Գավառի պետական համալսարան

Հանքագործի և մետալուրգի օրվա կապակցությամբ Գավառի պետական համալսարանի կառավարման և ֆինանսների ամբիոնի վարիչ, տնտեսագիտության թեկնածու, դոցենտ Սամվել Ամիրխանյանը և ԳՊՀ «Տնտեսագիտություն» բաժնի շրջանավարտ Արմինե Սաֆոյանը մասնակցեցին Զանգեզուրի պղնձամոլիբդենային կոմբինատի /ԶՊՄԿ/ կազմակերպած միջոցառումներին։ Համալսարանի ներկայացուցիչները հանդիպեցին կոմբինատի գլխավոր տնօրեն Ռոման Խուդոլիի, գլխավոր տնօրենի առաջին տեղակալ Վարդան Ջհանյանի, կայուն զարգացման տնօրեն Արմեն Ստեփանյանի, արտաքին հարաբերությունների և արդյունաբերական ինտեգրման տնօրեն Աննա Սաղաբալյանի և լրատվության բաժնի պետ Արայիկ Մարգարյանի հետ։ Նրանք մասնակցեցին Հանքագործի և մետալուրգի օրվան նվիրված հոբելյանական միջոցառմանը, որի ընթացքում նշվեց, որ Սամվել Ամիրխանյանի գիտական ղեկավարությամբ ԳՊՀ բակալավրիատի 4-րդ կուրսի ուսանողուհի Արմինե Սաֆոյանը կատարել է ավարտական աշխատանք՝ նվիրված Զանգեզուրի պղնձամոլիբդենային կոմբինատի գործունեության ուսումնասիրությանը։ Համահեղինակությամբ պատրաստվել է նաև գիտական հոդված։

Արմինե Սաֆոյանը հանդես եկավ զեկուցմամբ՝ ներկայացնելով իր ավարտական աշխատանքի հիմնական դրույթները, հետազոտության նպատակը և այն շարժառիթները, որոնք պայմանավորել են  թեմայի ընտրությունը։ ԳՊՀ պատվիրակները եղան հանքավայրում, ծանոթացան հանքաքարի արդյունահանման գործընթացներին, մասնակցեցին մշակութային միջոցառումներին և վառ տպավորություններով վերադարձան Գավառ։

Գավառի պետական համալսարանի ռեկտորատը շնորհավորում է ոլորտի աշխատակիցներին՝ Հանքագործի և մետալուրգի օրվա առիթով, և շնորհակալություն  հայտնում «Զանգեզուրի պղնձամոլիբդենային կոմբինատ» ՓԲԸ-ի ղեկավարությանը՝ արդյունավետ համագործակցության համար։

 

 

Հարգելի՛ դիմորդներ, տեղեկացնում ենք, որ Գնահատման և թեստավորման կենտրոնը ս․ թ․ հուլիսի 20-ից կազմակերպում է լրացուցիչ մրցույթի (բուհերում թափուր մնացած տեղերի) հայտագրման գործընթացը:

Dimord.am կայքէջում դիմում-հայտ կարող են ներկայացնել ինչպես հիմնական մրցույթից դուրս մնացած  դիմորդները, այնպես էլ հիմնական մրցույթին չմասնակցած,  սակայն միասնական քննություններից դրական միավորներ ունեցողները:

Թափուր տեղերի մրցույթին մասնակցող դիմորդը կարող է հայտագրել մեկ կամ ավելի բուհի  մինչև վեց մասնագիտություն, եթե այդ մասնագիտություններում առկա են թափուր տեղեր, և այդ մասնագիտությունների համար սահմանված միասնական քննություններից ունի դրական միավորներ:

Հայտագրման գործընթացը կավարտվի հուլիսի 26-ին, ժամը 18:00-ին:

Լրացուցիչ մրցույթը կամփոփվի հուլիսի 30-ին:

Մրցույթի կազմակերպման ընթացքում նախապատվությունը տրվելու է հիմնական մրցույթից դուրս մնացած դիմորդներին:

Հարցերի դեպքում կարող եք զանգահարել Գավառի պետական համալսարան՝ +374-60-46-12-43, 099-02-21-41 հեռախոսահամարներով, ինչպես նաև հարցերը հղել ԳՊՀ էլեկտրոնային փոստի հետևյալ հասցեներով՝ info@gsu, infogsu@mail.ru։

 

ԳՊՀ ընդունող հանձնաժողով

 

 

 

