Рубрика: Без рубрики

 Գավառի պետական համալսարանի սիրելի՛ ուսանողներ և պրոֆեսորադասախոսական անձնակազմի հարգելի՛ անդամներ, տեղեկացնում ենք ձեզ, որ Եվրոպական միության «Էրազմուս+» ծրագրի շրջանակում ԳՊՀ-ի և Հռոմի Սապիենզայի համալսարանի միջև կնքված պայմանագրի համաձայն՝ համալսարանի բակալավրիատի և մագիստրատուրայի ուսանողները հնարավորություն ունեն 2026-2027 ուսումնական տարվա 2-րդ կիսամյակում 5 ամիս ժամկետով ուսանելու, իսկ պրոֆեսորադասախոսական անձնակազմի անդամները՝ 1-2 շաբաթ դասավանդելու Սապիենզայի համալսարանում:

Անգլերեն լեզվի B2 մակարդակի իմացությունը պարտադիր է:

Ծրագիրը մասնակիցներին տրամադրում է անհատական կրթաթոշակ, ինչպես նաև հոգում է ճանապարհածախսը:

Մրցույթին մասնակցության հայտերի ներկայացման վերջնաժամկետը ս․ թ․ հոկտեմբերի 14-ն է։

Ծրագրին մասնակցելու համար կարող եք դիմել ԳՊՀ արտաքին կապերի և լրատվության բաժին, գրելէլեկտրոնային փոստին՝ iro@gsu.am, info@gsu.am, infogsu@mail.ru հասցեներով կամ զանգահարել +374-91-867-716, +374-60-461-299 հեռախոսահամարներով։

Մաղթում ենք հաջողություն։

ԳՊՀ արտաքին կապերի և լրատվության բաժին

 

Գավառի պետական համալսարանի սիրելի՛ ուսանողներ, հարգելի՛ դասախոսներ, տեղեկացնում ենք ձեզ, որ ՀՀ  գիտությունների ազգային ակադեմիան Եվրոպական միության «Հորիզոն Եվրոպա» շրջանակային ծրագրի «Մարի Սկլոդովսկա-Կյուրիի գործողություններ» ենթածրագրի շրջանակում անցկացնում է «Եվրոպական հետազոտողների գիշեր Հայաստանում» միջոցառումը:

Հայաստանում միջոցառումն առաջին անգամ իրականացվելու է 2026 թվականի սեպտեմբերի 25-ից 26-ը (սեպտեմբերի 25-ին՝ ժամը 17:00-ից 23:00-ն, սեպտեմբերի 26-ին՝ 11:00-ից 17:00-ն), ինչպես նաև 2027 թվականի սեպտեմբերի 24-ից 25-ը։ Այն նպատակ ունի խթանել գիտության և հետազոտության նկատմամբ հետաքրքրությունը, բարձրացնել գիտության և նորարարության մասին հանրային իրազեկվածությունը, ինչպես նաև նպաստել հետազոտողների և հասարակության միջև անմիջական երկխոսությանը:

Միջոցառման շրջանակում կկայանա գիտության փառատոն, որը հնարավորություն կտա այցելուներին մասնակցել կենսատեխնոլոգիայի, քիմիայի, ֆիզիկայի, կենսաբանության, արհեստական բանականության, տիեզերագիտության, ճարտարագիտության, շրջակա միջավայրի պահպանության, թվային նորարարությունների, հումանիտար և հասարակական գիտությունների վերաբերյալ գիտական և կրթական ինտերակտիվ միջոցառումներին, լաբորատոր ցուցադրություններին, պանելային քննարկումներին։

Միջոցառումը կազմակերպվելու է ՀՀ գիտությունների ազգային ակադեմիայում ու հարակից տարածքում և ներառելու է շուրջ 70 տաղավար։ Միաժամանակ 2026 թվականի սեպտեմբերի 25-ից 26-ը Գյումրու և Վանաձորի տեխնոլոգիական կենտրոններում ևս կիրականացվեն ինտերակտիվ ցուցահանդեսներ՝ գործնական փորձերով, աշխատարաններով, քննարկումներով և այլ միջոցառումներով:

Միջոցառմանը մասնակցության համար կարող եք գրանցվել հետևյալ հղումով՝ https://forms.gle/UqQhb3vbCLfPLnp96։

