Գավառի պետական համալսարանում կայացած միջազգային գիտական ֆորումում քննարկվեց մշակույթի և արվեստի դերը գլոբալացման դարաշրջանում։ Ֆորումի մասնակիցներին ողջունեց և մշակույթի ու արվեստի համամարդկային նշանակության մասին խոսեց բուհի ռեկտոր Ռուզաննա Հակոբյանը։ Գիտական զեկուցումներով հանդես եկան Լեհաստանի Օլշտինի Վարմիայի և Մազուրիի համալսարանի սոցիոլոգիայի ամբիոնի վարիչ, սոցիոլոգիական գիտությունների դոկտոր, պրոֆեսոր Մարեկ Սոկոլովսկին, նույն ամբիոնի դասախոս, սոցիոլոգիական գիտությունների թեկնածու Աննա Դասժևսկան, Արվեստի ինստիտուտի պրոֆեսոր, արվեստաբանության դոկտոր Քշիշտոֆ Շատրավսկին, Վարշավայի կաթոլիկ համալսարանի սոցիոլոգիայի ինստիտուտի տնօրեն, սոցիոլոգիական գիտությունների դոկտոր Արթուր Վիսոցկին, ՌԴ ֆինանսական համալսարանի Վլադիկովկասի մասնաճյուղի հասարակական գիտությունների ամբիոնի վարիչ Վիկտոր Բետանովը, Խ․ Աբովյանի անվան հայկական պետական մանկավարժական համալսարանի դասախոս, սոցիոլոգիական գիտությունների թեկնածու Սյուզաննա Եղիազարյանը։ Ելույթ ունեցան սոցիոլոգիական գիտությունների դոկտոր, փիլիսոփայական գիտությունների թեկնածու, Սանկտ Պետերբուրգի պետական տնտեսագիտական համալսարանի և շինարարության ու դիզայնի պետական համալսարանի պրոֆեսոր Սերգեյ Բիստրյանցևը, Մինսկի պետական լեզվաբանական համալսարանի դասախոս, դոկտորանտ Իննա Իլյիչևան։ Ֆորումին ներկա էին նաև Բրեստի պետական համալսարանի, ակադեմիկոս Մ. Դ. Միլիոնշչիկովի անվան Գրոզնիի պետական նավթային տեխնիկական համալսարանի պատվիրակներ։ Ներկայացված զեկուցումները հետաքրքիր էին և ուղեկցվում էին բովանդակալից քննարկումներով։
Ֆորումին մասնակցեցին ԳՊՀ դասախոսներ և ուսանողներ, ինչպես նաև Գավառի այլ ուսումնական հաստատությունների ներկայացուցիչներ։ Ֆորումի աշխատանքները ղեկավարեց և արդյունքներն ամփոփեց ԳՊՀ պրոֆեսոր, ՀՀ գիտությունների ազգային ակադեմիայի արվեստի ինստիտուտի ավագ գիտաշխատող, սոցիոլոգիական գիտությունների դոկտոր, պրոֆեսոր, տնտեսագիտության թեկնածու Արմեն Սահակյանը։
Ս․ Թ․ ՄԱՅԻՍԻ 3-ԻՆ ՀՐԱՎԻՐՈՒՄ ԵՆՔ ԱՌՑԱՆՑ ՄԱՍՆԱԿՑԵԼՈՒ ԳԱՎԱՌԻ ՊԵՏԱԿԱՆ ՀԱՄԱԼՍԱՐԱՆԻ ԱՄԵՆԱՄՅԱ՝ 28-ՐԴ ԳԻՏԱԺՈՂՈՎԻՆ
Գավառի պետական համալսարանի 28-րդ գիտաժողովի կազմկոմիտեն տեղեկացնում է, որ ԳՊՀ ամենամյա գիտաժողովը կկայանա 2025թ. մայիսի 3-ին, սկիզբը՝ ժամը 11։00-ին, առցանց ձևաչափով։
Գիտաժողովի ծրագրին կարող եք ծանոթանալ հետևյալ հղումով՝
Լիագումար նիստին միանալու հղումն է՝