Գավառի պետական համալսարանի սիրելի՛ դիմորդներ, տեղեկացնում ենք ձեզ, որ Հայ օգնության ֆոնդի /ՀՕՖ/ «Ժիրայր Նիշանյան հիմնադրամի կրթավճար» ծրագիրը 2026 թվականին հանրակրթական դպրոցներն ավարտած և 2026-2027 ուսումնական տարում ԳՊՀ առաջին կուրս ընդունված, սոցիալապես անապահով, բարձր արդյունքներ արձանագրած սովորողների համար հայտարում է կրթավճարի մրցույթ։ Հայ օգնության ֆոնդի կրթական ծրագրերի մրցույթին մասնակցելու համար անհրաժեշտ է ներկայացնել առցանց /օնլայն/ դիմում ՀՕՖ-ի պաշտոնական կայքի միջոցով (կայքի հղումը՝ https://www.farusa.org/ )։ ՀՕՖ-ի բոլոր կրթավճարային ծրագրերի մասին տեղեկատվություն ստանալու, ինչպես նաև դիմումները լրացնելու համար կայքի նավարկության հատվածից /նավիգացիոն մենյուից/ անհրաժեշտ է ընտրել “What We Focus” կոճակը, իսկ այնուհետև ընտրել “Education” բաժինը։ Առձեռն, թղթային տարբերակով ներկայացված դիմումներ չեն ընդունվելու։ ՀՕՖ կայքի վերոնշյալ բաժինը բաց կլինի, և դիմումները կնդունվեն ՀՀ կրթության, գիտության, մշակույթի և սպորտի նախարարության գնահատման և թեստավորման կենտրոնի /ԿԳՄՍՆ ԳԹԿ-ի/ կողմից միասնական քննությունների արդյունքները և բուհեր ընդունված ուսանողների անունները հրապարակելուց հետո՝ ս․ թ․ հուլիսի 15-ից։Կրթավճարների պայմանները շարադրված են ՀՕՖ-ի հայտարարության տեքստում։
Մաղթում ենք ձեզ հաջողություն։

ՀՀ կրթության, գիտության, մշակույթի և սպորտի նախարարի 2026 թվականի հուլիսի 13-ի N 11-Լ հրամանի համաձայն՝ Գավառի պետական համալսարանը հայտարարում է 2026-2027 ուսումնական տարվա հեռակա ուսուցմամբ բակալավրի կրթական ծրագրերով փորձնական ընդունելություն։

Ընդունելությանը կարող են մասնակցել`

1. պետական և հավատարմագրված ոչ պետական մասնագիտական ուսումնական հաստատությունների հարակից ոլորտների մասնագիտություններով ամփոփիչ ատեստավորում անցած շրջանավարտները,
2. «Հանրակրթության մասին» ՀՀ օրենքի 38-րդ հոդվածի 5-րդ մասի պահանջը չբավարարելու պատճառով աշխատանքից ազատված ուսուցիչները։

Ընդունելությունն իրականացվում է հետևյալ մասնագիտություններով՝

1. Տարրական մանկավարժություն և մեթոդիկա,
2. Կենսաբանություն,
3. Աշխարհագրություն,
4. Պատմություն,
5. Հայոց լեզու և գրականություն,
6. Ռուսերեն և գրականություն։

Դիմումներն ընդունվում են մինչև 2026 թվականի հոկտեմբերի 24-ը՝ ներառյալ։

Դիմում-հայտի հետ անհրաժեշտ է ներկայացնել հետևյալ փաստաթղթերը.

1. դիմում՝ ուղղված ԳՊՀ ռեկտորին,
2. անձը հաստատող փաստաթղթի պատճեն,
3. մասնագիտական կրթությունը հավաստող ավարտական փաստաթղթի` դիպլոմի և դրա ներդիրի կրկնօրինակները։

«Հանրակրթության մասին» ՀՀ օրենքի 38-րդ հոդվածի 5-րդ մասի պահանջը չբավարարելու պատճառով աշխատանքից ազատված ուսուցիչները ներդիրը ներկայացնում են առկայության դեպքում, իսկ մասնագիտական կրթություն չունենալու պարագայում՝ ներկայացնում են միջնակարգ կրթությունը հավաստող ավարտական փաստաթուղթ՝ ատեստատ,