Գավառի պետական համալսարանն անդամակցում է Եվրոպական միության «Էրազմուս+ Վիրտուալ ճանապարհորդություններ» ծրագրին, որի շրջանակում նախատեսվում է վերապատրաստման դասընթացների անցկացում։ Դասընթացներն արդյունավետ կազմակերպելու նպատակով տեղի ունեցավ առցանց հանդիպում վերապատրասման պատասխանատուների հետ։ ԳՊՀ արտաքին կապերի և լրատվության բաժնի վարիչ Լիլիթ Թոռչյանը վերապատրաստման առաջին փուլի դասընթացավարներին ներկայացրեց ծրագրի https://thevoyage.eu/ հարթակը, տարաժամանակյա (ասինխրոն) և համաժամանակյա (սինխրոն) ձևաչափերով մոդուլների ուսումնասիրման և գնահատման պայմաններն ու առանձնահատկությունները։

Հստակեցվեցին մասնակցության հետ կապված այլ  հարցեր։ Վերապատրաստման առցանց գործընթացը կմեկնարկի ս․ թ․ սեպտեմբերի 18-ին։

 

Հայաստանի Հանրապետությունը ՄԱԿ-ի Կենսաբազմազանության կոնվենցիայի կողմերի 17-րդ համաժողովի (CBD COP 17) հյուրընկալ երկիր է։ 2026 թվականի հոկտեմբերի 19-ից 30-ը Երևանում կայանալիք ՄԱԿ-ի համաժողովին ընդառաջ ս․ թ․սեպտեմբերի 12-ին Հայաստանի ամերիկյան համալսարանում կայացավ Կենսաբազմազանության հարցերով հայկական բուհերի կոալիցիայի (ԿՀԲԿ) հիմնադրման արարողությունը։ Բուհերի ղեկավարները ստորագրեցին ԿՀԲԿ-ն պաշտոնապես ձևավորող Փոխըմբռնման հուշագիր։ Գավառի պետական համալսարանի ռեկտոր Ռուզաննա Հակոբյանը ստորագրեց Փոխըմբռնման հուշագիրը՝ հաստատելով բուհի անդամակցությունը Կոալիցիային: Միջոցառումը նշանավորվեց «Կենսաբազմազանության դեսպաններ» ծրագրի մեկնարկով, որը ԿՀԲԿ նախաձեռնություն է, իրականացվում է Երիտասարդների գլոբալ կենսաբազմազանության ցանցի հետ գործընկերությամբ և ՀՀ կրթության, գիտության, մշակույթի և սպորտի նախարարության, ՀՀ շրջակա միջավայրի նախարարության, ՀՀ արտաքին գործերի նախարարության հետ խորհրդակցությամբ: Հուշագրի ստորագրման արարողությունից հետո «Կենսաբազմազանության դեսպան» դառնալու համար դիմած ավելի քան 300 ուսանող, այդ թվում՝ Գավառի պետական համալսարանի տարբեր բաժինների ուսանողներ մասնակցեցին դասընթացի և կարողությունների զարգացման վարժությունների, որպեսզի իրենց մասնակցությունն ունենան Հայաստանում կայանալիք գլոբալ համաժողովին և որպես «Կենսաբազմազանության դեսպաններ»՝ տարածեն բնապահպանական մշակույթն իրենց համայնքներում։

Գավառի պետական համալսարանի սիրելի՛ ուսանողներ, պրոֆեսորադասախոսական և վարչական  անձնակազմի հարգելի՛ անդամներ, տեղեկացնում ենք, որ Եվրոպական միության «Էրազմուս+» ծրագրի շրջանակում Գավառի պետական համալսարանի և Բուլղարիայի Անգել Կանչևի անվան Ռուսեի համալսարանի միջև կնքված  պայմանագրի համաձայն՝ ԳՊՀ բակալավրիատի և մագիստրատուրայի «Համակարգչային ճարտարագիտություն» բաժնի ուսանողները հնարավորություն ունեն  2026-2027 ուսումնական տարվա 2-րդ կիսամյակում՝ 5 ամիսժամկետով ուսանելու, իսկ պրոֆեսորադասախոսական և վարչական անձնակազմի անդամները՝ դասավանդելու կամ վերապատրաստվելու վերոնշյալ  համալսարանում: Անգլերեն լեզվի B2 մակարդակի իմացությունը պարտադիր է: Ծրագիրը շահառու ուսանողներին և դասախոսներին տրամադրում է անհատական կրթաթոշակ, ինչպես նաև հոգում է ճանապարհածախսը:

Դիմումների ընդունման վերջնաժամկետը  2026թ. հոկտեմբերի 25-ն է։ 

Լրացուցիչ տեղեկությունների համար կարող եք այցելել ԳՊՀ արտաքին կապերի և լրատվության բաժին կամ զանգահարել +374-60-46-12-99 հեռախոսահամարով։

Մաղթում ենք հաջողություն։

 

Գերմանական ակադեմիական փոխանակման գործակալության (DAAD) և Հայաստանում «Էրազմուս+» ազգային գրասենյակի նախաձեռնությամբ Երևանում անցկացվեց տեղեկատվական հանդիպում։ Հանդիպման ընթացքում DAAD-ի ղեկավար Սիլվիա Շմիդը ներկայացրեց կազմակերպության կողմից առաջարկվող կրթաթոշակային ծրագրերին դիմելու հնարավորությունները։ Հայաստանում «Էրազմուս+» ազգային գրասենյակի համակարգող Մարիանա Սարգսյանը ներկայացրեց Եվրոպական միության «Էրազմուս+» ծրագրի շրջանակում իրականացվող գործողություններից 2-ը՝ «Համագործակցության գործընկերություններ» և «Դաշինքներ՝ հանուն նորարարության»։
Գավառի պետական համալսարանից տեղեկատվական հանդիպմանը մասնակցեց բուհի արտաքին կապերի և լրատվության բաժնի վարիչ Լիլիթ Թոռչյանը։

«Ինովացիոն լուծումների և տեխնոլոգիաների կենտրոն» հիմնադրամը, ՀՀ բարձր տեխնոլոգիական արդյունաբերության նախարարության և ՄԱԿ-ի Զարգացման ծրագրի հետ համագործակցությամբ իրականացնում է«NEST. հմտությունների և տեխնոլոգիաների ազգային էկոհամակարգ» ծրագիրը, որի շրջանակում մեկնարկում է անվճար ուսումնական ծրագիր՝ նախատեսված ՀՀ 6 մարզերի շահառուխմբերի համար։ ՀՀ Գեղարքունիքի մարզում ծրագրի գործընկերն է Գավառի պետական համալսարանը։ Համատեղ իրականացվելու են թվային գրագիտության, արհեստական բանականության (ԱԲ) գրագիտության, կիբեռանվտանգության իրազեկվածության և ճկուն հմտությունների համակցված դասընթացներ՝ 6 մարզերում ընդգրկված 9 խմբերի 180 շահառուի համար։ Ծրագիրը կիրականացվի ապակենտրոնացված մոդելով. յուրաքանչյուր խումբ կհյուրընկալվի գործընկեր հաստատության կողմից, իսկ կենտրոնացված համակարգումն իրականացնելու է Ինովացիոն լուծումների և տեխնոլոգիաների կենտրոնը՝ ընդհանուր ժամանակացույցի, մոդելային ուսումնական ծրագրի և որակի ապահովման միասնական շրջանակի միջոցով։

«NEST. հմտությունների և տեխնոլոգիաների ազգային էկոհամակարգ» ծրագրի արդյունավետ իրականացման նպատակով տեղի ունեցավ աշխատանքային հանդիպում և վերապատրաստում, որին մասնակցեցին Գավառի պետական համալսարանի Ինֆորմատիկայի և ֆիզիկամաթեմատիկական գիտությունների ամբիոնի վարիչ, տեխնիկական գիտությունների թեկնածու Վարազդատ Ավետիսյանը, Կառավարման և ֆինանսների ամբիոնի դասախոս Աստղիկ Հովեյանը և  Տեղեկատվական տեխնոլոգիաների բաժնի մասնագետ Հայրիկ Զարգարյանը։

Հանդիպման շրջանականերում ծրագրի համակարգող Աննա Թովմասյանը ներկայացրեց ծրագրի նպատակը, խնդիրները, իրականացման ժամանակացույցը, մեթոդաբանությունը, պատասխանեց մասնակիցների հարցերին։ Այնուհետև կազմակերպվեց դասընթացավարների վերապատրաստումներ երկու ուղղություններով` ճկուն հմտությունների և թվային, ԱԲ գրագիտության, կիբեռանվտանգության հարցերի վերաբերյալ, որը վարեց Վարազդատ Ավետիսյանը։

