Рубрика: Без рубрики

Գավառի պետական համալսարանի ռեկտորատը խորին շնորհակալություն է հայտնում «Գեղամա աշխարհ» թերթի խմբագրապետ Խոսրով Խլղաթյանին՝ ԳՊՀ Վարշամ Ավետյանի անվան պատմագիտական թանգարանի հավաքածուի համալրման և Գեղարքունիքի տարածաշրջանի պատմամշակութային արժեքների պահպանման, պատմական ժառանգության հանրահռչակման գործում ունեցած անգնահատելի ներդրման համար։Պարոն Խլղաթյանը Գավառի պետական համալսարանի թանգարանին նվիրաբերեց ՀՀ Գեղարքունիքի և Տավուշի մարզերի  պատմամշակութային հնավայրերից հայտնաբերված հնագիտական արժեքներ՝ համալրելով թանգարանի հավաքածուն։Նվիրաբերված հնագիտական գտածոների շարքում են Ձորագյուղի «Սանգար» ամրոցի և դրա շրջակայքի հնավայրերից ու Տավուշի մարզի Ցլիկ Ամրամի բերդի հնավայրից հայտնաբերված խեցեղենի բեկորներ։ «Սանգար» կիկլոպյան ամրոցը գտնվում է Ձորագյուղից մոտ 1,7 կմ դեպի արևմուտք և թվագրվում է Ք.ա. II–I հազարամյակներով։ Այն համարվում է Սևանի ավազանի կարևոր ամրաշինական կառույցներից մեկը։ Ամրոցի և շրջակայքի հնավայրերի տարածքում պահպանվել են հնագույն բնակավայրերի, քարայր-կացարանների և դամբարանների հետքեր։

 Ինչպես նշեց իր գործի նվիրյալ Խոսրով Խլղաթյանը, հնավայրի քարանձավներից հայտնաբերված նյութերի շարքում են կավամանների բազմաթիվ բեկորներ, օբսիդիանի կտորներ և կենդանիների ոսկորներ։ Պարոն Խլղաթյանի կողմից հնավայրից հավաքված խեցեղենի որոշ նմուշների լուսանկարները մասնագիտական թվագրման նպատակով ուղարկվել են Հնագիտության և ազգագրության ինստիտուտի տնօրեն, հնագետ Արսեն Բոբոխյանին։ Ստացված մասնագիտական եզրակացության համաձայն՝ ԳՊՀ թանգարանին փոխանցված խեցեգործական իրերը թվագրվում են նախաուրարտական շրջանից  մինչև Ք. հ. III դարեր։

Նվերների ցանկում ներառված է նաև Տավուշի բերդի կամ Ցլիկ Ամրամի բերդի հնավայրից հայտնաբերված խեցեղենի նմուշ։ Տավուշի բերդը միջնադարյան ամրոց է, որը գտնվում է ներկայիս Բերդ քաղաքի ծայրամասում։ Պատմական աղբյուրներում այն առաջին անգամ հիշատակվում է X դարի սկզբին՝ որպես Հայոց թագավոր Աշոտ Բ Երկաթի կուսակալների նստավայր։ Բերդի տարածքում մինչ օրս հայտնաբերվում են կավից պատրաստված սպասք և այլ իրեղեն գտածոներ, ինչը փաստում է հնավայրի նյութական մշակույթի հարուստ շերտերի առկայությունը։

Նման նվիրատվությունները կարևոր նշանակություն ունեն հայ ժողովրդի պատմամշակութային ժառանգության պահպանման, ուսումնասիրման և հանրահռչակման համար։ Հնագիտական գտածոները երիտասարդներին հնարավորություն են տալիս՝ հաղորդակից դառնալու տարածաշրջանի և Հայաստանի պատմական անցյալին, ինչպես նաև առավել ամբողջական պատկերացում կազմելու տարբեր ժամանակաշրջաններում ձևավորված նյութական մշակույթի մասին։

