոցառման ընթացքում ելույթ ունեցան գործընկեր պետական մարմինների ներկայացուցիչներ, Աշխատանքի միջազգային կազմակերպության ազգային համակարգողը, ՀԳՀՄ Խորհրդի անդամներ, կրթական հաստատությունների ղեկավարներ, գործատուներ, տնտեսագետներ և այլն։ Գործընկերների կողմից հնչեցին գնահատականներ և ելույթներ ՀԳՀՄ կարևոր դերակատարության և գործունեության լայն շրջանակի վերաբերյալ՝ որպես գործարար համայնքի շահերը պաշտպանող և սոցիալ-տնտեսական խնդիրները բարձրաձայնող կառույց, որը միաժամանակ առաջարկում է դրանց լուծման բազմազան առաջարկներ և զարգացման հնարավորություններ։
Միջոցառմանը ներկա էին նաև Գավառի պետական համալսարանի ԳՊՀ բնագիտատնտեսագիտական ֆակուլտետի կառավարման և ֆինանսների ամբիոնի վարիչ, տնտեսագիտության թեկնածու, դոցենտ Սամվել Ամիրխանյանը և հաշվապահական հաշվառման ամբիոնի վարիչ, տնտեսագիտության թեկնածու, դոցենտ Հակոբ Ղուլոյանը։
Միջոցառմանը ելույթ ունեցավ և գործատուների միության գործունեությունը կարևորեց պարոն Ամիրխանյանը։
