Գավառի պետական համալսարանի ուսանողական խորհրդի նախաձեռնությամբ կազմակերպվեց հայրենաճանաչողական էքսկուրսիա, որի նպատակն էր ուսանողների առավել սերտ հաղորդակցությունը հայ ժողովրդի հոգևոր, պատմամշակութային ժառանգությանը։
Էքսկուրսիային մասնակցեցին ուսումնական տարվա ընթացքում բարձր առաջադիմություն և ակտիվություն ցուցաբերած ուսանողները՝ ԳՊՀ որակի ապահովման բաժնի վարիչ, պատմական գիտությունների թեկնածու, դոցենտ Քանաքարա Հայրապետյանի, ակադեմիական քաղաքականության բաժնի վարիչ Օլգա Ղազարյանի և արտաքին կապերի ու լրատվության բաժնի մասնագետ Նունե Միրիբյանի ուղեկցությամբ։ Համալսարանականների առաջին կանգառը Խոր Վիրապի վանական համալիրն էր, որտեղ ուսանողներին ներկայացվեցին Գրիգոր Լուսավորչի գործունեությունը և քրիստոնեությունը պետական կրոն հռչակելու հետ կապված պատմական իրադարձությունները։
Այնուհետև ուսանողներն այցելեցին Մայր Աթոռ Սուրբ Էջմիածին, շրջեցին Մայր Տաճարի տարածքում, եղան «Ալեք և Մարի Մանուկյան» գանձատուն-թանգարանում, որտեղ հնարավորություն ունեցան ծանոթանալու Հայ Առաքելական Սուրբ Եկեղեցու բազմադարյա հոգևոր-մշակութային արժեքներին, եկեղեցական մասունքներին, ձեռագրերին և պատմական նշանակություն ունեցող այլ ցուցանմուշների։
Այցի հաջորդ կանգառը Սարդարապատի հուշահամալիրն էր։ Ուսանողներն այցելեցին Հայաստանի ազգագրության և ազատագրական պայքարի պատմության թանգարան, որտեղ գործող «Մայիսյան հերոսամարտեր» մշտական ցուցադրության սրահում ծանոթացան 1918 թվականի հերոսամարտերի պատմությանը, հայ ժողովրդի ինքնապաշտպանական պայքարին և պետականության վերականգնման ուղուն նվիրված հարուստ ցուցադրությանը։
Օրը հագեցած էր անմոռանալի տպավորություններով։ Նման նախաձեռնությունները նպաստում են ազգային արժեքների արմատավորմանը, երիտասարդների հայրենասիրական կրթությանն ու դաստիարակությանը։
ԱՆՄՈՌԱՆԱԼԻ ՀԱՂՈՐԴԱԿՑՈՒԹՅՈՒՆ ՀՈԳԵՎՈՐ, ՊԱՏՄԱՄՇԱԿՈՒԹԱՅԻՆ ԱՐԺԵՔՆԵՐԻՆ