https://meet.jit.si/moderated/5c234f758314772946cda6a294fe278d07bde10c34821242af09b91c882a9a35
Լիագումար նիստից հետո գիտաժողովը կշարունակվի 10 մասնագիտական բաժանմունքներում, որոնց աշխատանքներին կարող եք մասնակցել ծրագրի համապատասխան բաժիններում նշված հղումներով։
Լիագումար նիստի և բոլոր բաժանմունքների հղումները հասանելի են նաև ներքոհիշյալ հասցեով՝
Գիտաժողովի աշխատանքային լեզուներն են հայերենը, ռուսերենը, անգլերենը։
Ցանկացած հարցի դեպքում կարող եք զանգահարել հետևյալ հեռախոսահամարներով՝
+374 60 460302, 60-46-12-43, 60-46-12-99, 077-37-51-51։
Ինչպես նաև կարող եք դիմել մասնագիտական բաժանմունքների տեխնիկական պատասխանատուներին, որոնց հեռախոսահամարները և էլեկտրոնային փոստի հասցեները կարող եք գտնել ծրագրի համապատասխան բաժիններում։
Ս․ թ․ մայիսի 3-ին ԳՊՀ 28-րդ գիտաժողովին չմասնակցած հեղինակները կարող են զեկուցել մայիսի 4-ին, ժամը՝ 11:00-ին, առցանց ձևաչափով, հետևյալ հղումով․
https://meet.jit.si/moderated/5c234f758314772946cda6a294fe278d07bde10c34821242af09b91c882a9a35
Հարցերի դեպքում մեզ կարող եք գրել ԳՊՀ էլփոստի հետևյալ հասցեներով՝
infogsu@mail.ru և info@gsu.am
Շնորհակալություն համագործակցության համար։
ԳՊՀ 28-րդ գիտաժողովի կազմկոմիտե
ՀՐԱՎԻՐՈՒՄ ԵՆՔ ՄԻՋԱԶԳԱՅԻՆ ԳԻՏԱԿԱՆ ՖՈՐՈՒՄԻ՝ «ՄՇԱԿՈՒՅԹԻ ԵՎ ԱՐՎԵՍՏԻ ԴԵՐԸ ԳԼՈԲԱԼԻԶԱՑԻԱՅԻ ԴԱՐԱՇՐՋԱՆՈՒՄ» ԽՈՐԱԳՐՈՎ
Տեղեկացնում ենք, որ Գավառի պետական համալսարանում կկայանա միջազգային գիտական ֆորում՝ «Մշակույթի և արվեստի դերը գլոբալիզացիայի դարաշրջանում» խորագրով։
Ֆորումը կանցկացվի ս․ թ․ ապրիլի 30-ին, սկիզբը՝ ժամը 11․00-ին, զուգակցված՝ առկա-առցանց ձևաչափով, ԳՊՀ գիտական խորհրդի նիստերի սրահում։
Հրավիրում ենք դասախոսների, ուսուցիչների, ասպիրանտների, ուսանողների, բարձր դասարանների աշակերտների, թեմայով հետաքրքրված անձանց՝ մասնակցելու ֆորումին։ Առցանց ձևաչափով կարող եք միանալ հետևյալ հղումով՝
https://meet.jit.si/moderated/5c234f758314772946cda6a294fe278d07bde10c34821242af09b91c882a9a35
Ստորև ներկայացվում է ֆորումի ծրագիրը։
Դիտել ծրագիրը
ՀԱՇՎԵՏՎՈՒԹՅՈՒՆ ՆԵՐԿԱՅԱՑՐԻՆ ԵՎՐՈՊԱԿԱՆ ԲՈՒՀԵՐՈՒՄ ՈՒՍՈՒՄՆԱՌԱԾ ԵՎ ԴԱՍԱՎԱՆԴԱԾ ԳՊՀ-ԱԿԱՆՆԵՐԸ
Գավառի պետական համալսարանի ուսանողներն ու դասախոսները Եվրոպական միության «Էրազմուս+» միջազգային ակադեմիական շարժունության ծրագրերի շրջանակում սովորում, դասավանդում և վերապատրաստման դասընթացների են մասնակցում գործընկեր եվրոպական բուհերում: Իտալիայում՝ Հռոմի Սապիենզա համալսարանում իր ուսումնառության հաջողված փորձով կիսվեց «Համակարգչային ճարտարագիտություն» բաժնի 3-րդ կուրսի ուսանողուհի Նոնա Հովեյանը։