Գավառագետի ափին՝ «Թթու ջուր» կոչվող տարածքում կայացած «Գաստրոփառատոն Գավառ․ Գավառի համն ու հոտը» փառատոնին իրենց ակտիվ մասնակցությունն ունեցան Գավառի պետական համալսարանի ներկայացուցիչները։ Փառատոնի նպատակն էր Գավառի ավանդական ուտեստների, խաղերի, երգերի ու պարերի վերհանումը, ներկայացումը, տարածումն ու պահպանումը։
Փառատոնի ընթացքում տեղի ունեցան Գավառի ավանդական ուտեստների՝ քյուֆթայի, նումբարի, փախլավայի, գաթայի պատրաստման վարպետաց դասեր, որոնց հնարավորություն ունեցան մասնակցել նաև հյուրերը։
Փառատոնի գլխավոր կազմակերպիչը և գաղափարի հեղինակը ԳՊՀ Կենսաբանության, էկոլոգիայի և առողջ ապրելակերպի ամբիոնի դասախոս Լալա Մկրտչյանն էր։ Փառատոնն իրականացվեց Գավառի համայնքապետարանի և «Սարվոր» զբոսաշրջային, սոցիալ-կրթական, բնապահպանական հասարակական կազմակերպության կողմից՝ Գավառի համայնքապետարանի ֆինանսավորմամբ ու աջակցությամբ։ Փառատոնին մասնակցեցին ԳՊՀ բնագիտատնտեսագիտական ֆակուլտետի դեկան, գյուղատնտեսական գիտությունների դոկտոր, դոցենտ Մարտին Ավագյանը, դեկանի տեղակալ Մելանյա Գարեյանը, Կենսաբանության, էկոլոգիայի և առողջ ապրելակերպի ամբիոնի դասախոս, աշխարհագրական գիտությունների դոկտոր, պրոֆեսոր Արամայիս Ավագյանը, բուհի աշխատակիցներ։
Գավառի պետական համալսարանի «Սերվիս» բաժնի ուսանողները՝ որպես կամավորներ ներգրավվեցին փառատոնի կազմակերպման աշխատանքներին, հանդես եկան որպես հյուրընկալ անձինք՝ տեղացի և արտասահմանցի հյուրերին ներկայացնելով Գավառի տարածաշրջանի խոհանոցին բնորոշ կերակրատեսակները, համ ու հոտի հրաշալի մշակույթը։ Նրանք ձեռք բերեցին գործնական կարևոր գիտելիքներ ու հմտություններ, մասնագիտական աշխատանքի փորձ։

Ս․ թ․ սեպտեմբերի 4-ին Գավառի պետական համալսարանը հյուրընկալեց ԱՄՆ Վաշինգթոնի համալսարանի Ամերիկյան էթնիկ հետազոտությունների բաժնի վարիչ, դասախոս Ռիկ Բոնուսին և Ռուս-հայկական համալսարանի Համաշխարհային պատմության ամբիոնի դասախոս Իվան Դանիլովին։ Հյուրերը հանդիպեցին Գավառի պետական համալսարանի ռեկտոր Ռուզաննա Հակոբյանին։ Հանդիպման ընթացքում քննարկվեցին համագործակցության հնարավորությունները, ակադեմիական փոխանակման ծրագրերի իրականացման հեռանկարները։
Ռիկ Բոնուսը և Իվան Դանիլովը անցկացրին սեմինար-քննարկում ԳՊՀ ուսանողների հետ։
Հյուրերն այցելեցին Գավառի պետական համալսարանի պատմագիտական թանգարան։