Գավառի պետական համալսարանը հյուրընկալեց «Ուսումը Հունգարիայում» տնօրինության միջազգայնացման հարցերով ավագ համակարգող Ջորջինա Թվենեբոային և Խաչատուր Աբովյանի անվան հայկական պետական մանկավարժական համալսարանի հրավիրյալ դասախոս Դանիել Գազդիկին։ Հյուրերը հանդիպեցին Գավառի պետական համալսարանի ռեկտոր Ռուզաննա Հակոբյանին։ Հանդիպման ընթացքում քննարկվեցին Գավառի պետական համալսարանի և Հունգարիայի բուհերի հետ համագործակցության, կրթաթոշակային տարբեր ծրագրերի միջոցով Հունգարիայում սովորելու և դասավանդելու հնարավորությունները։ ԳՊՀ արտաքին կապերի և լրատվության բաժնի վարիչ Լիլիթ Թոռչյանը ներկայացրեց համալսարանի՝ միջազգային ծրագրերին մասնակցելու փորձը։ Հյուրերն այցելեցին Գավառի պետական համալսարանի պատմագիտական թանգարան։

Գավառի պետական համալսարանը հայտարարում է 2026-2027 ուսումնական տարվա հեռակա ուսուցման ընդունելություն՝ բակալավրի կրթական ծրագրով:

Հեռակա ուսուցման ընդունելության դիմում-հայտերի ընդունումն սկսվում է սեպտեմբերի 5-ին, ժամը 16:00-ին և ավարտվում սեպտեմբերի 25-ին, ժամը 18:00-ին:

Հեռակա ուսուցման ընդունելության համար  պետք է ԳԹԿ «dimord.am» կայքում լրացնել դիմում-հայտ:

Դիմում-հայտը լրացնելու համար անհրաժեշտ է`

ա) ունենալ ԳԹԿ անձնական համար

բ) գրանցվել համակարգում (Հեռակա ուսուցման համար դիմող բոլոր դիմորդները պետք է համակարգում անցնեն նոր գրանցում՝ անկախ նախկինում գրանցված լինելու հանգամանքից։)

գ)ընդունելության յուրաքանչյուր քննությանը մասնակցելու համար ԳԹԿ հաշվեհամարին (900018003401) փոխանցած 1500 դրամի անդորրագիրը:

ԳԹԿ անձնական համար տրամադրում է Գավառի պետական համալսարանը, եթե դիմորդը մասնակցել է 2026 թվականի բուհերի առկա ընդունելության քննություններին, ապա կարող է օգտագործել այդ ժամանակահատվածում ԳԹԿ-ի կողմից տրված անձնական համարը:

Ընդունելության քննությունների հեռակա ուսուցման ընդունելության կանոններով սահմանված արտոնություններից  օգտվող դիմորդները վարձավճարից ազատվում են:

Դիմորդները կարող են մրցույթին ներկայացնել միասնական և տվյալ բուհի համապատասխան մասնագիտության համար հանձնած  ներբուհական քննությունների դրական գնահատական(ներ)ը կամ հանձնել նոր քննություններ: Այս դեպքում մրցույթում կօգտագործվեն ավելի բարձր գնահատականները:

 Դիմորդը կարող է մասնակցել Գավառի պետական համալսարանի մինչև երեք մասնագիտությունների մրցույթին, որոնց համար սահմանված են ընդունելության միևնույն քննությունները։

Դիմորդն ընդունելության դիմում-հայտում իր ընտրությամբ և ցանկացած հաջորդականությամբ պետք է հայտագրի մասնագիտությունները և տվյալ մասնագիտության համար սահմանված առավելագույնը երկու ընդունելության քննությունները: Դիմում-հայտերի առաջին տողով նշված մասնագիտությունն ունի գերակայություն:

Բուհ ընդունված դիմորդների ցուցակները կհաստատվեն մինչև հոկտեմբերի 30-ը:

Հարցերի դեպքում կարող եք զանգահարել Գավառի պետական համալսարան՝ 060-46-12-43, 099-02-21-41 հեռախոսահամարներով, ինչպես նաև հարցերը հղել ԳՊՀ էլփոստի հասցեներով՝ info@gsu, infogsu@mail.ru։

Կից ներկայացնում ենք ԳՊՀ հեռակա ուսուցման բակալավրի կրթական ծրագրով մասնագիտությունները, քննական առարկաները, ուսման տարեկան վարձավճարները`

ՀՈՒՖ 2026-2027

ԳՊՀ ընդունող հանձնաժողով