1. երկու լուսանկար (3×4 չափսի),
2. զինվորական գրքույկի կամ կցագրման վկայականի պատճեն (արական սեռի հավակնորդների համար),
3. հանրակրթական ուսումնական հաստատությունում ուսուցչի պաշտոն զբաղեցնելու փաստը հավաստող տեղեկանք կամ աշխատանքային գրքույկ (առկայության դեպքում), ինչպես նաև աշխատանքային պայմանագիրը լուծելու մասին իրավական ակտի պատճեն,
4. ՀՀ օրենսդրությամբ սահմանված արտոնությունները հավաստող փաստաթղթեր (առկայության դեպքում)։

Լրացուցիչ տեղեկությունների համար կարող եք դիմել Գավառի պետական համալսարանի ընդունող հանձնաժողովին՝ ՀՀ, Գեղարքունիքի մարզ, ք. Գավառ, Հրանտ Հակոբյան 1 հասցեով /հեռախոսներ՝ +374-60-46-03-02, +374-60-46-04-03, +374-60-46-12-43, էլեկտրոնային փոստի հասցեներ՝ info@gsu.am, infogsu@mail.ru/:

Ս․ թ․ հուլիսի 11-ին Գավառի պետական համալսարանի գիտական խորհրդի նիստում կայացավ քննարկում՝ նվիրված Եվրոպական միության «ԷՐԱԶՄՈՒՍ+ KPI4HE․ Հայաստանում ներառական, թվային ու կանաչ ուղղվածությամբ բարձրագույն կրթության պատշաճ կառավարման և որակի ապահովման գործունեության առանցքային ցուցանիշների ազգային շրջանակի (ԳԱՑԱՇ) ստեղծում» ծրագրին։ ԳՊՀ արտաքին կապերի և լրատվության բաժնի վարիչ Լիլիթ Թոռչյանը ներկայացրեց «ԷՐԱԶՄՈՒՍ+ KPI4HE» ծրագրի Որակի ապահովման ռազմավարության (Quality Assurance Strategy – QAS) շրջանակում մեկնարկած՝ նախագծի արդյունքների և ազդեցության գնահատման գործընթացը։ Այդ նպատակով իրականացվում է հարցում՝ պարզելու, թե որքանով է ծրագիրը նպաստել մասնակից բուհերի աշխատակիցների կարողությունների զարգացմանը, հիմնական կատարողական ցուցանիշների (KPIs) մշակման և ներդրման գործընթացին, ռազմավարական պլանավորմանը, համալսարանական կառավարման և որակի ապահովման համակարգերի կատարելագործմանը, ինչպես նաև գնահատելու նախագծի իրականացման ընդհանուր որակը։ Նշվեց, որ գնահատման գործընթացն ընդգրկում է նախագծի հիմնական արդյունքներն ու գործիքները, մասնավորապես՝ վերապատրաստման փաթեթը (Training Kit), «Ինստիտուցիոնալ հետազոտության և ռազմավարական պլանավորման ազգային ուղեցույցը» (GIRSPA), «Ինստիտուցիոնալ հետազոտության գործառնական ձեռնարկները» (OMIR), GIRSPA-ին համապատասխան վերանայված պետական ինստիտուցիոնալ հավատարմագրման չափանիշները, ինստիտուցիոնալ հետազոտության և ռազմավարական պլանավորման պիլոտային գործունեությունը, ինչպես նաև որակի ապահովման, տեղեկատվության տարածման և նախագծի կառավարման գործընթացները։

ԳՊՀ ռեկտոր Ռուզաննա Հակոբյանը կարևորեց ծրագրի նշանակությունը՝ ընդգծելով, որ  «ԷՐԱԶՄՈՒՍ+ KPI4HE» ծրագիրը Գավառի պետական համալսարանի համար դարձել է ոչ միայն միջազգային համագործակցության հաջողված օրինակ, այլև կառավարման մշակույթի և որակի ապահովման համակարգի զարգացման կարևոր խթան։ Տիկին Հակոբյանը նշեց, որ ծրագրի շրջանակում մշակված գործիքները կնպաստեն տվյալահեն որոշումների կայացմանը, ռազմավարական պլանավորման արդյունավետության բարձրացմանը և համալսարանի շարունակական զարգացմանը՝ վստահություն հայտնելով, որ իրականացվող գնահատումը կօգնի ոչ միայն արժևորել կատարված աշխատանքը, այլև նախանշել հետագա զարգացման նոր հնարավորություններ՝ ապահովելով «KPI4HE» ծրագրի արդյունքների կայունությունն ու երկարաժամկետ ազդեցությունը։

