Եվրոպական միության «Էրազմուս+» միջազգային շարժունության ծրագրի շրջանակներում Գավառի պետական համալսարանի հումանիտար մասնագիտությունների ֆակուլտետի իրավագիտության ամբիոնի դասախոս Լուսինե Բախտիկյանը մասնակցեց Իսպանիայի Թագավորության Մուրսիա քաղաքի Սուրբ Անտոնիոս կաթոլիկ համալսարանում (UCAM) կազմակերպված 2026 թվականի միջազգային շաբաթին։ «Միջազգային շաբաթ-2026»-ի հիմնական նպատակն էր ներկայացնել եվրոպական կրթական ու գիտական համակարգը, միջազգային համագործակցության ուղղությունները։
Լուսինե Բախտիկյանը մասնակցեց ակադեմիական շարժունությանը նվիրված աշխատաժողովին, բուհերի միջազգայնացման ռազմավարությանը և առաջավոր փորձի փոխանակմանը վերաբերող նիստերին։ Աշխատաժողովների ընթացքում տարբեր երկրների պատվիրակներ ներկայացրին իրենց բուհերի կրթական ծրագրերն ու միջազգային փորձը։ Լուսինե Բախտիկյանը բովանդակալից շնորհանդեսով ներկայացրեց Գավառի պետական համալսարանը, բուհի կրթական ծրագրերը, գիտահետազոտական գործունեությունը, միջազգային համագործակցության հնարավորությունները։ Մասնակիցները եղան նաև Կարթագենի համալսարանական մասնաճյուղում, այցելեցին հռոմեական հնագույն թատրոն, Մուրսիա քաղաքի հնագիտական թանգարան։
Միջազգային շաբաթին մասնակցությունը հնարավորություն է՝ ձեռք բերելու նոր գիտելիքներ, ծանոթանալու եվրոպական կրթական փորձին, ինչպես նաև հաստատելու գործընկերային նոր կապեր, որոնք կարող են հիմք դառնալ հետագա համագործակցության ու համատեղ ծրագրերի իրականացման համար։