Flat Preloader Icon

ՀՐԱՎԻՐՈՒՄ ԵՆՔ ԳՊՀ ՄԱԳԻՍՏՐԱՏՈՒՐԱՅԻ ՈՒՍԱՆՈՂՆԵՐԻ ՈՒՇԱԴՐՈՒԹՅՈՒՆԸ․ ՕԳՏՎԵՔ ԻՍՊԱՆԻԱՅԻ ՎԱԼԼԱԴՈԼԻԴԻ ՀԱՄԱԼՍԱՐԱՆՈՒՄ ՊՐԱԿՏԻԿԱ ԱՆՑՆԵԼՈՒ ՀՆԱՐԱՎՈՐՈՒԹՅՈՒՆԻՑ

Posted on by Nune Miribyan
Գավառի պետական համալսարանի մագիստրատուրայի սիրելի՛ ուսանողներ, տեղեկացնում ենք ձեզ, որ Եվրոպական միության «Էրազմուս+» ծրագրի
շրջանակում Գավառի պետական համալսարանի և Իսպանիայի Թագավորության Վալլադոլիդի համալսարանի միջև կնքված պայմանագրի համաձայն՝ դուք հնարավորություն ունեք 2026-2027 ուսումնական տարվա ընթացքում 5 ամիս ժամկետով հետազոտական պրակտիկա անցնելու Վալլադոլիդի համալսարանում:
Անգլերեն լեզվի B2 մակարդակի իմացությունը պարտադիր է:
Ծրագիրը շահառու ուսանողներին տրամադրում է անհատական կրթաթոշակ, ինչպես նաև հոգում է ճանապարհածախսը: Ձեր ուշադրությունն ենք հրավիրում այն հանգամանքին, որ մագիստրատուրայի ծրագրի մասնագիտական ուղղվածության և հետազոտական ​​առաջարկի միջև ճշգրիտ համապատասխանությունը կարևոր է։ Ակադեմիական շարժունության իրականացման համար պարտադիր պայման է մագիստրանտի մասնագիտության, նրա հետազոտական ​​հետաքրքրությունների և ընդունող դասախոսի կողմից առաջարկվող հետազոտական ​​թեմայի միջև համապատասխանությունը, հետևաբար դիմորդներին խրախուսում ենք կապ հաստատել յուրաքանչյուր առաջարկի համար նախատեսված ակադեմիական համակարգողի հետ՝ հետազոտական ​​թեմաները պարզաբանելու և իրենց աշխատանքի պլանի հստակ նախագիծը կազմելու համար։
Վալլադոլիդի համալսարանի հետազոտական ոլորտների մասին տեղեկատվությանը կարելի է ծանոթանալ բուհի ծրագրերի և ծառայությունների ցանկում՝ հետևյալ հղմամբ https://uvamobplus2.uva.es/publico/courses ։
Դիմում-հայտերն անհրաժեշտ է ներկայացնել՝ հետևյալ հղմամբ․ https://uvamobplus2.uva.es/publico/apply ։
Իրականացված պրակտիկաների վերաբերյալ նախկին կրթաթոշակառուների կարծիքներին կարող եք ծանոթանալ հետևյալ հղմամբ՝ https://erasmusplusuva.wordpress.com/։
Դիմումների ընդունման վերջնաժամկետը 2026թ. ապրիլի 28-ն է։
Լրացուցիչ տեղեկությունների համար կարող եք դիմել ԳՊՀ արտաքին կապերի եւ լրատվության բաժնին կամ զանգահարել +374-60-46-12-99 հեռախոսահամարով։
Մաղթում ենք հաջողություն։

ՀՐԱՎԻՐՈՒՄ ԵՆՔ ԱՆՄՈՌԱՆԱԼԻ ՃԱՄՓՈՐԴՈՒԹՅԱՆ՝ «ԹՈՒՄԱՆՅԱՆԱԿԱՆ ՊԱՏԳԱՄՆԵՐԻ ԽՈՐՀՈՒՐԴԸ ՀԱԶԱՐԱՆ ԲԼԲՈՒԼԻ ՈՐՈՆՈՒՄՆԵՐՈՒՄ»