Գավառի պետական համալսարանի գիտական խորհրդի անդամները կարևորեցին նախագծի բոլոր շահակիցների ակտիվ մասնակցությունը գնահատման գործընթացին՝ այն դիտարկելով որպես համալսարանի որակի մշակույթի ամրապնդման և միջազգային համագործակցության արդյունքների գնահատման կարևոր բաղադրիչ։

 

 

 

Հայաստանում «Էրազմուս+» ազգային գրասենյակի նախաձեռնությամբ Հայաստանի պետական տնտեսագիտական համալսարանում անցկացվեց Եվրոպական միության «Էրազմուս+» նախագծերի հանրայնացման համաժողովը, որի ընթացքում ներկայացվեցին 2025 թվականի մրցույթի արդյունքներով ֆինանսավորված նախագծերը։

Համաժողովին ողջույնի խոսքով հանդես եկան ՀՀ ԿԳՄՍ նախարար Ժաննա Անդրեասյանը, Հայաստանում Եվրոպական միության դեսպան Վասիլիս Մարագոսը, Հայաստանի պետական տնտեսագիտական համալսարանի ռեկտոր Արմեն Գրիգորյանը և Հայաստանում «Էրազմուս+» ազգային գրասենյակի համակարգող Մարիանա Սարգսյանը։

Համաժողովի նպատակն էր հանրայնացնել նախագծերը, դրանցից ակնկալվող արդյունքները, ներկայացնել ծրագրերի բովանդակային ուղղություններն ու համագործակցության հնարավորությունները, ինչպես նաև ձևավորել բաց համագործակցության հարթակ՝ միավորելով բարձրագույն կրթության, միջին մասնագիտական կրթության, երիտասարդության և սպորտի ոլորտների շահառուներին, պետական մարմիններին և այլ գործընկեր կազմակերպություններին։

Գավառի պետական համալսարանը, ի թիվս այլ հայաստանյան բուհերի և հասարակական կազմակերպությունների, համաժողովի «Նեթվորքինգ» հատվածում ներկայացավ համապատասխան տեղեկատվական նյութերով։ ԳՊՀ-ից համաժողովին մասնակցեց արտաքին կապերի և լրատվության բաժնի վարիչ Լիլիթ Թոռչյանը։

 

2026 թվականի հուլիսի 5-ին՝ Հայաստանի Հանրապետության Սահմանադրության օրը, Գավառի պետական համալսարանում կայացավ 2025-2026 ուսումնական տարվա շրջանավարտների դիպլոմների հանձնման հանդիսավոր արարողությունը։ Համալսարանը, իր առաքելությանը հավատարիմ, ճանապարհեց շրջանավարտների 29-րդ սերնդին՝ 210 բակալավրի և մագիստրոսի, ովքեր համալրեցին ԳՊՀ ինը հազարից ավելի շրջանավարտների շարքերը։ Համալսարանի ռեկտոր Ռուզաննա Հակոբյանը ողջունեց և շնորհավորեց ներկաներին Սահմանադրության օրվա առթիվ,  ջերմորեն շնորհավորեց շրջանավարտներին և նրանց ծնողներին, շնորհակալություն հայտնեց Գավառի պետական համալսարանի դասախոսներին, ամփոփիչ ատեստավորման հանձնաժողովներին և  բոլոր բարերարներին։

Ավանդույթի համաձայն՝ հնչեց ԳՊՀ մագիստրոսի երդումը, որից հետո շրջանավարտները խորին երախտագիտություն հայտնեցին սիրելի կրթօջախին՝ հավաստիացնելով, որ հիմնադիր ռեկտոր Հրանտ Հակոբյանի սերմանած վեհ արժեքներն ու պատվիրաններն ապրում են յուրաքանչյուր համալսարանականի հոգում, մտքում և գործերում։ Նրանք շնորհակալություն հայտնեցին բուհի համահիմնադիր Հրանուշ Հակոբյանին և վարչական,  պրոֆեսորադասախոսական անձնակազմին՝ առաքինի և պատասխանատու անհատներ, որակյալ մասնագետներ, հայրենասեր քաղաքացիներ պատրաստելու նվիրական աշխատանքի համար:

Շրջանավարտներին դիպլոմներ հանձնեցին և բարեմաղթանքի խոսքեր հղեցին ԳՊՀ պրոռեկտոր Նելլի Կուտուզյանը, ֆակուլտետների դեկաններ Թաթուլ Ասոյանը, Մարտին Ավագյանը, ամբիոնների վարիչներ Համլետ Ղաջոյանը, Սամվել Ամիրխանյանը, Հակոբ Ղուլոյանը, Գայանե Միրիբյանը, Վարազդատ Ավետիսյանը։ «Իրավագիտություն» մասնագիտության մագիստրատուրայի շրջանավարտներին դիպլոմներ հանձնեց և հաջողության իր բանաձևը ներկայացրեց ԳՊՀ «Իրավագիտություն» մասնագիտության 2025 թվականի շրջանավարտ Վան Սիմոնյանը: Միջոցառումը վարեցին հումանիտար մասնագիտությունների ֆակուլտետի ուսանողական խորհրդի նախագահ Անի Մանուկյանը և «Իրավագիտություն» մասնագիտության շրջանավարտ Պապին Կարապետյանը, որոնք ուսանողների անունից շրջանավարտներին մաղթեցին հաջողություններ մասնագիտական ոլորտում և շարունակական ձեռքբերումներ կյանքի բոլոր բնագավառներում։

Դիպլոմների շնորհման արարողությունն ուղեկցվեց շրջանավարտների հաջողությունների մասին պատմող ոգեշնչող տեսանյութերով, եվրոպական գործընկեր բուհերում սովորող ԳՊՀ ուսանողների առցանց շնորհավորանքներով ու բարեմաղթանքներով։

Գեղեցիկ պարային, երաժշտական կատարումներով միջոցառումը զարդարեցին Գավառի արվեստի դպրոցի սաները, դաշնամուրային բաժնի աշակերտ Սամվել Խաչատրյանը, նույն դպրոցի սան Հայրապետ Հայրապետյանը, ջութակահար Էլեն Շհոյանը։

Բարի երթ և բարին ընդ ձեզ, Գավառի պետական համալսարանի սիրելի՛ շրջանավարտներ:

 

Գավառի պետական համալսարանի ուսանողները մասնակցեցին «CaseKey 2026» բիզնես խնդիրների լուծման մրցույթի մեկնարկային միջոցառմանը՝ միանալով հարյուրավոր երիտասարդների, ովքեր պատրաստվում են առաջիկա ամիսներին իրենց ուժերը փորձել իրական բիզնես մարտահրավերներով լեցուն հիմնախնդիրների լուծման գործում։
Միջոցառմանը մասնակցեցին ԳՊՀ բնագիտատնտեսագիտական ֆակուլտետի ուսանողներ Արմինե Սաֆոյանը, Օֆելյա Մանուկյանը և Օլյա Ավետիսյանը։ Թիմի մարզիչներն են ԳՊՀ շրջանավարտ, Կառավարման և ֆինանսների ամբիոնի դասախոս Աստղիկ Հովեյանը և «Եվրասիա» միջազգային համալսարանի մագիստրոս Ավետիք Խոստեղյանը։ Մասնակիցներին ուղեկցում էր ԳՊՀ կառավարման և ֆինանսների ամբիոնի վարիչ Սամվել Ամիրխանյանը։
«CaseKey» բիզնես խնդիրների մրցույթը Հայաստանի առաջատար ուսանողական մրցույթներից է, որը խթանում է կրթությունը, մրցակցությունը և մասնագիտական զարգացումը։ Ծրագրի կարևոր բաղադրիչներից է «CaseKey Academy»-ն, որը հնարավորություն է ընձեռում մասնակիցներին՝ սովորելու տեղական և միջազգային փորձագետներից, զարգացնելու բիզնես վերլուծության, ռազմավարական մտածողության, ֆինանսների, մարքեթինգի և ներկայացման հմտությունները։
Մասնակցելով մրցութային ծրագրի մեկնարկին՝ ԳՊՀ ուսանողները հնարավորություն ունեցան ծանոթանալու ծրագրի նոր ձևաչափին, առաջիկա փուլերին և մրցույթի շրջանակում իրենց սպասվող կրթական ու մրցութային հնարավորություններին։
Գավառի պետական համալսարանը շարունակաբար աջակցում է ուսանողների մասնագիտական զարգացմանն ուղղված նախաձեռնություններին և արդեն մի քանի տարի ակտիվ մասնակցություն է ցուցաբերում ծրագրին։ Վստահ ենք, որ այս տարի ևս մեր ուսանողները կդրսևորեն իրենց գիտելիքները, ստեղծագործական մտածողությունն ու թիմային աշխատանքի հմտությունները՝ լավագույնս ներկայացնելով համալսարանը։