Հետաքրքիր հաշվետվություններ ներկայացրին ԳՊՀ oտար լեզվի և գրականության ամբիոնի վարիչ, բանասիրական գիտությունների թեկնածու Գայանե Միրիբյանը, ով դասախոսություններով հանդես էր եկել Պորտուգալիայի Մինհոյի համալսարանում, նույն ամբիոնի դասախոս Սոնա Սիմոնյանը, ով դասախոսել էր Պորտուգալիայի Էվորայի համալսարանում և իրավագիտության ամբիոնի դասախոս Լուսինե Բախտիկյանը, ով Էվորայի համալսարանում մասնակցել էր վերապատրաստման դասընթացի։ Համալսարանականները նշեցին, որ միջազգային փոխանակման ծրագրերը բացառիկ հնարավորություն են միջմշակութային հաղորդակցության, մասնագիտական զարգացման, համատեղ հետազոտական նախագծերի իրականացման համար։
ԳՊՀ-Ն ՀՅՈՒՐԸՆԿԱԼԵՑ ԳԱՎԱՌԻ ԵՎ ՍԵՎԱՆԻ ԴՊՐՈՑՆԵՐԻ ԱՇԱԿԵՐՏՆԵՐԻՆ ԵՎ ՈՒՍՈՒՑԻՉՆԵՐԻՆ
Գավառի պետական համալսարանը համագործակցում է ՀՀ Գեղարքունիքի մարզի դպրոցների և քոլեջների հետ, կազմակերպում հանդիպումներ, փոխայցելություններ։ Օրերս համալսարանը սիրով հյուրընկալեց Գավառի և Սևանի ավագ դպրոցների, ինչպես նաև Գավառի Պ. Ղանդիլյանի անվան թիվ 2-րդ միջնակարգ դպրոցի աշակերտներին և ուսուցիչներին։ Հյուրերը հանդիպեցին ԳՊՀ ռեկտոր Ռուզաննա Հակոբյանի հետ, լսեցին օգտակար խորհուրդներ կրթության կարևորության և մասնագիտական ճիշտ կողմնորոշման մասին, մասնակցեցին եվրոպական բուհերից վերադարձած համալսարանականների հետ հաշվետու հանդիպմանը։ Բուհի արտաքին կապերի և լրատվության բաժնի վարիչ Լիլիթ Թոռչյանը բովանդակալից շնորհանդեսի միջոցով ներկայացրեց համալսարանի իրականացրած միջազգային ծրագրերը, անդրադարձավ ԳՊՀ ուսանողների՝ արտասահմանյան բուհերում սովորելու հնարավորություններին: Հյուրերն այցելեցին բուհի Վարշամ Ավետյանի անվան թանգարան։
ԳԱՎԱՌ ԲԱԶՄԱԲՆԱԿԱՎԱՅՐ ՀԱՄԱՅՆՔԻ ԶԱՐԳԱՑՄԱՆ ՈՒՂԻՆԵՐԸ՝ ԳՊՀ ՈՒՍԱՆՈՂԱԿԱՆ ԳԻՏԱԺՈՂՈՎԻ ՔՆՆԱՐԿՄԱՆ ԱՌԱՐԿԱ
Գավառի պետական համալսարանի կառավարման և ֆինանսների ամբիոնի և բնագիտատնտեսագիտական ֆակուլտետի ուսանողական գիտական ընկերության նախաձեռնությամբ կայացավ ուսանողական գիտաժողով՝ «Գավառ բազմաբնակավայր համայնքի զարգացման մարտահրավերները» խորագրով:
Ուսանողները հանդես եկան հետաքրքիր զեկուցումներով՝ հետևյալ թեմաներով․
— Մերի Փուրթոյան՝ «Տնտեսագիտություն» բաժնի 3-րդ կուրսի ուսանողուհի, թեմա՝ «Գավառ համայնքի սոցիալ-տնտեսական իրավիճակի վերլուծությունը»,