Posted on by Nune Miribyan
Սիրելի՛ համալսարանականներ, դպրոցների ուսուցիչներ և աշակերտներ, հարգելի՛ բարեկամներ, հրավիրում ենք գեղեցիկ ու հետաքրքիր ճամփորդության, որի մասնակիցը կարող եք դառնալ՝ ներկա գտնվելով «Թումանյանական պատգամների լույսն ու խորհուրդը Հազարան բլբուլի որոնումներում» թեմայով նախագծային աշխատանքի ներկայացմանը, որը տեղի կունենա ս․ թ․ մարտի 18-ին, ժամը՝ 13։00-ին, Գավառի պետական համալսարանի կենտրոնական մասնաշենքի Հրաչյա Աճառյանի անվան լսարանում:
Նախագծային աշխատանքը կներկայացնեն Գավառի ավագ դպրոցի 10-րդ դասարանի աշակերտները՝ հայոց լեզվի և գրականության ուսուցչուհի Լիլիկ Հակոբյանի ղեկավարությամբ:
Սիրով սպասում ենք խորհրդավոր ճամփորդության։

ՀԱՅՏԱՐԱՐՈՒԹՅՈՒՆ․ ԳՊՀ ՈՒՍԱՆՈՂՆԵՐՆ ՈՒ ԴԱՍԱԽՈՍՆԵՐՆ ՈՒՆԵՆ ԵՎՐՈՊԱԿԱՆ ԲՈՒՀԵՐՈՒՄ ՍՈՎՈՐԵԼՈՒ ԵՎ ԴԱՍԱՎԱՆԴԵԼՈՒ ՀՆԱՐԱՎՈՐՈՒԹՅՈՒՆ

Posted on by Nune Miribyan

Գավառի պետական համալսարանի սիրելի՛ ուսանողներ, պրոֆեսորադասախոսական և վարչական  անձնակազմի հարգելի՛ անդամներ,  տեղեկացնում ենք ձեզ, որ Եվրոպական միության «Էրազմուս+» ծրագրի շրջանակում Գավառի պետական համալսարանի և եվրոպական գործընկեր բուհերի միջև կնքված  պայմանագրերի համաձայն՝ ԳՊՀ բակալավրիատի և մագիստրատուրայի ուսանողները հնարավորություն ունեն  2026-2027 ուսումնական տարվա 2-րդ կիսամյակում՝ 5 ամիս ժամկետով ուսանելու, իսկ պրոֆեսորադասախոսական և վարչական անձնակազմի անդամները՝ 2026-2027 ուստարվա 1-ին կիսամյակում դասավանդելու կամ վերապատրաստվելու Պորտուգալիայի Մինհո, Ավեյրո և Էվորա  համալսարաններում:

Անգլերեն լեզվի B2 մակարդակի իմացությունը պարտադիր է:

Ծրագիրը շահառու ԳՊՀ ուսանողներին և դասախոսներին տրամադրում է անհատական կրթաթոշակ, ինչպես նաև հոգում է ճանապարհածախսը: ԵՄ «Էրազմուս+» միջազգային կրեդիտային շարժունության ծրագրի մասին մանրամասն տեղեկատվություն կարող եք ստանալ՝ Application Guide  հղումով։

Ծրագրի դիմումներն ընդունվում են առցանց՝ հետևյալ հղումով․

https://uminho.moveonfr.com/form/67d170d4f484e754ea054497/eng :

Դիմումների ընդունման վերջնաժամկետը  2026թ. ապրիլի 10-ն է։ 

Լրացուցիչ տեղեկությունների համար կարող եք այցելել ԳՊՀ արտաքին կապերի և լրատվության բաժին կամ զանգահարել +374-60-46-12-99 հեռախոսահամարով։

Մաղթում ենք հաջողություն։

 