Գավառի պետական համալսարանը հայտարարում է միջին մասնագիտական ուսումնական հաստատությունների (քոլեջների) բարձր առաջադիմություն ցուցաբերած շրջանավարտների ընդունելություն՝ 2026-2027 ուսումնական տարում շարունակական կրթությամբ բակալավրի կրթական ծրագրերով 2-րդ կուրսից ուսումը շարունակելու համար՝ հետևյալ մասնագիտություններով․
1. Տարրական մանկավարժություն և մեթոդիկա
2. Հայոց լեզու և գրականություն
3. Պատմություն
4. Անգլերեն լեզու և գրականություն
5. Հաշվապահական հաշվառում և հարկում (ըստ ոլորտի)
6. Ֆինանսներ (ըստ ոլորտի)
7. Տնտեսագիտություն
8. Իրավագիտություն
9. Համակարգչային ճարտարագիտություն
10. Սերվիս:
Գավառի պետական համալսարանում 2026-2027 ուսումնական տարում շարունակական կրթությամբ ուսումը շարունակել ցանկացող հավակնորդների դիմումների ընդունումը կկազմակերպվի մինչև 2026 թվականի օգոստոսի 30-ը։
Դիմումին կից անհրաժեշտ է ներկայացնել հետևյալ փաստաթղթերը․
1. անձը հաստատող փաստաթուղթը և պատճենը,
2. ավարտական փաստաթղթի՝ դիպլոմի և ներդիրի բնօրինակները,
3. ամփոփիչ ատեստավորման հանձնաժողովի արձանագրության պատճենը,
4. զինվորական ծառայության առնչության վերաբերյալ փաստաթուղթը և պատճեն (առկայության դեպքում),
5. 6 լուսանկար (3×4 չափսի)։
Շարունակական կրթության կարգով դիմորդները կարող են սահմանված կարգով՝ առարկայական տարբերությունները հանձնելով ընդունվել ԳՊՀ բակալավրիատի առկա և հեռակա բաժինների 2-րդ կուրսեր՝ համապատասխան մասնագիտություններով։

Գավառի պետական համալսարանի սիրելի՛ ուսանողներ, երիտասարդ աշխատակիցներ, դուք ունեք ստեղծագործելու, համարձակ նախաձեռնություններով հանդես գալու և ձեր երազանքները մարմնավորելու հնարավորություն՝ մասնակցելով 2026 թվականի «100 գաղափար Հայաստանի համար» նորարարական նախագծերի և գիտատեխնիկական մշակումների համահայկական մրցույթին։ Տեղեկացնում ենք ձեզ, որ մեկնարկել է մրցութային հայտերի ընդունման փուլը։ Մրցույթի նպատակն է զարգացնել երիտասարդների նորարարական մտածողությունը, ներգրավել երիտասարդներին՝ Հայաստանի Հանրապետության սոցիալ-տնտեսական զարգացման խնդիրների լուծման գործընթացներում և խթանել գիտատեխնիկական մշակումներ ու նորարարական նախագծեր իրականացնելու քաղաքացիական նախաձեռնությունները։

Մրցույթին կարող են մասնակցել Հայաստանի Հանրապետության և սփյուռքի 13-35 տարեկան երիտասարդներ կամ հեղինակային խմբեր: Մրցույթն անցկացվում է հետևյալ թեմատիկ ուղղություններով՝ կենսաբազմազանություն, կլիմայական անցում, կայուն էներգետիկ զարգացում և ռեսուրսների անվտանգ կառավարում, թվային փոխակերպում, կլիմայական տվյալների համակարգեր և կանաչ ենթակառուցվածքներ, կենսաբժշկական ապահովություն, անհատականացված առողջապահական ծառայություններ և նեյրոհոգեբանական բարեկեցության խթանում, կանաչ տնտեսություն, ռազմավարական կառավարում և տնտեսական կայունություն, ստեղծագործ տնտեսություն, մշակութային ժառանգություն և մարդկային կապիտալի զարգացում։

Մրցույթի մանրամասներին կարելի է ծանոթանալ հետևյալ հղմամբ՝ https://escs.am/am/news/36455։

Հայտերի ընդունման վերջնաժամկետը 2026 թվականի սեպտեմբերի 20-ն է։

Հարցերի և հավելյալ տեղեկատվության համարզանգահարել`  010-599 699 (642) և 010 599 699 (643) հեռախոսահամարներով:

Մասնակիցներին մաղթում ենք հաջողություն։