— Թագուհի Թադևոսյան՝ «Հաշվապահական հաշվառում և հարկում» բաժնի 3-րդ կուրսի ուսանողուհի, թեմա՝ «Զբաղվածությունը և դրա վրա ազդող գործոնները ՀՀ Գեղարքունիքի մարզում, Գավառ համայնքում և զբաղվածության ապահովման ուղիները»,
— Անժելա Ավետիսյան՝ «Տնտեսագիտություն» բաժնի 2-րդ կուրսի ուսանողուհի, թեմա՝ «Գավառ համայնքում բուսաբուծության ոլորտի արդյունավետության վերլուծություն և գնահատում»,
— Մանվել Գևորգյան՝ «Ֆինանսեր» (ըստ ոլորտի) 2-րդ կուրսի ուսանող, թեմա՝ «Գավառ համայնքում անասնաբուծության ներկա վիճակը և զարգացման հեռանկարները»,
— Սիլվինե Մոմչյան՝ «Ֆինանսեր» (ըստ ոլորտի) 2-րդ կուրսի ուսանողուհի, թեմա՝ «Գավառ համայնքում զբոսաշրջության սպասարկման որակի բարձրացման ուղղությունները և դրանց տնտեսական արդյունքները»,
— Արմինե Սաֆոյան՝ ԳՊՀ բնագիտատնտեսագիտական ֆակուլտետի ուսանողական գիտական ընկերության նախագահ, «Տնտեսագիտություն» բաժնի 3-րդ կուրսի ուսանողուհի, թեմա՝ «Գավառ համայնքում թեթև արդյունաբերության ենթակառուցվածքների զարգացման հնարավորությունները և խոչընդոտները»։
Գիտաժողովին մասնակցեցին բուհի պրոֆեսորադասախոսական, վարչական անձնակազմի ներկայացուցիչներ, ուսանողներ՝ Գավառի պետական համալսարանից և Գավառի ակադեմիկոս Ա. Թամամշևի անվան պետական գյուղատնտեսական քոլեջից, ինչպես նաև «Ռեստարտ Գավառ» երիտասարդական հասարակական կազմակերպության ղեկավար Նարեկ Արևշատյանը և կազմակերպության անդամներ։
Հետազոտություն կատարած և գիտաժողովին զեկուցումներով հանդես եկած ուսանողներին, նրանց գիտական ղեկավարին՝ ԳՊՀ կառավարման և ֆինանսների ամբիոնի վարիչ, տնտեսագիտության թեկնածու, դոցենտ Սամվել Ամիրխանյանին շնորհակալություն հայտնեց և գիտաժողովն ամփոփեց բուհի ռեկտոր Ռուզաննա Հակոբյանը։
ՇՆՈՐՀԱԿԱԼՈՒԹՅՈՒՆ ԵՆՔ ՀԱՅՏՆՈՒՄ ԳԱՎԱՌԻ ԲԺՇԿԱԿԱՆ ԿԵՆՏՐՈՆԻՆ
Գավառի պետական համալսարանի ռեկտորատը շնորհակալություն է հայտնում Գավառի բժշկական կենտրոնին՝ «Դեղագործական քիմիա» բաժնի ուսանողների պրակտիկան արդյունավետ կազմակերպելու համար։ Ուսանողները պրակտիկան անցկացնում են կենտրոնի լաբորատորիայում և դեղատանը։ Լաբորատորիայում ուսանողները հետևում են գործիքային հետազոտությունների ընթացքին, իրականացնում արդյունքների գրանցում՝ լաբորատորիայի վարիչի անմիջական հսկողությամբ։