Գավառի պետական համալսարանում նշվեց սեպտեմբերմեկյան տոնը՝ Գիտելիքի և դպրության օրը։ ԳՊՀ-ում 2026-2027 ուստարին մեկնարկեց «Կրթությունը՝ կայացման ուղի» կարգախոսով։ Համալսարանի ռեկտոր Ռուզաննա Հակոբյանը ջերմորեն շնորհավորեց ուսանողներին և դասախոսներին՝ մաղթելով գիտելիքներով, արդյունավետ ուսումնառությամբ և ստեղծագործ աշխատանքով, նոր ձեռքբերումներով ու հաջողություններով առլեցուն ուսումնական տարի։ Տիկին Հակոբյանը բարձր միավորներ ստացած առաջին կուրսեցիներին հանձնեց «Էջեր Գավառի պետական համալսարանի հիմնադրման պատմությունից» գիրքը, որի հեղինակն է բուհի հիմնադիր-ռեկտոր, փիլիսոփայական գիտությունների դոկտոր, պրոֆեսոր, ՀՀ վաստակավոր մանկավարժ, Գավառի պատվավոր քաղաքացի Հրանտ Խաչատուրի Հակոբյանը։ Առաջին կուրսեցիները երդմամբ ստանձնեցին խորը գիտելիքներ ձեռք բերելու և համալսարանականի կոչումը պատվով կրելու պատասխանատվությունը, ապա 4-րդ կուրսի ուսանողները գիտելիքի աշխարհ տանող խորհրդանշական բանալին հանձնեցին առաջին կուրսեցիներին՝ որպես ավագ սերնդից նոր սերնդին գիտելիքի, փորձի և համալսարանական արժեքների փոխանցման առհավատչյա։ Հումանիտար մասնագիտությունների ֆակուլտետի ուսանողական խորհրդի նախագահ, «Անգլերեն լեզու և գրականություն» մասնագիտության 4-րդ կուրսի ուսանողուհի Անի Մանուկյանը և նույն ֆակուլտետի մագիստրատուրայի «Անգլերեն լեզու և գրականություն» մասնագիտության մագիստրատուրայի 2-րդ կուրսի ուսանողուհի Աիդա Կարապետյանը նշեցին, որ գիտելիքի աշխարհ տանող բանալին բացում է հաջողության, մասնագիտական կայացման ու առաջընթացի, ինչպես նաև ժամանակակից տեխնոլոգիաների և արհեստական բանականության ընձեռած հնարավորությունների դռները։
Երաժշտական կատարումներով հանդես եկան ԳՊՀ ուսանող Աշոտ Կատվալյանը և Գավառի երաժշտական դպրոցի վոկալ բաժնի սան Հայրապետ Հայրապետյանը։
Նոր ուսումնական տարվա առաջին զանգի ղողանջների ներքո առաջին կուրսեցիները մասնակցեցին կրեդիտային համակարգով ուսումնառության սկզբունքների և ԳՊՀ էլեկտրոնային ուսուցման համակարգի վերաբերյալ դասին, որը վարեցին բուհի ուսումնագիտական գծով պրոռեկտոր Նելլի Կուտուզյանը և տեղեկատվական տեխնոլոգիաների բաժնի վարիչ Մարգար Հովհաննիսյանը։

Նոր ուսումնական տարվա մեկնարկին ընդառաջ Գավառի պետական համալսարանում տեղի ունեցավ հանդիպում առաջին կուրսեցիների և նրանց ծնողների հետ։ Ողջույնի խոսքով հանդես եկավ ԳՊՀ ռեկտոր Ռուզաննա Հակոբյանը՝ շնորհավորելով առաջին կուրսեցիներին Գավառի պետական համալսարանի ընտանիքը համալրելու կապակցությամբ՝ կարևորելով նրանց կյանքի նոր և պատասխանատու փուլը։ ԳՊՀ պրոռեկտոր Նելլի Կուտուզյանը, դեկաններ Մարտին Ավագյանն ու Թաթուլ Ասոյանը, ամբիոնի վարիչներ Համլետ Ղաջոյանն ու Սամվել Ամիրխանյանը ներկայացրին համալսարանում ուսումնական գործընթացի կազմակերպման առանձնահատկությունները, բուհի ընձեռած հնարավորությունները, սոցիալական աջակցության ծրագրերը, միջազգային համագործակցության ուղղությունները, պատասխանեցին հուզող հարցերին։

ԳՊՀ էլեկտրոնային ուսուցման՝ «Learn.gsu.am» համակարգը և էլեկտրոնային գրադարանը ներկայացրեց համալսարանի տեղեկատվական տեխնոլոգիաների բաժնի վարիչ Մարգար Հովհաննիսյանը։ Հանդիպման ավարտին ուսանողներին տրամադրվեցին տեղեկատվական թերթիկներ:

 

Ջերմորեն շնորհավորում ենք ընդունելության քննությունները հաջողությամբ հանձնած և Գավառի պետական համալսարանի բակալավրիատ ընդունված բոլոր դիմորդներին՝ մաղթելով արդյունավետ ուսումնառություն։

2026-2027 ուսումնական տարեշրջանին ընդառաջ ԳՊՀ առաջին կուրսեցիներին և նրանց ծնողներին սիրով հրավիրում ենք ռեկտորատի անդամների հետ հանդիպման, որը տեղի կունենա ս․ թ․ օգոստոսի 30-ին, ժամը՝ 12։00-ին,  համալսարանի կենտրոնական մասնաշենքի Հրաչյա Աճառյանի անվան լսարանում /3-րդ հարկ, 316 լսարան/։