 

ՑԵՐԵԿՈՒՅԹ՝ ՆՎԻՐՎԱԾ ՎԱՀԱՆ ՏԵՐՅԱՆԻՆ․ «ՄԹՆՇԱՂԻՑ ԼՈՒՍԱԲԱՑ»

Posted on by Nune Miribyan
Գավառի պետական համալսարանի հումանիտար մասնագիտությունների ֆակուլտետի բակալավրիատի առկա բաժնի «Հայոց լեզու և գրականություն» մասնագիտության 4-րդ կուրսի ուսանողուհի Աննա Լազարյանը ակտիվ մանկավարժական պրակտիկայի ընթացքում Գավառի Պապին Ղանդիլյանի անվան միջնակարգ դպրոցում կազմակերպեց գրական-մշակութային միջոցառում՝ «Տերյան․ Մթնշաղից մինչև լուսաբաց» խորագրով։
Ցերեկույթին մասնակցում էին դպրոցի 8-րդ, 11-րդ և 12-րդ դասարանների աշակերտները։ Նրանք ներկայացրին Վահան Տերյանի քնարական ստեղծագործություններից հատվածներ, անդրադարձան բանաստեղծի կյանքի և գրական ժառանգության կարևոր դրվագներին։
Միջոցառման նպատակն էր աշակերտների օգնությամբ ու ջանքերով բացահայտել հայ դասական պոեզիայի գեղեցկությունը, արժևորել Վահան Տերյանի ստեղծագործությունները և նրա տեղը հայ գրականության մեջ։
​«Այսօր մենք հարստացանք Վահան Տերյանի ստեղծագործությունների սքանչելի աշխարհում, զգացինք նրա սերը, թախիծն ու լռությունը։ Տերյանական տողերը մեզ հիշեցրին, որ անկեղծ խոսքը երբեք չի կորցնում իր ուժն ու զգացմունքայնությունը։ Թող Տերյանի պոեզիան շարունակի արձագանքել մեր հոգիներսում, մեզ սովորեցնի տեսնել գեղեցիկը մթնշաղից լուսաբաց»,- նշեց Աննա Լազարյանը։
Միջոցառումն անցավ ջերմ մթնոլորտում՝ մեկ անգամ ևս ընդգծելով հայ գրականության դասականների ազդեցությունը երիտասարդ սերնդի հոգևոր դաստիարակության ու գեղագիտական կրթության գործում։

ԳՊՀ-ՈՒՄ ԿԱՅԱՑԱՎ ՍԵՄԻՆԱՐ-ՔՆՆԱՐԿՈՒՄ՝ ՆՎԻՐՎԱԾ ԲՆԱԿԱՆ ԱՂԵՏՆԵՐԻՆ

Posted on by Nune Miribyan
Գավառի պետական համալսարանում անցկացվեց սեմինար-քննարկում՝ նվիրված բնական աղետներին՝ երկրաշարժերին, հրաբուխներին, սողանքներին, փլուզումներին։ Սեմինար-քննարկումը վարեց Գավառի պետական համալսարանի շրջանավարտ, Գավառի հրշեջ-փրկարարական օղակի հրամանատար, փրկարար ծառայության ավագ Գառնիկ Թոռչյանը, ով ուսանողներին ներկայացրեց բնական աղետների հետևանքները, անվտանգության կարևոր միջոցները։
Ուսանողները մասնակցեցին քննարկմանը, ստացան իրենց հուզող հարցերի պատասխանները։
Սեմինարը նպատակ ուներ բարձրացնել սովորողների իրազեկվածությունը բնական աղետների և աղետի պայմաններում վարքագծի թույլատրելի կանոնների, քաղաքացիական պաշտպանության նորմերի ու սկզբունքների վերաբերյալ։