Գավառի բժշկական կենտրոնի դեղատան փորձառու աշխատակից, Գավառի պետական համալսարանի «Դեղագործական քիմիա» բաժնի շրջանավարտ Մելինե Միսակյանի ղեկավարությամբ ուսանողները ծանոթանում են դեղերի դասակարգմանն՝ ըստ բաժինների, ընդունման և դուրսգրման ընթացակարգերին, հատուկ պայմաններում պահվող դեղամիջոցների առանձնահատկություններին։ Պրակտիկաների միջոցով սովորողներն ամրապնդում են տեսական գիտելիքները և ձեռք բերում գործնական հմտություններ։
ԳՊՀ-ՈՒՄ ԿԱՅԱՑԱՎ ԲԱՆԱՎԵՃ՝ ՆՎԻՐՎԱԾ ՍԵՎԱՆԱ ԿԱՊՈՒՏԱՉ ԳԵՂԵՑԿՈՒՀՈՒՆ
Սևանա կապուտաչ գեղեցկուհին Հայաստանի բնական հարստությունն է, որի հիմնախնդիրներն ուսումնասիրելը և ներկայացնելը կարևոր է երիտասարդների էկոլոգիական կրթության ու դաստիարակության համար։
Գավառի պետական համալսարանի «Ֆինանսներ» և «Տնտեսագիտություն» բաժինների 2-րդ կուրսի ուսանողները՝ ամբիոնի վարիչ Սամվել Ամիրխանյանի նախաձեռնությամբ, «Բնապահպանություն և բնօգտագործման տնտեսագիտություն» առարկայի շրջանակներում կազմակերպել էին բանավեճ՝ «Ձկնարդյունաբերությունը բացասաբա՞ր է ազդում Սևանա լճի վրա» թեմայով։
Բանավեճի դատավորներն էին՝ «Սևան Ակվա» ընկերության տնօրեն Արման Մարուխյանը, ԳՊՀ պրոռեկտոր Նելլի Կուտուզյանը, բնագիտատնտեսագիտական ֆակուլտետի դեկան, գյուղատնտեսական գիտությունների դոկտոր Մարտին Ավագյանը, հումանիտար մասնագիտությունների ֆակուլտետի դեկան Թաթուլ Ասոյանը, տնտեսագիտության թեկնածու, դոցենտ Սամվել Ամիրխանյանը։
Բանավեճի ընթացքում երկու թիմերը ներկայացրին իրենց հակադիր տեսակետները: «Դեմ» թիմը պնդում էր, որ ձկնարդյունաբերությունը նպատակահարմար է, քանի որ դրա միջոցով զարգանում է տնտեսությունը և ապահովվում են սոցիալ-տնտեսական մեծ օգուտներ բնակիչների համար։ Նրանք իրենց դիրքորոշումը հիմնավորեցին վիճակագրական տվյալներով՝ ցույց տալով, թե ինչպես է ձկնաբուծությունը նպաստում տեղական զբաղվածությանը և սննդի անվտանգությանը։
«Կողմ» թիմի կարծիքով ձկնարդյունաբերությունը բացասական ազդեցություն է ունենում լճի վրա, քանի որ հանգեցնում է լճի աղտոտմանը, կրճատում ձկան պաշարները և առաջացնում մի շարք բնապահպանական խնդիրներ։ Նրանք անդրադարձան ձկնաբուծության հետևանքով առաջացող օրգանական նյութերի կուտակմանը, ինչը բացասաբար է անդրադառնում լճի էկոհամակարգի, ջրի որակի և կենսաբազմազանության վրա։ Երկու թիմերն էլ ներկայացրին հետաքրքիր և հիմնավորված փաստարկներ։ Սակայն, «Դեմ» թիմը կարողացավ ավելի համոզիչ կերպով ցույց տալ, որ ձկնարդյունաբերության տնտեսական օգուտները կարող են համատեղվել բնապահպանական պատասխանատու մոտեցումների հետ։ Նրանք առաջարկեցին նաև կայուն ձկնաբուծության մոդելներ, որոնք կնվազեցնեն բացասական ազդեցությունը Սևանա լճի վրա՝ միաժամանակ պահպանելով սոցիալ-տնտեսական օգուտները։