 

ԳՊՀ արտաքին կապերի և լրատվության բաժին

Գավառի պետական համալսարանի գիտական խորհրդի, համահիմնադիր Հրանուշ Հակոբյանի, ռեկտորատի, վարչական, պրոֆեսորադասախոսական և ուսանողական անձնակազմի անունից խորապես ցավակցում ենք Սիմոնյանների ընտանիքին, բոլոր մերձավորներին՝ բազմավաստակ գիտնական ու մանկավարժ, Գավառի պետական համալսարանի պատվավոր պրոֆեսոր, ԳՊՀ կենսաբանության, էկոլոգիայի և առողջ ապրելակերպի ամբիոնի հիմնադիր վարիչ, կենսաբանական գիտությունների դոկտոր, պրոֆեսոր, Հայաստանի Հանրապետության գիտության վաստակավոր գործիչ, Գավառ քաղաքի պատվավոր քաղաքացի Արմեն Արշալույսի Սիմոնյանի երկրային կյանքի ավարտի կապակցությամբ:

Գավառի պետական համալսարանի հիմնադիր ռեկտոր Հրանտ Խաչատուրի Հակոբյանի հրավերով նա ձեռնամուխ եղավ բուհի բնագիտական ֆակուլտետի կենսաբանության, էկոլոգիայի և առողջ ապրելակերպի ամբիոնի կայացմանը և 26 տարի շարունակ աշխատեց ԳՊՀ-ում ամենայն պատասխանատվությամբ, մեծ սիրով և նվիրումով: Պրոֆեսոր Սիմոնյանը ծնվել է 1932 թվականին, Գավառ քաղաքում` ուսուցչի ընտանիքում: Գերազանցությամբ ավարտել է Երևանի պետական համալսարանի կենսաբանության ֆակուլտետը և 1960 թվականից մինչ 2019 թվականն աշխատել է ՀՀ Գիտությունների ազգային ակադեմիայի Հրաչյա Բունիաթյանի անվան կենսաքիմիայի ինստիտուտում՝ որպես Սաղմնաքիմիայի լաբորատորիայի վարիչ, միաժամանակ Գավառի պետական համալսարանում՝ որպես կենսաբանության, էկոլոգիայի և առողջ ապրելակերպի ամբիոնի վարիչ:

Արմեն Սիմոնյանը, անցնելով ակադեմիկոս Հրաչյա Բունիաթյանի ստեղծած հայկական կենսաքիմիական և Մոսկվայի Մ. Լոմոնոսովի անվան պետական համալսարանում ակադեմիկոս Ս. Սևերինի ու ակադեմիկոս Վ. Սկուլաչյովի կենսաքիմիական ու կենսաէներգետիկական գիտական դպրոցները, Հայաստանում ստեղծել է էվոլյուցիոն կենսաէներգետիկական ուղղությունը և կենսաէներգետիկների իր դպրոցը:

Պրոֆեսորը զեկուցումներով մասնակցել է Եվրոպական կենսաքիմիական ընկերության մի շարք կոնգրեսների աշխատանքներին: Առանձին զեկուցումներով հանդես է եկել Պրահայի, Լայպցիգի, Գյոթեբորգի, Ստոկհոլմի, Բեռլինի համալսարաններում:

Ավելի քան 400 գիտական աշխատանքների (որոնց մի մասը անգլերեն լեզվով) և  մենագրությունների հեղինակ է:

Արգասաբեր է նաև պրոֆեսոր Ա. Սիմոնյանի աշխատանքը մասնագիտական բառարանագրության և հայերեն ժամանակակից կենսաբանական միասնական տերմինաբանություն ստեղծելու բնագավառում:

Արմեն Սիմոնյանը ակադեմիկոս Ա. Գալոյանի հետ համահեղինակությամբ կազմել է «Ռուս-հայերեն կենսաքիմիական բացատրական բառարան» (500 էջ), որն իր տեսակի մեջ միակն է հայերեն լեզվով, և որի բառացանկի մեջ ներառվել են կենսաքիմիայի և մոլեկուլային կենսաբանության մեջ օգտագործվող ավելի քան 5000 տերմիններ ու հասկացություններ, տրվել են դրանց բացատրությունները, և մշակվել է հայերեն միասնական կենսաքիմիական տերմինաբանություն:

Առանձնահատուկ ուշադրության է արժանի Արմեն Սիմոնյանի՝ ԳՊՀ պրոֆեսոր, կենսաբանական գիտությունների թեկնածու, դոցենտ Իդա Բատիկյանի հետ համահեղինակությամբ հրատարակած «Ռուս-հայերեն-անգլերեն կենսաբանական բառարանը» (900 էջ)։ Բառարանը ներառում է կենսաբանության տարբեր բնագավառների վերաբերյալ ավելի քան 8000 տերմին։

Պարոն Սիմոնյանի ղեկավարությամբ պաշտպանվել են մեկ տասնյակ թեկնածուական ատենախոսություններ:

Հիմնադրել է Կենսաբանության, էկոլոգիայի և առողջ ապրելակերպի ամբիոնը, հետևողական աշխատանք կատարել երիտասարդ կենսաբան և էկոլոգ մասնագետների պատրաստման գործում` միաժամանակ ամրապնդելով բուհի և ԳԱԱ կենսաքիմիայի ինստիտուտի համագործակցությունը:

Գավառ համայնքի ավագանու որոշմամբ՝ գիտական, հասարակական ակտիվ գործունեության համար պրոֆեսոր Սիմոնյանին շնորհվել է Գավառի պատվավոր քաղաքացու կոչում: Իսկ Գավառի պետական համալսարանի գիտական խորհրդի որոշմամբ համալսարանի մատուցած ծառայությունների, գիտամանկավարժական անուրանալի վաստակի համար Արմեն Սիմոնյանին շնորհվել է Գավառի պետական համալսարանի պատվավոր պրոֆեսորի կոչում:

Պրոֆեսորը կենսաքիմիայի ինստիտուտի և Գավառի պետական համալսարանի գիտական խորհուրդների, ինչպես նաև կենսաքիմիկոսների հանրապետական ասոցիացիայի ու նախագահության անդամ է եղել։

Հաշվի առնելով պրոֆեսորի գիտական ծանրակշիռ ներդրումը հանրապետությունում էվոլյուցիոն կենսաէներգետիկայի ուղղության ստեղծման ու զարգացման, գիտական կադրերի պատրաստման, գյուղատնտեսության մեջ գիտական արդյունքների ներդրման գործում, մասնագիտական բառարանագրության մեջ ունեցած հսկայական ավանդը, ինչպես նաև բուհական համակարգում մեծ վաստակը՝ Գավառի պետական համալսարանի գիտական խորհրդի և ՀՀ կրթության և գիտության նախարարի միջնորդությամբ Հայաստանի Հանրապետության Նախագահի հրամանագրով Արմեն Սիմոնյանին շնորհվել է ՀՀ գիտության վաստակավոր գործչի պատվավոր կոչում:

Պրոֆեսոր Սիմոնյանը միշտ կմնա որպես մարդու, գիտնականի և ուսուցչի  վեհ օրինակ։

Գավառի պետական համալսարանի ռեկտորատ

 

 

Սիրելի՛ ուսանողներ, տեղեկացնում ենք, որ ՀՀ ԲՏԱ նախարարության և «Cisco Networking Academy»-ի միջև կնքված համագործակցության հուշագրի շրջանակում նախատեսվում է Հայաստանում իրականացնել ամառային ճամբար հետևյալ ուղղություններով՝

«Introduction to Cybersecurity,

Art of Investigation,

Introduction to Modern AI,

Update Your Resume with AI,

Digital Awareness»։

Ամառային ճամբարի շրջանակում դասընթացները անցկացվելու են առցանց, մասնակցությունն անվճար է, իսկ հաջողությամբ քննություն հանձնած ուսանողները կստանան հավաստատգրեր «Cisco» միջազգային հեղինակավոր ընկերությունից։

Կարող եք մասնակցել դասընթացներին՝ գրանցվելով հետևյալ հղումով՝

https://docs.google.com/forms/d/e/1FAIpQLSeD1BtdrycM4XvabN94QBYudNsG28KwEokrH40hLCCqcKLDKQ/viewform

Հարցերի դեպքում դիմեք Թվային տնտեսության ինստիտուտին /Հեռախոս՝ +374 91-91-50-05/։