ՀԱՅ ԿՐԹԱԿԱՆ ՀԻՄՆԱՐԿՈՒԹՅՈՒՆԸ ՀԱՅՏԱՐԱՐՈՒՄ Է ԿՐԹԱԹՈՇԱԿԻ ՄՐՑՈՒՅԹ` 2026-2027 ՈՒՍՈՒՄՆԱԿԱՆ ՏԱՐՎԱ ՀԱՄԱՐ

Posted on by Nune Miribyan
Հայ կրթական հիմնարկությունը հայտարարում է կրթաթոշակի մրցույթ` 2026-2027 ուսումնական տարվա համար: Մրցույթին կարող են մասնակցել ՀՀ պետական բուհերի առկա, վճարովի համակարգում 2026թ․ սեպտեմբերից բակալավրիատի առաջին կուրսերում սովորել պատրաստվող դիմորդները, ինչպես նաև բարձր կուրսերի ուսանողներ, մագիստրատուրայի սովորողներ:
Ակադեմիական միջին նիշը /ՄՈԳ՝ միջին որակական գնահատական/ պետք է լինի առնվազն 100/75 միավոր 20/15, 10/7 կամ 4/3մ: Բացառություն է կազմում միայն ԵՊՀ Ինֆորմատիկայի և կիրառական մաթեմատիկայի ֆակուլտետը, որի դեպքում ակադեմիական միջին նիշը կարող է կազմել 11 միավոր։
Կրթաթոշակները տրամադրվելու են տվյալ ուսումնական տարվա ուսման վարձի 90%-ի չափով (ՀԿՀ-ի կողմից վճարվող գումարը չի գերազանցելու 720,000 ՀՀ դրամի շեմը)՝ խրախուսելու և աջակցելու բարձր առաջադիմությամբ և միաժամանակ նյութապես անապահով ուսանողներին, ովքեր սովորում են ՀԿՀ-ի կողմից նախընտրած մասնագիտություններով։
Մրցույթին մասնակցելու համար հայտերն ընդունվում են միայն առցանց։
Մրցույթը կանցկացվի 2026թ․ մարտի 2-ից մինչև ապրիլի 30-ը ներառյալ:
Մինչ դիմում-հայտ լրացնելը, պետք է ծանոթանալ Հայ կրթական հիմնարկության կողմից հովանավորվող համալսարանների և բաժինների ցանկին՝ https://aef.am/university/
Եվ եթե համալսարանն ու բաժինը կա ցանկում, ապա պետք է մուտք գործել և լրացնել առցանց հայտը՝ https://apply.aef.am/
Հայ կրթական հիմնարկություն

ԻՐԱՎԱԲԱՆԱԿԱՆ ԿԼԻՆԻԿԱԿԱՆ ԿՐԹՈՒԹՅՈՒՆԸ՝ ՔՆՆԱՐԿՄԱՆ ԱՌԱՐԿԱ

Posted on by Nune Miribyan
Ս․ թ․ փետրվարի 27-ին Երևանի պետական համալսարանում կայացավ իրավաբանական կլինիկական կրթությանը նվիրված գիտական հոդվածների ժողովածուի շնորհանդես, որը կազմակերպվել էր «Ռաուլ Վալենբերգի անվան մարդու իրավունքների և մարդասիրական իրավունքի ինստիտուտ»-ի հայաստանյան մասնաճյուղի և Երևանի պետական համալսարանի իրավաբանական կլինիկայի համագործակցությամբ։ Միջոցառմանը մասնակցեց Գավառի պետական համալսարանի հումանիտար մասնագիտությունների ֆակուլտետի իրավագիտության ամբիոնի դասախոս Անի Ամիրյանը։ Ներկա էին էին իրավաբանական կլինիկաների ղեկավարներ Եվրասիա միջազգային, Երևանի «Հյուսիսային», Գյումրու «Պրոգրես» համալսարաններից, Փաստաբանական ակադեմիայից։ Քննարկվեցին իրավաբանական կլինիկաների ինստիտուցիոնալ, ֆինանսական և կազմակերպական խնդիրները, համագործակցության հնարավոր ուղիները։ Միջոցառման նպատակն էր ոչ միայն ներկայացնել հրապարակված ժողովածուն, այլև Հայաստանում խթանել իրավաբանական կլինիկական կրթությունը, նպաստել այդ ոլորտում մասնագիտական երկխոսությանը և համագործակցությանը։