Արդյունքում հաղթող ճանաչվեց «Դեմ» թիմը։ Դատավորները շնորհավորեցին բոլոր մասնակիցներին՝ նշելով, որ բանավեճերին մասնակցելը նպաստում են ուսանողների մասնագիտական և հետազոտական կարողությունների զարգացմանը, խթանում վերլուծական, քննադատական մտածողությունը։
ԳՊՀ ՈՒՍԱՆՈՂՆԵՐԻ ՄԱՆԿԱՎԱՐԺԱԿԱՆ ՊՐԱԿՏԻԿԱՅԻ ԳՈՀԱՑՈՒՑԻՉ ԱՐԴՅՈՒՆՔՆԵՐԸ
Գավառի պետական համալսարանի «Տարրական մանկավարժություն և մեթոդիկա» բաժնի 4-րդ կուրսի ուսանողներն իրենց մանկավարժական պրակտիկան հաջողությամբ անցկացնում են ՀՀ Գեղարքունիքի մարզի հանրակրթական դպրոցներում։ Ուսանողները ոչ միայն մասնակցում են դասերի և դասեր վարում, այլև միջոցառումներ կազմակերպում, հանդես գալիս գեղեցիկ նախաձեռնություններով։ Հրանուշ Մելքոնյանն իր պրակտիկան անցավ հարազատ կրթօջախում՝ Գավառի Ավետիք Իսահակյանի անվան թիվ 4 հիմնական դպրոցում: ԳՊՀ ուսանողուհին 2-րդ դասարանի 30 աշակերտի հետ կազմակերպեց «Գարունը մենք ենք» խորագրով ցերեկույթ։ Միջոցառմանը մասնակցում էին դպրոցի ուսուցչական անձնակազմը, ծնողներ և ԳՊՀ ուսանողներ։ Ցերեկույթի ավարտին դպրոցի փոխտնօրեն Ռուզաննա Քոլոզյանն իր գոհունակությունը հայտնեց դպրոցում պրակտիկա անցնող Հրանուշ Մելքոնյանի և մյուս ուսանողուհիների աշխատանքի վերաբերյալ:
Ամփոփիչ խոսքով հանդես եկավ ԳՊՀ հասարակական գիտությունների ամբիոնի վարիչ, փիլիսոփայական գիտությունների թեկնածու Համլետ Ղաջոյանը, ով կարևորեց դպրոց-բուհ համագործակցությունը, շեշտեց պրակտիկաների անհրաժեշտությունը և բարձր գնահատեց ուսանողների մանկավարժական պրակտիկայի արդյունքները։
ՀՐԱՎԻՐՈՒՄ ԵՆՔ ՈՒՍԱՆՈՂԱԿԱՆ ԳԻՏԱԺՈՂՈՎԻ՝ ՆՎԻՐՎԱԾ ԳԱՎԱՌ ԲԱԶՄԱԲՆԱԿԱՎԱՅՐ ՀԱՄԱՅՆՔԻ ԶԱՐԳԱՑՄԱՆ ՈՒՂԻՆԵՐԻՆ
Սիրով տեղեկացնում ենք, որ Գավառի պետական համալսարանի բնագիտատնտեսագիտական ֆակուլտետի ուսանողական գիտական ընկերությունը ս. թ. ապրիլի 25-ին, ժամը՝ 13:00-ին կազմակերպում է ուսանողական գիտաժողով՝ նվիրված Գավառ խոշորացված համայնքի զարգացման ուղիներին։
Գիտաժողովն անցկացվելու է Հրաչյա Աճառյանի անվան լսարանում /ԳՊՀ կենտրոնական մասնաշենք, 3-րդ հարկ, 316 լսարան/։
Սիրով հրավիրում ենք ուսանողներին և Գավառ բազմաբնակավայր համայնքի զարգացման հեռանկարներով հետաքրքրված անձանց՝ մասնակցելու գիտաժողովին։