ԳՊՀ արտաքին կապերի և լրատվության բաժին

 

 

Գավառի պետական համալսարանի հարգելի՛ ուսանողներ,

Կենսաբազմազանության հարցերով հայկական բուհերի կոալիցիան մեկնարկում է «Կենսաբազմազանության դեսպաններ» ծրագիրը՝ նպատակ ունենալով Երևանում կայանալիք ՄԱԿ-ի Կենսաբազմազանության կոնվենցիայի 17-րդ կողմերի համաժողովին (COP 17)  ընդառաջ նախապատրաստել 300-350 համալսարանական ուսանողների` որպես կենսաբազմազանության իրազեկ և ակտիվ պաշտպաններ։

Գավառի պետական համալսարանի բոլոր մասնագիտությունների ուսանողներին հրավիրում ենք մասնակցելու հետաքրքիր և ուսուցողական ծրագրին՝ գրանցվելով  մինչև ս.թ. օգոստոսի 10-ը։ Դիմել հետևյալ հղումով՝ https://forms.gle/FLADkiUWLBWcQdGK9

Ընտրված ուսանողները կանցնեն 1,5 ամիս տևողությամբ վերապատրաստման ակադեմիայի ծրագիր։ Շրջանավարտներին կտրվի «Կենսաբազմազանության դեսպան» կոչումը, և նրանք կգործեն որպես պատրաստված կամավորական խումբ՝ աջակցելով նախա-COP, COP և հետ-COP փուլերի գործընթացներին։

Մանրամասների համար այցելեք`  https://ace.aua.am/AUCB-KensaDespan

ԳՊՀ արտաքին կապերի և լրատվության բաժին

Հանքագործի և մետալուրգի օրվա կապակցությամբ Գավառի պետական համալսարանի կառավարման և ֆինանսների ամբիոնի վարիչ, տնտեսագիտության թեկնածու, դոցենտ Սամվել Ամիրխանյանը և ԳՊՀ «Տնտեսագիտություն» բաժնի շրջանավարտ Արմինե Սաֆոյանը մասնակցեցին Զանգեզուրի պղնձամոլիբդենային կոմբինատի /ԶՊՄԿ/ կազմակերպած միջոցառումներին։ Համալսարանի ներկայացուցիչները հանդիպեցին կոմբինատի գլխավոր տնօրեն Ռոման Խուդոլիի, գլխավոր տնօրենի առաջին տեղակալ Վարդան Ջհանյանի, կայուն զարգացման տնօրեն Արմեն Ստեփանյանի, արտաքին հարաբերությունների և արդյունաբերական ինտեգրման տնօրեն Աննա Սաղաբալյանի և լրատվության բաժնի պետ Արայիկ Մարգարյանի հետ։ Նրանք մասնակցեցին Հանքագործի և մետալուրգի օրվան նվիրված հոբելյանական միջոցառմանը, որի ընթացքում նշվեց, որ Սամվել Ամիրխանյանի գիտական ղեկավարությամբ ԳՊՀ բակալավրիատի 4-րդ կուրսի ուսանողուհի Արմինե Սաֆոյանը կատարել է ավարտական աշխատանք՝ նվիրված Զանգեզուրի պղնձամոլիբդենային կոմբինատի գործունեության ուսումնասիրությանը։ Համահեղինակությամբ պատրաստվել է նաև գիտական հոդված։

Արմինե Սաֆոյանը հանդես եկավ զեկուցմամբ՝ ներկայացնելով իր ավարտական աշխատանքի հիմնական դրույթները, հետազոտության նպատակը և այն շարժառիթները, որոնք պայմանավորել են  թեմայի ընտրությունը։ ԳՊՀ պատվիրակները եղան հանքավայրում, ծանոթացան հանքաքարի արդյունահանման գործընթացներին, մասնակցեցին մշակութային միջոցառումներին և վառ տպավորություններով վերադարձան Գավառ։

Գավառի պետական համալսարանի ռեկտորատը շնորհավորում է ոլորտի աշխատակիցներին՝ Հանքագործի և մետալուրգի օրվա առիթով, և շնորհակալություն  հայտնում «Զանգեզուրի պղնձամոլիբդենային կոմբինատ» ՓԲԸ-ի ղեկավարությանը՝ արդյունավետ համագործակցության համար։