ԳՊՀ-ՈՒՄ ՆՇՎԵՑ ՈՍԿԵՂԵՆԻԿ ՄԱՅՐԵՆԻԻ ՏՈՆԸ․ «ՀԱՅ ԼԵԶՈՒՆ ՏՈՒՆՆ Է ՀԱՅՈՒՆ․․․»

Posted on by Nune Miribyan
Գավառի պետական համալսարանում ս․ թ․ փետրվարի 21-ին կայացավ «Մեր ոսկեղենիկ մայրենին» խորագիրը կրող ցերեկույթ՝ նվիրված Մայրենի լեզվի տոնին: Միջոցառումը կազմակերպել էին ԳՊՀ ուսանողական խորհրդի նախագահ, մագիստրատուրայի «Հայոց լեզու և գրականություն» բաժնի 1-ին կուրսի ուսանողուհի Լաուրա Մանուկյանը և հումանիտար մասնագիտությունների ֆակուլտետի ուսանողական գիտական ընկերության նախագահ, նույն կուրսի ուսանողուհի Քրիստինե Բատիկյանը: Մասնակիցները հումանիտար մասնագիտությունների ֆակուլտետի ուսանողներն էին: Միջոցառմանը ներկա էին ԳՊՀ ռեկտոր Ռուզաննա Հակոբյանը, պրոֆեսորադասախոսական կազմի ներկայացուցիչներ, ուսանողներ: Ուսանողները ցերեկույթի առաջին մասում ներկայացրին հայոց լեզուն որպես ազգային ինքնության հիմք, պետականության հենասյուն և մշակութային անգնահատելի ժառանգություն, խոսեցին հայերենի զարգացման փուլերի մասին՝ ընդգծելով յուրաքանչյուր փուլի ինքնատիպությունն ու բնորոշ լեզվական առանձնահատկությունները: Հնչեցին խորիմաստ ասույթներ լեզվի մասին, սքանչելի երգեր և բանաստեղծություններ հին, միջնադարյան և նոր գրականության էջերից։ Միջոցառման երկրորդ մասում անցկացվեց խաղ-վիկտորինա, որի նպատակն էր խթանել ուսանողների սերը գրքի և գրականության նկատմամբ։ Վիկտորինայի արդյունքում հաղթող ճանաչված մասնակիցները ստացան գրքեր:
Ցերեկույթն ավարտվեց Մուշեղ Իշխանի բանաձևումով՝ «Հայ լեզուն տունն է հայուն աշխարհիս չորս ծագերուն․․․»։

ԿԱՅԱՑԱՎ ԵՎՐՈՊԱԿԱՆ ՄԻՈՒԹՅԱՆ «ԷՐԱԶՄՈՒՍ+ T-GREEN» ԾՐԱԳՐԻ ԱՄՓՈՓԻՉ ՀԱՄԱԺՈՂՈՎԸ

Posted on by Nune Miribyan

Ս․ թ․ փետրվարի 18-ից 20-ը Ճարտարապետության և շինարարության Հայաստանի ազգային համալսարանում կայացավ Եվրոպական միության «Էրազմուս+T-GREEN․ Հետբակալավրի կրթության փոխակերպումը հանուն կանաչ և կայուն ապագայի» եռամյա ծրագրի եզրափակիչ համաժողովը, որն ամփոփեց նախագծի շրջանակում իրականացված աշխատանքները և ՀՀ բարձրագույն կրթության ոլորտում արձանագրված կարևոր արդյունքները։ Ծրագրի նպատակն էր նպաստել Հայաստանում բուհական կրթության բարեփոխմանը՝ խրախուսելով անցումը դեպի ապագային միտված, կանաչ և միջառարկայական կրթական ծրագրեր, ինչպես նաև բարձրացնել կրթության որակը՝ ապահովելով արդի կրթական միջավայր, ընդլայնելով բուհերի միջազգային համագործակցությունը և խթանելով ուսանողների ակադեմիական շարժունությունը։ Ողջույնի խոսքով հանդես եկավ Հայաստանում Եվրոպական միության պատվիրակության ներկայացուցիչ Սուսանա Մարտինսը: Մասնակիցներին ողջունեց և շնորհավորեց Ճարտարապետության և շինարարության Հայաստանի ազգային համալսարանի ռեկտոր Մանուկ Բարսեղյանը՝ ընդգծելով միջազգային համագործակցության նշանակությունը բարձրագույն կրթության արդիականացման գործում։

Համաժողովին մասնակցում էին ՀՀ ԿԳՄՍ նախարարության, Բարձրագույն կրթության և գիտության կոմիտեի, «Էրազմուս+» ծրագրի ազգային գրասենյակի ներկայացուցիչներ, հայաստանյան և եվրոպական գործընկեր բուհերի պատվիրակներ, այդ թվում՝ Գավառի պետական համալսարանի ուսումնագիտական գծով պրոռեկտոր Նելլի Կուտուզյանը, հաշվապահական հաշվառման ամբիոնի վարիչ Հակոբ Ղուլոյանը, նույն ամբիոնի դասախոս, ԳՊՀ գլխավոր հաշվապահ Գուրգեն Մուրադյանը, արտաքին կապերի և լրատվության բաժնի վարիչ Լիլիթ Թոռչյանը և նույն բաժնի մասնագետ Նունե Միրիբյանը։

Մասնակիցները փաստեցին, որ Եվրոպական միության ֆինանսավորմամբ իրականացված «Էրազմուս+T-GREEN» նախագիծը նշանակալի ներդրում ունեցավ Հայաստանում ժամանակակից, կանաչ և կայուն մագիստրոսական կրթական ծրագրերի մշակման և իրականացման գործում՝ նպաստելով ապագայի մարտահրավերներին դիմակայելու ունակ մասնագետների պատրաստմանը։ Նախագծի համակարգող Վարազդատ Հովհաննիսյանը ներկայացրեց ծրագրի իրականացման հիմնական արդյունքները՝ ընդգծելով մագիստրոսական կրթության արդիականացման, կանաչ տեխնոլոգիաների և կայուն զարգացման հայեցակարգերի ինտեգրման ուղղությամբ գրանցված ձեռքբերումները։

Գավառի պետական համալսարանի արտաքին կապերի և լրատվության բաժնի վարիչ Լիլիթ Թոռչյանը ներկայացրեց համալսարանում մագիստրոսական կրթական ծրագրերի վերանայման, կարողությունների զարգացման և կանաչ մտածողության խթանման ուղղությամբ կատարված աշխատանքները, նշեց, որ նախագծի շրջանակում ԳՊՀ-ում մշակվել և Հայաստանի պետական տնտեսագիտական համալսարանի հետ համագործակցությամբ իրականացվում է «Կանաչ տնտեսություն և կայուն զարգացում» մագիստրոսական կրթական ծրագիրը։

Եվրոպական գործընկեր բուհերի՝ Պորտուգալիայի կաթոլիկ, Միջազգային Հելլենիկ համալսարանների, Միկոլաս Ռոմերիսի անվան համալսարանի, Յագելոնյան համալսարանի ներկայացուցիչներն ամփոփեցին նախագծի արդյունքները՝ կարևորելով բարձրագույն կրթության ոլորտում կանաչ և կայուն զարգացման սկզբունքների ներդրումը։

Համաժողովը դարձավ արդյունավետ հարթակ՝ ներկայացնելու ծրագրի շրջանակում ձեռք բերված արդյունքները, ամրապնդելու միջազգային համագործակցությունը և նախանշելու բարձրագույն կրթության հետագա զարգացման ուղիները:

Scroll to Top
Գավառի պետական համալսարան